Tok giaman: Ol Witnes Bilong Jehova i no selebretim Ista bikos ol i no Kristen.

 Tok tru: Mipela i bilip olsem Jisas Krais em Seivia bilong mipela, na mipela i traim bes long “bihainim gut lek mak bilong em.”—1 Pita 2:21; Luk 2:11.

 Tok giaman: Yupela i no bilip olsem Jisas i bin kirap bek long matmat.

 Tok tru: Mipela i bilip olsem Jisas i bin kirap bek; mipela i luksave olsem dispela em wanpela bikpela tok insait long bilip Kristen na mipela i save autim dispela tok long ol man.—1 Korin 15:3, 4, 12-15.

 Tok giaman: Yupela i no tingim ol pikinini bilong yupela bikos ol i no kisim amamas bilong Ista holide.

 Tok tru: Mipela i laikim ol pikinini bilong mipela—mipela i wok strong long trenim ol na helpim ol long i stap amamas.—Taitus 2:4.

•   Baibel i no mekim wanpela tok bilong sapotim selebresen bilong Ista holide.

•   Jisas i tok yumi mas tingim dai bilong em, na em i no tokim yumi long tingim kirap bek bilong em, nogat. Long olgeta yia, mipela i save mekim Memorial bilong tingim dai bilong em, na mipela i mekim long wankain de stret olsem kalenda bilong Baibel i makim.—Luk 22:19, 20.

•   Mipela i bilip olsem ol kastam bilong Ista i kam long ol kastam bilong pasin sem long bipo tru, olsem na God i no orait long bung bilong Ista. God i laik bai yumi “mas lotu long [em] wanpela tasol,” na em i save bel hevi taim ol man i mekim lotu na ol i bihainim ol pasin em God i no orait long en.—Kisim Bek 20:5; 1 King 18:21.

 Mipela i mekim disisen long no ken selebretim Ista, na mipela i bilip olsem dispela disisen i stret wantaim tok bilong Baibel. Na Baibel i kirapim yumi long yusim “savetingting na pasin bilong wokim gut tingting,” na no ken bihainim nating ol kastam bilong ol man. (Provep 3:21; Matyu 15:3) Taim ol manmeri yet i askim, mipela i save tokim ol long bilip bilong mipela long sait bilong Ista, tasol mipela i rispektim raits bilong olgeta wan wan man long mekim disisen long samting ol i laik mekim.—1 Pita 3:15.