Baibolo likuyowoya yayi deti ilo Yesu wakababikira, kweniso likuyowoyapo yayi kuti tikondwelerenge kubabika kwake. Buku linyake likuti: “Chiuta wandaphalirepo ŵanthu kuti ŵakondwelerenge Khrisimasi. Kweniso mu Testamente Lasono palije apo pali kulembeka kuti tichitenge Khrisimasi.”—McClintock and Strong’s Cyclopedia

 Kafukufuku wakulongora kuti Khrisimasi yikamba na ŵanthu awo ŵakusopa vikozgo. Baibolo likuti Chiuta wakukwiya usange tikumusopa mu nthowa iyo wakukana.—Ekisodo 32:5-7.

1.   Kukondwelera kubabika kwa Yesu: “Ŵakhristu ŵakwambilira ŵakakondweleranga yayi kubabika kwa Yesu, chifukwa ŵakawonanga kuti kukondwelera zuŵa la kubabikira kukamba na ŵanthu ŵa chisopa chautesi.”—The World Book Encyclopedia.

2.   December 25: Palije ukaboni wakuti Yesu wakababika pa December 25. Ŵaliska ŵa Matchalitchi ŵakwenera kuti ŵakasankha deti ili kuti liyane na deti ilo ŵakachitiranga vikondwelero ivyo vikamba na ŵanthu ŵambura kusopa Chiuta pa nyengo iyo maora gha muhanya ghakaŵanga ghachoko kuluska usiku.

3.   Vyawanangwa na viphikiro: Buku la Encyclopedia Americana likuyowoya kuti: “Ŵanthu ŵakukondwelera Khrisimasi pakutolera waka chikondwelero cha Chiroma cha Saturnalia icho chikachitikanga pakati pa mwezi wa December. Pa chikondwelero ichi ŵanthu ŵakaryanga, kupana vyawanangwa, kweniso ŵakabuskanga makandulo.” Buku linyake likayowoyaso kuti: “Pa zuŵa la chikondwelero ichi cha Saturnalia, ŵanthu ŵakazomerezgekanga yayi kugwira ntchito panji kuchita bizinesi.”—Encyclopædia Britannica.

4.   Magesi gha pa Khrisimasi: Buku linyake likuyowoya kuti ŵanthu ŵa ku Europe ŵakatemwanga kutoweska nyumba zawo “na magesi kweniso tumakuni twakubiliŵira” pa nyengo iyo ŵakachitanga chiphikiro kweniso kuti ŵachimbizge mizimu yiheni.—Encyclopedia of Religion.

5.   Mistletoe, holly: Agha ni makuni agho ŵakughagwiliskira ntchito pa Khrisimasi nga vitoweskero. “Ŵasembe ŵakagomezganga kuti makuni agha ghakapangiskanga vyakuziziswa. Iwo ŵakasopanga makuni agha pakupemphelera kuti zuŵa liwelere uko likaya.”—The Encyclopedia Americana.

6.   Khuni la Khrisimasi (Christmas tree): “Ŵanthu ŵakusopa vikozgo ŵa ku Europe, ŵakalutilira kusopa khuni ili ŵati ŵazgoka Ŵakhristu.” Iwo “ŵakaŵikanga khuni la Khrisimasi la Yule pa mulyango panji mukati mwa nyumba zawo pa nyengo iyo ŵakachitiranga maholide ghawo.”—Encyclopædia Britannica.