Ŵanthu ŵanyake vikuŵasuzga kusintha nkharo yiheni. Ndimo vikaŵiraso na ine. Nkhababikira mu tawuni ya Barcelona, ku Spain ndipo ndiko nkhakulira. Iyi ni tawuni yachiŵiri pa tawuni zikuru ku Spain. Banja lithu likakhalanga mu chigaŵa cha Somorrostro icho chili mu mphepete mwa nyanja. Chigaŵa cha Somorrostro chikaŵa chakutchuka na uchigeŵenga, kweniso ŵanthu ŵanandi mu chigaŵa ichi ŵakatemwa chomene kugwiliskira ntchito munkhwala wakuzweteska wongo.

 Mu banja lakwithu tikababika ŵana 9, ŵanalume 6, ŵanakazi ŵatatu, ndipo ine ndine wakwamba. Pakuti banja lakwithu likaŵa likavu chomene, adada ŵakanituma kuti nkhagwirenge ntchito ya kusora bola pa kilabu yinyake iyo yikaseŵeranga tenisi. Pa nyengo iyi, nkhaŵa na vyaka 10 ndipo zuŵa lililose nkhagwiranga ntchito maora 10. So pakaŵa pakusuzga kuluta ku sukulu nga umo ŵanyane ŵanandi ŵamsinkhu wane ŵakachitiranga. Apo nkhaŵa na vyaka 14, nkhamba ntchito yakunozga na kwendeska mashini pa shopu yinyake yakupanga visulo.

 Mu 1975, nkhachemeka kuti nkhambe ntchito ya usilikari, ndipo pa nyengo iyi charu cha Spain chikapelekanga yayi wanangwa wakusankha kwa munthu. Pa umoyo wane nkhakhumbanga kuzakachita chinthu chinyake chachilendo icho ŵanthu ŵanyake ŵandachitepo. Ntheura nkhazomera kunjira gulu la nkhondo la Spanish Foreign Legion ilo likaŵa ku Melilla, North Africa. Ku Melilla kukasangikanga ŵanthu ŵanandi ŵakufumira ku Spain. Pa nyengo iyi, nkhamba kumwa chomene moŵa kweniso kugwiliskira ntchito munkhwala wakuzweteska wongo.

 Nati nafuma ku Melilla, nkhawelera ku Barcelona nakwambiska gulu la vigeŵenga. Vinthu vyaŵene tikaviwoneranga maso yayi. Tikibanga waka chilichose na kuguliska kuti tisange ndalama zakugulira munkhwala wakuzweteska wongo. Nkhamba kugwiliskira ntchito munkhwala wakuzweteska wongo wakuchemeka LSD na amphetamines, ndipo ivi vikanipangiska kuti nitemwenge chomene ŵanakazi, moŵa na njuga. Nkhatemwangaso chomene mbembe. Palipose apo nili, nkhaŵanga na chimayi, mbavi, na chigwandala panji kuti phwitika. Para munthu wanikwiyiska nkhagamphanga waka.

 Zuŵa linyake tikiba galimoto ndipo ŵapolisi ŵakatiskera. Yikaŵa nga ni filimu waka. Tikachimbizga galimoto mtunda wa makilomita pafupifupi 30, ndipo paumaliro ŵapolisi ŵakamba kutilasa la futi. Pamanyuma, dilayivala withu wakaphwanyiska galimoto ndipo tose tikafumamo na kuchimbira. Adada ŵakati ŵamanya nkhani iyi, ŵakanichimbizga pa nyumba.

 Kwa vyaka 5, nkhagonanga mu nyumba yayi. Nyengo zinyake nkhagonanga mu makhonde gha nyumba za ŵanthu, mu msewu, mu magalimoto ghakunyamura katundu, pa mipando ya mu mapaki, kweniso ku malaro. Kanyengo kanyake nkhagonapo ku mphanji. Nkhawonanga umoyo wane kuŵa wambura ntchito, ndipo nkhapwelerangako yayi vyaumoyo. Nkhukumbuka kuti nyengo yinyake nkhajichekacheka mu mawoko chifukwa cha nkhongono ya vimunkhwala vyakuzweteska wongo. M’paka pano mabamba ghachali kuwoneka.

 Apo nkhaŵa na vyaka 28, amama ŵakamba kunipenja kuti niwelere ku nyumba. Nkhazomera kuwelera ndipo nkhaŵalayizga kuti nisinthenge nkharo yane yiheni. Kweni vikanitolera nyengo kuti nisinthe nadi.

 Zuŵa linyake Ŵakaboni ŵa Yehova ŵaŵiri ŵakiza ku nyumba kwithu na kunipharazgira. Apo nkhategherezganga ku ŵanthu aŵa, adada ŵakachemerezga mwaukali mu nyumba kuti nileke kudumbiskana nawo na kujalako ku mulyango. Pakuti nkhwesa ndizo zikaŵa kurya kwane, nkhazerezga waka ivyo adada ŵakaniphalira. Ŵakaboni ŵa Yehova aŵa ŵakanipa mabuku ghatatu ndipo nkhakondwa chomene. Nkhaŵafumba uko ŵakusopera, ndipo pakati pajumpha mazuŵa ghachoko waka, nkhaluta ku Nyumba ya Ufumu.

