Mikayeli ni Yesu ndipo matchalitchi ghanyake ghakumuchema “Mikayeli Mutuŵa.” Iyo wakachemekanga na zina ili pambere wandize pa charu chapasi kweniso wati wakwera kuchanya. a Nyengo yinyake Mikayeli wakapindana na Satana vya thupi la Mozesi, kweniso wakawovwira mungelo kuti wakapeleke uthenga kwa ntchimi Daniyeli. (Daniyeli 10:13, 21; Yuda 9) Pakuti Mikayeli wakuvikilira mazaza gha Yehova na kumarana na ŵalwani ŵa Chiuta, wakuchita vinthu mwakuyana na zina lake, ilo likung’anamura kuti, “Ni Njani Wali Nga ni Chiuta.”—Daniyeli 12:1; Chivumbuzi 12:7.

 Tiyeni tiwone vifukwa vya mu Malemba ivyo tikuyowoyera kuti Mikayeli ni Yesu.

•   Mikayeli ni “mungelo mulara.” (Yuda 9) Zina la udindo lakuti “mungelo mulara,” likung’anamura “mulongozgi wa ŵangelo.” Zina ili likusangika mu mavesi ghaŵiri pera mu Baibolo. Mu mavesi ghose agha, zina ili likulongora kuti nda munthu yumoza pera. Limoza la mavesi agha likuti Fumu Yesu, iyo yikawuka ku ŵakufwa, “yizamukhira kufuma kuchanya na ntchemerezgo yikuru, na mazgu gha mungelo mukuru.” (1 Ŵatesalonika 4:16) Yesu wali na “mazgu gha mungelo mukuru” chifukwa chakuti ni Mikayeli, mungelo mulara.

•   Mikayeli wakulongozga ŵangelo ŵankhondo. “Mikayeli na ŵangelo ŵake wakarwanga na chinjoka” panji kuti Satana. (Chivumbuzi 12:7) Mikayeli wali na mazaza ghakuru kuluska ŵangelo wose. Lekani wakuchemeka kuti “yumoza wa ŵakaronga ŵalara” kweniso “karonga mukuru.” (Daniyeli 10:13, 21; 12:1) Munthu munyake zina lake David E. Aune wakati mazina agha ghakulongora kuti Mikayeli ni “mulongozgi wa ŵangelo ŵankhondo.”

   Baibolo likuzunura zina linyake la munthu yumoza pera uyo wali na mazaza pa gulu la ŵangelo ŵankhondo. Likuti: “Fumu Yesu yizamuvumbukwa kufuma kuchanya pamoza na ŵangelo ŵake ŵankhongono mu moto wakugolera, apo yizenge na nduzga.” (2 Ŵatesalonika 1:7, 8; Mateyu 16:27) Yesu “wali kuluta kuchanya, . . . Ndipo ŵangelo na ŵamazaza na ŵankhongono ŵali pasi pake.” (1 Petrosi 3:21, 22) Vingapulikikwa yayi kuti Chiuta wimike ŵanthu ŵaŵiri, Yesu na Mikayeli, kuti wose ŵaŵe ŵalongozgi ŵa ŵangelo ŵake ŵakugomezgeka. Ipo ntchakupulikikwa kuti Mikayeli ni zina linyake la Yesu.

•   Mikayeli “wazamuwuka” pa “nyengo ya suzgo.” (Daniyeli 12:1) Mu buku la Daniyeli, lizgu lakuti “wazamuwuka,” kanandi likuyowoya za themba ilo likwimilira kuti lichite ntchito yinyake yapadera. (Daniyeli 11:2-4, 21) Yesu uyo wakuchemeka “Mazgu gha Chiuta,” wazamuwuka nga “Themba la mathemba” kuti wachite ntchito yapadera ya kuparanya ŵalwani wose na kuvikilira ŵanthu ŵa Chiuta. (Chivumbuzi 19:11-16) Wazamuchita ivi pa nyengo ya “suzgo yikuru, iyo yindachitikepo kufuma ku uyambiliro wa charu.”—Mateyu 24:21, 42.