NKHANI YA PA CHIKOPI | NAMWE MUNGALIPULIKISKA BAIBOLO
Chifukwa Wuli Ntchakukhumbikwa Kulipulikiska Baibolo?
LIN wa ku China wakati: “Pa mabuku ghose gha visopa, Baibolo ndilo ndakumanyikwa chomene. Kweni kwa ise Matchayinizi buku ili ndachilendo ndipo ndambura kukhumbikwa.”
AMIT wa ku India wakati: “Para nkhutondeka kupulikiska mabuku gha chisopa chane cha Chihindu, so Baibolo ni kuno!”
YUMIKO wa ku Japan wakati: “Baibolo nkhulichindika chifukwa ni buku lakale ndipo nili kupulika kuti likwenda chomene malonda. Kweni ine nindaliwonepo.”
Pa charu chose, ŵanthu ŵanandi ŵakulichindika Baibolo. Kweni ŵanandiso ŵakumanya yayi ivyo vili mu Baibolo. Chiyelezgero mbanthu mamiliyoni ghanandi awo ŵakukhala ku Asia. Kweniso ŵanyake ŵanandi awo ŵakukhala mu vyaru ivyo Baibolo likusangika, nawo ŵakulimanya makora yayi.
Kweni mungafumba kuti: “Chifukwa wuli ntchakukhumbikwa kuti nilipulikiske Baibolo?’ Para mwapulikiska ivyo buku lakupatulika ili likusambizga, vimovwiraninge:
-
Kuŵa ŵakukondwa na ŵakukhorwa
-
Kusanga nthowa zakumazgira masuzgo mu nthengwa
-
Kuti muleke kwenjerwa chomene
-
Kuti mukhalenge makora na ŵanthu
-
Kuti mugwiliskirenge ntchito ndalama mwamahara
Wonani ivyo wakachita Yoshiko, wa ku Japan. Wakajifumbanga kuti mu Baibolo muli vichi ndipo wakaghanaghana kuti waliŵazge. Kasi chikachitika ntchivichi? Iyo wakati: “Baibolo lanovwira kumanya chifukwa icho niliri wamoyo kweniso lanovwira kumanya kuti kunthazi kuli viwemi. Pasono nkhujiwonaso wawakawaka yayi.” Amit, uyo wazunulika pakwambilira, nayo wakaghanaghana kuti wajiwonere yekha ivyo vili mu Baibolo. Iyo wakati: “Nkhazizwa chomene. Mu Baibolo muli fundo zakovwira waliyose.”
Baibolo lawovwira ŵanthu ŵanandi chomene. Namwe mwalekerachi kuti mulisambire na kuwona umo lingamovwilirani?