 Nati nafika, nkhawona kuti ŵanthu wose ŵavwara makora chomene. Apo ine, sisi na mwembe vikaŵa waka nyankhalala, kweniso ivyo nkhavwara vikaŵa natunatu. So nkhakhala waka pawaro chifukwa nkhawona kuti ndine wambura kwenelera kunjira. Chinyake icho chikanizizika chomene ntchakuti nkhawona munyane Juan, uyo tikachitiranga lumoza vya uchigeŵenga, wali mu suti. Ŵakaniphalira kuti pajumpha chaka chimoza kufuma apo Juan wakaŵira Kaboni wa Yehova. Ntheura nkhongono zikakwera ndipo nkhanjira kuti nane nkhapulikizge maungano. Apa ndipo umoyo wane ukamba kusinthira.

 Nkhazomera kusambira Baibolo, ndipo nkhamanya kuti usange nkhukhumba kuŵa paubwezi na Yehova, nkhwenera kuleka nkharo yane yaukazuzi. Kweni iyi yikaŵa nkhani ya fyopo chaa. Nkhasambira kuti usange nkhukhumba kukondweska Yehova, nkheneranga ‘kusintha maghanoghano ghane.’ (Ŵaroma 12:2) Nkhakhozgeka chomene kuti Chiuta wakanichitira lusungu. Nangauli nkhachitanga vinthu vyaunyankhasi, kweni nkhawona kuti wanipa mwaŵi kuti nisinthe nkharo yane yawakawaka. Ivyo nkhasambira vyakukhwaskana na Yehova Chiuta vikanitchontha chomene. Nakuti nkhajulika ku maso kumanya kuti kuli Mlengi uyo wakunipwelelera.—1 Petrosi 5:6, 7.

 Ivi vikanipangiska kuti nambe kusintha nkharo yane. Mwachiyelezgero, nkhati nasambira kuti Baibolo likukanizga hona, mumtima nkhati, ‘Usange Yehova wakukhumba kuti nijitozge ku ukazuzi wa mtundu uliwose, mbwenu nkhwenera kutaya ndudu zose!’ (2 Ŵakorinte 7:1) Ndivyo nkhachita nadi!

 Nkhenerangaso kuleka kuguliska na kugwiliskira ntchito munkhwala wakuzweteska wongo, nangauli chikaŵa chipusu yayi. Nkhaleka kwendezgana na ŵabwezi ŵane ŵakale kuti nisinthe nkharo yane. Iwo ŵakaŵa ŵakuti ŵanganovwira yayi kukura mwauzimu. So nkhamba kugomezga chomene Yehova kweniso ŵabwezi ŵane mu mpingo. Ŵakanilongora chitemwa icho nindachiwonepo kawiro kane kose. Pakati pajumpha myezi, nkhalekerathu kugwiliskira ntchito munkhwala wakuzweteska wongo, ndipo ‘nkhavwara wunthu uphya’ uwo ukanovwira kuŵa paubwezi na Yehova. (Ŵaefeso 4:24) Nkhabatizika mu August 1985, na kuŵa Kaboni wa Yehova.

 Baibolo likanovwira kuti niŵe na umoyo uwemi. Likanifwatura ku nkharo yiheni iyo yikananganga thupi kweniso mbiri yane. Nakuti ŵanyane ŵakujumpha 30 awo kale tikachitiranga lumoza nkharo zawakawaka, ŵakafwa ŵachali ŵachoko na matenda gha Ezi, panji matenda ghanyake agho ghakwamba chifukwa chakugwiliskira ntchito munkhwala wakuzweteska wongo. Nkhukondwa chomene kuti fundo za mu Baibolo zikanovwira kugega masuzgo ghakofya agha.

 Sono nkhunyamuraso vimayi na mbavi yayi nga umo nkhachitiranga kale, ndipo nili kulekerathu nkhaza. Nkhamanyanga yayi kuti zuŵa linyake nizamunyamuranga Baibolo na kovwira nalo ŵanthu. Kweni sono, ine na muwoli wane ndise ŵateŵeti ŵanyengozose ŵa Yehova.

 Ŵapapi ŵane ŵakaŵa Ŵakaboni ŵa Yehova yayi, kweni ŵakakondwa chomene kuwona kuti Baibolo lasintha nkharo yane. Nakuti adada ŵakamba kubakira panji kuti kuŵakhalira khonde Ŵakaboni ŵa Yehova para ŵanthu ŵakuŵanena. Adada ŵakamanya kuti ivyo nkhasambira mu Baibolo vikanovwira chomene kusintha na kuŵa na nkharo yiwemi. Kanandi amama ŵakayowoyanga kuti mphanyi nkhamba luŵiro kusambira Baibolo. Nadi, ŵakatetanga cha!

 Pa umoyo wane nasambira kuti kugwiliskira ntchito munkhwala wakuzweteska wongo panji kuchita mikhaliro yinyake yaukazuzi, ndivyo vinganovwira kuti niŵe wakukondwa yayi. Sono ndipo nkhukondwa nadi, chifukwa nkhuphalirako ŵanthu uthenga uwemi wa Chiuta. Kwambura uthenga uwu, mphanyi ine kulije.