Xikwembu Xi Na Mavito Mangani?

TLANGA

Nhlamulo ya Bibele

Xikwembu xi ni vito rin’we ntsena. Hi Xiheveru ri tsariwa hi ndlela leyi יהוה naswona hi Xitsonga i “Yehovha.” a Xikwembu xi byele muprofeta Esaya xi ku: “Hi mina Yehovha. Rero i vito ra mina.” (Esaya 42:8) Vito leri ri humelela kwalomu ka 7 000 ematsalweni ya khale ya Bibele lama tsariweke hi voko. Vito leri ri humelela ko tala swinene ku tlula mavito lama tirhisiwaka ku vita Xikwembu kumbe mavito ya vanhu van’wana. b

Xana Yehovha u ni mavito man’wana?

Hambileswi eBibeleni Xikwembu xi vitaniwaka hi vito rin’we kambe ku ni mavito yo tala yo xi hlamusela ni yo xi dzunisa lama xi vitaniwaka ha wona. Nxaxamelo lowu landzelaka wa mavito yo dzunisa Xikwembu ni tinhlamuselo ta wona wu hlamusela ndlela leyi vito ha rin’we ri hlamuselaka vumunhu bya xona.

Vito	Laha ri kumekaka kona	Nhlamuselo ya rona
Xa Matimba Hinkwawo	Genesa 17:1	Xikwembu xi ni matimba lamakulu swinene. Xiga xa Xiheveru lexi nge ʼEl Shad·daiʹ, “Xikwembu xa Matimba Hinkwawo,” xi kumeka ka nkombo eBibeleni.
Alfa na Omega	Nhlavutelo 1:8; 21:6; 22:13	“Wo sungula ni wo hetelela,” kumbe “masungulo ni makumu,” leswi vulaka leswaku a ku nga ri na Xikwembu xa Matimba Hinkwawo emahlweni ka Yehovha naswona a ku nge vi na xikwembu xin’wana endzhaku ka yena. (Esaya 43:10) Alfa i letere ro sungula eka tialfabete ta Xigriki kasi Omega i letere ro hetelela.
Nkulukumba wa Masiku	Daniyele 7:9, 13, 22	A nga na masungulo; u ve kona ku sukela enkarhini lowu nga riki na masungulo ku nga si va na nchumu kumbe munhu.—Pisalema 90:2.
Mutumbuluxi	Esaya 40:28	U tumbuluxe swilo hinkwaswo.
Tatana	Matewu 6:9	Munyiki wa vutomi.
Xikwembu	Genesa 1:1	Xa gandzeriwa; naswona xi ni matimba. Rito ra Xiheveru leri nge ʼElo·himʹ ri le ka vunyingi, ku kombisa vukulu, xindzhuti kumbe vunene bya Yehovha.
Xikwembu xa swikwembu	Pisalema 136:2	I Xikwembu lexi tlakukeke, ku hambana ni “swikwembu leswi nga pfuniki nchumu” leswi van’wana va swi gandzelaka.—Esaya 2:8.
Muleteri Lonkulu	Esaya 30:20, 21	Wa hi dyondzisa ni ku hi kongomisa.—Esaya 48:17, 18.
Muendli Lonkulu	Pisalema 149:2	U tumbuluxe swilo hinkwaswo.—Nhlavutelo 4:11.
Xikwembu Lexi Tsakeke	1 Timotiya 1:11	I Xikwembu lexi tsakeke.—Pisalema 104:31.
Mutwi wa xikhongelo	Pisalema 65:2	U yingisa swikhongelo swa vanhu lava khongelaka eka yena hi ripfumelo.
Ndzi Loyi Ndzi Nga Yena	Eksoda 3:14, Bibele—Mahungu Lamanene	U va lexi lavekaka leswaku a hetisisa xikongomelo xa yena. Xiga lexi xi tlhele xi hundzuluxeriwa hi ndlela leyi, “Ndzi Ta Va Lexi Ndzi Hlawulaka Ku Va Xona.” (Bibele—Matsalwa Yo Kwetsima Ya Misava Leyintshwa) Nhlamuselo leyi yi pfuna ku hlamusela vito leri nge Yehovha eka ndzimana leyi landzelaka ya tsalwa rero.—Eksoda 3:15.
Rilaveta	Eksoda 34:14, Bibele—Mahungu Lamanene	Xi lava ku gandzeriwa xi ri xoxe. Xiga lexi xi tlhele xi hundzuluxeriwa xi va Xikwembu lexi ‘lavaka leswaku ku gandzeriwa xona ntsena.’ Bibele—Matsalwa Yo Kwetsima Ya Misava Leyintshwa.
Hosi ya hilaha ku nga heriki	Nhlavutelo 15:3	Vuhosi bya xona a byi na masungulo kumbe makumu.
Hosi	Pisalema 135:5	N’wini; hi Xiheveru i ʼA·dhohnʹ na ʼAdho·nimʹ.
La Nge Henhlahenhla	Pisalema 47:2	U ni xikhundlha lexi tlakukeke swinene.
Lowo Kwetsima Ngopfu	Swivuriso 9:10	U kwetsima swinene (u tengile) ku tlula swilo hinkwaswo leswi hanyaka.
Muvumbi	Esaya 64:8	U ni matimba yo lawula vanhu ni matiko, hilaha muvumbi a nga ni matimba yo lawula vumba.—Varhoma 9:20, 21.
Mukutsuri	Esaya 41:14, Bibele—Mahungu Lamanene	U kutsula kumbe ku xava vanhu eka xidyoho ni rifu hi ku tirhisa gandzelo ra nkutsulo ra Yesu Kreste.—Yohane 3:16.
Ribye	Pisalema 18:2, 46	I vutumbelo lebyi sirhelelekeke naswona i muponisi.
Muponisi	Esaya 45:21	U ponisa vanhu vakwe ekhombyeni.
Murisi	Pisalema 23:1	U khathalela vagandzeri va yena.
Hosi Leyi Tlakukeke	Genesa 15:2	U na vulawuri lebyi tlakukeke; hi Xiheveru i ʼAdho·naiʹ.
Loyi a Tlakukeke	Daniyele 7:18, 27	Hosi leyi tlakukeke swinene.

