Askim Bilong Ol Rida
Husat em dispela “meri” Aisaia 60:1 i stori long en, na hau em i “kirap” na “kamapim lait”?
Aisaia 60:1 i tok: “Kirap, O meri, kamapim lait, long wanem, lait bilong yu i kam pinis. Glori bilong Jehova i sain antap long yu.” Ol tok i stap paslain na bihain i soim olsem dispela “meri” i makim Saion, o Jerusalem, em biktaun bilong Juda long dispela taim. (Ais. 60:14; 62:1, 2) Dispela biktaun i makim lain Israel olgeta. Tok bilong Aisaia i kamapim tupela askim: Namba 1, wanem taim Jerusalem i “kirap” na kamapim lait bilong bilip, na hau dispela samting i kamap? Namba 2, yu ting bikpela hap bilong tok profet bilong Aisaia i kamap tru long taim bilong yumi?
Wanem taim Jerusalem i “kirap” na kamapim lait bilong bilip, na hau dispela samting i kamap? Jerusalem na tempel bilong en i bagarap i stap taim ol Juda i stap kalabus long Babilon inap 70 yia. Tasol bihain long ol Midia na ol Persia i daunim Babilon, ol Israel i stap long olgeta hap bilong kantri Babilon i stap fri long i go bek long asples bilong ol na kirapim gen lotu i tru. (Esr. 1:1-4) Kirap long 537 B.C.E., liklik lain bilong 12-pela traib em ol i stap gut long God, ol i go bek. (Ais. 60:4) Ol i kirap long mekim ol ofa i go long Jehova, mekim ol bikpela bung, na ol i sanapim gen tempel. (Esr. 3:1-4, 7-11; 6:16-22) Long dispela taim gen, glori bilong Jehova i sain antap long Jerusalem, em ol manmeri bilong Em. Na ol i stap olsem lait i sain long ol manmeri bilong ol narapela kantri em ol i stap long tudak long sait bilong bilip.
Tasol liklik hap truim bilong tok profet bilong Aisaia i kamap long Jerusalem bilong bipo. Planti manmeri long lain Israel i no wok yet long bihainim tok bilong God. (Neh. 13:27; Mal. 1:6-8; 2:13, 14; Mat. 15:7-9) Bihain ol i sakim tu Mesaia, em Jisas Krais. (Mat. 27:1, 2) Na long 70 C.E., em namba tu taim Jerusalem na tempel bilong en i bagarap.
Jehova i bin tok profet olsem dispela samting bai kamap. (Dan. 9:24-27) I klia tru olsem, em i no laik bilong God olsem Jerusalem bilong graun bai inapim olgeta hap bilong dispela tok profet i stap long Aisaia sapta 60.
Yu ting bikpela truim bilong tok profet bilong Aisaia i kamap long taim bilong yumi? Yes, tasol truim bilong en i kamap long narapela meri em Baibel i tok piksa long em olsem “Jerusalem bilong antap.” Aposel Pol i tok long dispela meri olsem: “Em i mama bilong yumi.” (Gal. 4:26) Jerusalem bilong antap i makim oganaisesen bilong God long heven, em ol gutpela ensel bilong em i stap long en. Ol pikinini bilong em i makim Jisas na lain 144,000 em God i bin makim ol long holi spirit, na wankain olsem Pol, ol i bilip na wet long kisim laip long heven. Ol Kristen God i bin makim, ol i “wanpela lain holi,” em “lain Israel bilong God.”—1 Pita 2:9; Gal. 6:16.
Olsem wanem Jerusalem bilong antap i “kirap” na “kamapim lait”? Em i mekim olsem long rot bilong ol pikinini bilong em hia long graun em God i bin makim. Lukim olsem wanem ol samting i bin painim ol i wankain long tok profet i stap long Aisaia sapta 60.
Ol Kristen em God i bin makim, ol i mas “kirap” bikos ol i stap long tudak long sait bilong bilip taim pasin apostet i kamap bikpela bihain long ol aposel i dai. (Mat. 13:37-43) Long dispela taim, ol i stap kalabus long Bikpela Babilon em olgeta lotu giaman. Ol Kristen em God i bin makim, ol i stap kalabus long Bikpela Babilon i go inap long “pinis bilong dispela taim,” dispela taim i bin kirap long yia 1914. (Mat. 13:39, 40) Bihain long en long 1919, ol i lusim kalabus na wantu ol i kirap long kamapim lait long sait bilong bilip long rot bilong givim bel tru long autim tok. a Insait long ol yia i go pinis, ol manmeri bilong olgeta kantri i kam long dispela lait, dispela i makim tu hap lain bilong lain Israel bilong God em ol i stap yet long graun, em Aisaia 60:3 i kolim ol olsem “ol king.”—Rev. 5:9, 10.
Long bihain, ol Kristen em God i bin makim, ol bai kamapim lait i kam long God long wanpela rot i gutpela moa. Hau ol bai mekim olsem? Taim ol i pinisim wok bilong ol hia long graun, ol bai kamap hap bilong “Nupela Jerusalem,” o meri bilong Krais, em lain 144,000 na ol bai mekim wok king na pris wantaim em.—Rev. 14:1; 21:1, 2, 24; 22:3-5.
Nupela Jerusalem bai mekim bikpela wok long inapim tok profet i stap long Aisaia 60:1. (Skelim Aisaia 60:1, 3, 5, 11, 19, 20 wantaim Revelesen 21:2, 9-11, 22-26.) Jerusalem long graun i bin stap olsem senta bilong gavman bilong Israel bilong bipo, olsem tasol Nupela Jerusalem na Krais bai stap olsem gavman bilong nupela taim. Olsem wanem Nupela Jerusalem “i stap wantaim God na i lusim heven na i kam daun”? Em i mekim olsem long rot bilong mekim sampela samting long ol manmeri bilong graun. Ol manmeri bilong olgeta kantri em ol i stap gut long God, ol “bai wokabaut long lait bilong en.” Na tu, ol bai lusim kalabus bilong sin na dai. (Rev. 21:3, 4, 24) Gutpela samting bai kamap em olsem em bai “stretim bek olgeta samting,” olsem profet Aisaia na ol narapela profet i bin tokaut long en. (Apo. 3:21) Dispela bikpela wok bilong stretim bek olgeta samting i kirap taim Krais i kamap King na em bai pinis long pinis bilong Wan Tausen Yia Bilong Krais i Stap King.
a Esekiel 37:1-14 na Revelesen 11:7-12 i stori tu long wok bilong stretim bek lotu i tru we i bin kamap long 1919. Olgeta Kristen em God i anointim, ol i stap kalabus long sait bilong bilip inap longpela haptaim tru, tasol Esekiel i tok profet olsem ol bai kamap fri gen. Tok profet i stap long Buk Revelesen i makim liklik grup bilong ol brata em God i anointim na ol i go pas long wok. Ol birua i bin stopim ol long mekim wok taim ol i kalabusim ol inap sotpela haptaim. Long 1919, God i makim ol long mekim wok olsem “gutpela wokboi i gat savetingting.”—Mat. 24:45; lukim Pure Worship of Jehovah—Restored At Last!, p. 118.
