Chiuta wali kuŵapa ŵanthu mwaŵi wapadera wakuti ŵayowoyenge nayo na kumuphalira umo ŵakujipulikira kwizira mu lurombo. Ntchimi Davide yikalomba kuti: “Imwe ŵakupulika malurombo, ŵanthu ŵa mitundu yose ŵizenge kwa imwe.” (Salimo 65:2) Kasi tingalomba wuli kuti Chiuta wapulikenge malurombo na kutitumbika?

Para mukulomba pamwekha mukuŵa na m’pata wa ‘kupungulira mtima winu pamaso pa Chiuta,’ ndipo mukumuphalira chilichose cha mu mtima winu. (Salimo 62:8) Wankhongonozose wakukondwa na malurombo ghakufumira pasi pa mtima.

Nangauli Chiuta wali na mazina ghanandi gha vithokozo, kweni zina lake leneko ndimoza pera. Chiuta wakati: “Ine ndine Yehova. Ili ndilo zina lane.” (Yesaya 42:8) Zina lakuti Yehova likusangika mu malo 7,000 mu Malemba Ghakupatulika. Ntchimi zinandi zikazunuranga zina leneko la Chiuta. Abrahamu wakati: “Naŵeya Yehova, . . . lekani nilutilire kuyowoya [namwe].” (Genizesi 18:30) Nase tikwenera kulizunura zina la Chiuta lakuti Yehova para tikulomba.

Chiuta wakupulikiska maghanoghano ghithu na umo tikujipulikira vilije kanthu kuti tikuyowoya chiyowoyero wuli. Mazgu gha Chiuta ghakutisimikizgira kuti: “Chiuta wakutemwera yayi. Kweni wakupokelera munthu wa mtundu uliwose uyo wakumopa na kuchita urunji.”—Milimo 10:34, 35.

Ndipouli kuti Chiuta watitumbike tikwenera kuchita vinandi padera pa kulomba waka. Mu nkhani yakulondezgapo tiwonenge ivyo tikwenera kuchita.