Mavito ya tindhawu eMatsalweni ya Xiheveru

Mavito man’wana ya tindhawu leti boxiwaka eBibeleni ma katsa ni vito ra Xikwembu, kambe mavito wolawo a hi mavito ya Xikwembu.

Vito ra ndhawu	Laha ri kumekaka kona	Nhlamuselo ya rona
Yehovha-yire	Genesa 22:13, 14	“Yehovha U Ta Endla Swi Va Kona.”
Yehovha-nisi	Eksoda 17:15	“Yehovha I Mfungho Wa Mina.” (Bibele—Matsalwa Yo Kwetsima Ya Misava Leyintshwa) Yehovha i Xikwembu lexi vanhu va xona va yaka eka xona loko va lava ku sirheleriwa ni ku pfuniwa.—Eksoda 17:13-16.
Yehovha-xalomu	Vaavanyisi 6:23, 24	“Yehovha I Ku Rhula.”

Swivangelo swa ku va hi tiva vito ra Xikwembu ni ku ri tirhisa

Xikwembu xi teka vito ra xona leri nge Yehovha ri ri ra nkoka swinene hikuva xi endle leswaku ri tsariwa ko tala swinene eBibeleni.—Malakiya 1:11.
Yesu N’wana wa Xikwembu, hi ku phindhaphindha u kandziyise nkoka wa vito ra Xikwembu. Hi xikombiso, u khongele eka Yehovha a ku: “Vito ra wena a ri kwetsimisiwe.”—Matewu 6:9; Yohane 17:6.
Lava dyondzaka hi vito ra Xikwembu ni ku tlhela va ri tirhisa, va va va ri eku akeni ka vunghana na Yehovha. (Pisalema 9:10; Malakiya 3:16) Xitshembiso xa Xikwembu lexi nge: “Ndzi ta n’wi ponisa hikuva wa ndzi rhandza. Ndzi ta n’wi sirhelela hikuva u tiva vito ra mina,” xi hetiseka eka lava va nga vanghana va Yehovha.—Pisalema 91:14.
Bibele yi ri: “[Ku] ni leswi vuriwaka swikwembu, etilweni kumbe emisaveni, tanihi leswi ku nga ni ‘swikwembu’ swo tala ni ‘tihosi’ to tala.” (1 Vakorinto 8:5, 6) Kambe yi tirhisa vito leri nge Yehovha ku kombetela eka Xikwembu xi ri xin’we xa ntiyiso.—Pisalema 83:18.

a Swidyondzeki swin’wana swa Vaheveru swi rhandza ku tirhisa vito leri nge “Yahweh” loko swi vitana Xikwembu.

b Vito ra Xikwembu leri komisiweke leri nge “Yah” ri humelela kwalomu ka mikarhi ya kwalomu ka 39 eBibeleni ku katsa ni leri nge “Haleluya” leswi vulaka ku “dzunisani Yah.”-Nhlavutelo 19:1: Bibele Matsalwa Yo Kwetsima Ya Misava Leyintshwa.