“Usange mulombenge kanthu kwa Adada ŵamupaninge mu zina lane.”​—Yohane 16:23.

Ivyo Yesu wakayowoya apa vikulongora kuti Yehova wakukhumba kuti tilombenge kwa iyo pera mu zina la Yesu Khristu. Iyo wakukhumba yayi kuti tilombenge kwizira mu vikozgo, ŵangelo, ŵasekuru ŵithu awo ŵali kufwa panji ŵanthu awo tikuŵawona kuti mbatuŵa. Para tikulomba mu zina la Yesu, tikulongora kuti tikumanya udindo wakuzirwa uwo Yesu wali nawo. Yesu wakati: “Palije uyo wakwiza kwa Adada kwambura kwizira mwa ine.”​—Yohane 14:6.

“Pungulirani mitima yinu pamaso pake.”​—Salimo 62:8.

Para tikulomba kwa Yehova tikwenera kuyowoya nga umo tikuchitira kwa dada withu ŵakuthupi. M’malo mwakuchita kuŵerenga mu buku panji kuyowoya malurombo ghakusunga waka pa mtima, tikwenera kulomba kwa Yehova mwantchindi kufumira pasi pa mtima.

“Kanthu kalikose ako tingalomba mwakuyana na khumbo lake, wakutipulika.”​—1 Yohane 5:14.

Mu Baibolo, Yehova wakutiphalira ivyo watichitirenge, kweniso ivyo ise tikwenera kumuchitira. Ntheura kuti iyo wapulike malurombo ghithu, tikwenera kulomba “mwakuyana na khumbo lake.” Kuti tichite nthena, tikwenera kuŵerenga Baibolo kuti timumanye makora. Ivi viwovwirenge kuti malurombo ghithu ghaŵenge ghakukondweska kwa Yehova.

Lombani Vinthu Ivyo Mukukhumbikwira. Tingalomba kwa Chiuta kuti watipe vinthu ivyo tikukhumbikwira zuŵa na zuŵa nga ntchakurya, vyakuvwara na pakugona. Tingalombaso vinjeru kuti vitovwirenge kusankha makora vinthu, kweniso tingalomba kuti watipe nkhongono kuti titondenge viyezgo. Tingalombaso kuti tiŵe na chipulikano chakukhora, kuti Chiuta watigowokere, kweniso kuti watovwire.​—Luka 11:3, 4, 13; Yakobe 1:5, 17.

Lomberani Ŵanyinu. Ŵapapi awo ŵakutemwa ŵana ŵawo, ŵakukondwa usange ŵana ŵawo ŵakutemwana. Yehova nayo wakukhumba kuti ŵana ŵake pa charu chapasi ŵatemwanenge yumoza na munyake. Ntheura tiŵalomberenge ŵana ŵithu, munyithu wa mu nthengwa, ŵabali ŵithu, na ŵabwezi ŵithu. Msambiri Yakobe wakalemba kuti: ‘Lomberanani.’​—Yakobe 5:16.

Muwongani Yehova. Pakuyowoya za Mlengi withu, Baibolo likuti: “Wakuchita vinthu viwemi. . . . Wakumupani vula kufuma kuchanya na nyengo za vipambi, wakumupani vyakurya na kuzuzga mitima yinu na chimwemwe.” (Milimo 14:17) Para tikughanaghanira vyose ivyo Chiuta watichitira, mbwenu tikhumbenge chomene kuti timuwonge mu lurombo. Kweniso tikwenera kupulikira Chiuta kuti tilongore kuti tikumuwonga.​—Ŵakolose 3:15.

Nyengo zinyake tingagongowa para tikuwona kuti Chiuta wakutizgora nyengo yeneyiyo yayi lurombo lwithu lwakufumira pasi pa mtima. Kasi ichi chikung’anamura kuti Chiuta wakuŵikako mahara yayi kwa ise? Yayi. Wonani ivyo vikachitikira ŵanthu ŵanyake ivyo vikulongora kuti tikwenera kulutilira waka kulomba.

Steve, uyo tangumuzunura mu nkhani yakwamba wakuti, “Nilekenge kulomba mphanyi nkhaŵavya chigomezgo chilichose chakuti nizamuŵaso wakukondwa.” Kasi ntchivichi chikamovwira? Iyo wakamba kusambira Baibolo ndipo wakamanya kuti wakwenera kulutilira kulomba. Iyo wakuti: “Nkhalombanga kwa Yehova kumuwonga pa wovwiri wose uwo ŵabwezi ŵane ŵakanipanga. Pasono nili wakukondwa chomene kuluska pakwamba.”

Wuli pakuyowoya za Jenny, uyo wakajiwonanga kuti ngwawakawaka mwakuti Yehova wangapulika yayi lurombo lwake? Iyo wakuti: “Apo nkhajiwonanga kuti ndine wawakawaka, nkhamupemphanga Yehova kuti wanovwire kupulikiska chifukwa icho nkhajiwoneranga nthena.” Kasi ivi vikamovwira wuli? Iyo wakuti: “Kuyowoya na Chiuta mu lurombo kwanovwira kuti nijiwonenge nga umo Yehova wakuniwonera. Nanga mtima unganisuska kweni Yehova wakuniwona mwakwenelera. Kweniso lurombo lukanovwira kuti nileke kugongowa.” Kasi chikachitika ntchivichi? Iyo wakuti: “Lurombo lwanovwira kuti niwonenge Yehova kuti ngwanandi, wachitemwa, wakunipwelelera, Dada, na Mubwezi wane ndipo nyengo zose walipo kuti wanovwire chikuru nkhulutilira kuchita vinthu ivyo vikumukondweska.”

Wonaniso ivyo vikachitikira Isabel. Apo wakaŵa na nthumbo, dokotala wake wakamuphalira kuti mwana uyo wababenge waŵenge wakupendera. Iyo wakasuzgika chomene maghanoghano. Ŵanthu ŵanyake ŵakamuphalira kuti wafumiske waka nthumbo iyi. Iyo wakuti: “Nkhajipulikanga nga nifwenge chifukwa cha chitima icho nkhaŵa nacho mu mtima wane.” Kasi wakachita wuli? Iyo wakuti: “Nkhalomba kanandi waka kwa Chiuta kuti wanovwire.” Nyengo yikati yajumphapo wakababa mwana musepuka zina lake Gerard, ndipo mwana uyo wakaŵa nadi wakupendera. Kasi Isabel wakuwona kuti Chiuta wakazgora lurombo lwake? Enya. Munthowa wuli? Iyo wakuti: “Para nkhuwona mwana wane uyo pasono wali na vyaka 14, wakukondwa na umoyo nangauli ngwakupendera, nkhuwona kuti Yehova wali kunizgora lurombo lwane munthowa yiwemi chomene. Kweniso nkhuwona mwana wane kuti ntchawanangwa chapadera chomene icho Yehova wali kunipa.”

Ivi vikutikumbuska mazgu agho wamasalimo munyake wakayowoya. Iyo wakati: “Imwe, A Yehova, mupulikenge pempho la ŵakuzika. Mukhozgenge mitima yawo na kutegherezga kwa iwo.” (Salimo 10:17) Ipo ntchakuzirwa chomene kulutilira kulomba kwa Chiuta!

Mu Baibolo muli malurombo ghanandi agho Yesu wakalomba. Lurombo ulo lukumanyikwa chomene ni ulo Yesu wakasambizga ŵasambiri ŵake. Kasi tingasambirako vichi ku lurombo ulu?