WALIYOSE WAKUKHUMBA KUTEMWEKA. Nthengwa kweniso ubwezi withu na ŵanyithu vingakhora yayi kwambura chitemwa. Pakuti waliyose wakukhumba kutemweka, ipo chitemwa ntchakuzirwa chomene pa umoyo withu kuti tiŵe ŵakukondwa. Kweni kasi chitemwa ni vichi?

Nangauli chitemwa icho mfumu na muwoli ŵakulongorana nacho ntchakuzirwa, kweni ndicho tikuyowoya apa yayi. M’malo mwake, tikunena chitemwa icho chikupangiska munthu kukhwaskika para ŵanyake ŵakusuzgika ndipo wakuchitapo kanthu. Chitemwa ichi chikujintha pa fundo za Chiuta ndipo chikusazgaposo umo munthu wakujipulikira.

Pakuyowoya za chitemwa, Baibolo likuti: “Chitemwa chikuzikira ndipo ntchalusungu. Chitemwa chilije sanji. Chikujilumba yayi, chikujitukumura yayi, chikuchita mwambura kwenelera yayi, chikupenja vyake pera yayi, ndipo chikukwiya luŵiro yayi. Chitemwa chikusunga vyakusingo yayi. Chikusekelera na kwananga yayi, kweni chikusekelera na unenesko. Chikubenekelera vinthu vyose, . . . . chikugomezga vinthu vyose, chikuzizipizga vinthu vyose. Chitemwa chikumara yayi.”—1 Ŵakorinte 13:4-8.

Chitemwa chanthena ichi “chikumara yayi,” kweni chikukulirakulira. Pakuti chitemwa chanthena chikuzikira, ntchalusungu, kweniso chikugowokera, mphake kuyowoya kuti “chikukakilira ŵanthu pamoza.” (Ŵakolose 3:14) Ntheura ŵanthu awo ŵakutemwana nthena ŵakuŵa ŵakuvikilirika kweniso ŵakukondwa nangauli wose mbakwananga. Wonani umo chitemwa chanthena ichi chikukhozgera nthengwa.

Yesu Khristu wakasambizga fundo izo zingawovwira kuti nthengwa zendenge makora. Mwachiyelezgero, iyo wakati: “‘Pa chifukwa ichi mwanalume walekenge awiske na anyina ndipo wabatikanenge na muwoli wake, ndipo wose ŵaŵiri ŵaŵenge thupi limoza.’ . . . . Pa chifukwa ichi, icho Chiuta wagumanya pamoza munthu waleke kupatura.” (Mateyu 19:5, 6) Pa lemba ili pali fundo ziŵiri.

“WOSE ŴAŴIRI ŴAŴENGE THUPI LIMOZA.” Nthengwa yikuchitika pakati pa ŵanthu ŵaŵiri, ndipo chitemwa chikuyivikilira ku uzaghali. Para munyake wachita uzaghali, mfumu panji muwoli ŵakuŵaso thupi limoza yayi. (1 Ŵakorinte 6:16; Ŵahebere 13:4) Nthengwa yingatimbanizgika panji kumara chifukwa chakuleka kugomezgeka. Ŵana nawo ŵangasuzgika maghanoghano, ŵangajiwona kuti ŵakutemweka yayi, mbambura kuvikilirika kweniso ŵangaŵa ŵakali.

“ICHO CHIUTA WAGUMANYA PAMOZA.” Nthengwa njakupatulika. Ŵakutorana awo ŵakumanya fundo iyi ŵakulimbikira kukhozga nthengwa yawo. Iwo ŵakuyezga yayi kusanga nthowa zakumazgira nthengwa para pawuka masuzgo. Iwo ŵakutemwana chomene na kuzizipizga masuzgo. Chitemwa chanthena “chikuzizipizga vinthu vyose,” ndipo chikovwira para mu nthengwa muli masuzgo mwakuti nyengo zose ŵaŵenge ŵakukolerana.

Para ŵapapi ŵakutemwana, ŵana nawo vikuŵayendera makora. Mwanakazi munyake zina lake Jessica wakati: “Adada na amama ŵakutemwana na kuchindikana chomene. Para nkhuwona amama ŵakuchindika adada, chomenechomene pa nkhani zakukhwaskana na taŵana ŵawo, nkhukondwa chomene ndipo nane nkhukhumba kuzakachita nga ndiwo.”

Chitemwa ni mukhaliro ukuru wa Chiuta. Nakuti Baibolo likuti: “Chiuta ntchitemwa.” (1 Yohane 4:8) Ntheura tikuzizwa yayi kuti Yehova wakuchemekaso kuti “Chiuta wakukondwa.” (1 Timote 1:11) Nase tingaŵa ŵakukondwa para tingayezga mikhaliro yiwemi ya Mlengi withu, chomenechomene chitemwa. Lemba la Ŵaefeso 5:1, 2 likuti: “Pakuti ndimwe ŵana ŵakutemweka, yezgani Chiuta. Lutilirani kwenda mu chitemwa.”