Ol manmeri i save bihainim stretpela pasin i save long wanem pasin i stret na i no stret. Filings ol i gat long wanpela taim i no stiaim stretpela pasin bilong ol. Ol stretpela stiatok i save stiaim ol pasin ol i mekim—maski ol narapela i no lukim.

Ol pikinini i save harim kain kain tok giaman long stretpela pasin, ating long ol wanskul bilong ol, ol musik ol i harim, o ol muvi na ol TV program em ol i watsim. Ol dispela tok inap mekim na ol i gat askim long wanem pasin i stret na i no stret.

Dispela i save kamap moa yet long taim ol i tineja. Long dispela haptaim, buk Beyond the Big Talk, i tok: Ol “i mas save olsem ol wanlain na ol samting i kamap long TV na redio samting bai givim presa long ol olsem ol narapela i mas save na laikim ol, na ol i mas lain long mekim ol disisen i stret wantaim ol samting ol i tingim olsem i bikpela samting na em samting ol i laik mekim, maski ol pren bilong ol i no laikim.” Em i klia tru, ol pikinini i mas kisim trening paslain long ol i tineja.

Skulim ol long stretpela pasin.

STIATOK BILONG BAIBEL: “Ol man i bikpela pinis . . . i bin yusim save bilong ol planti taim long skelim . . . wanem samting i stret na wanem samting i no stret.”—Hibru 5:14.

• Strongim pasin bilong mekim stretpela tok. Kolim ol samting i kamap long wan wan de na kamapim klia: “Em i tru; em i no tru.” “Em i stap gut; em i no stap gut.” “Em i gutpela; em i no gutpela.” I no longtaim, pikinini bilong yu bai save long wanem pasin i stret na i no stret long mekim.

• Eksplenim risen bilong ol stretpela pasin yu mekim. Olsem, givim ol askim olsem: Wai na i gutpela long mekim onest pasin? Hau na tok giaman inap bagarapim pasin pren? Wai na i no stret long stil? Stori gut na bai pikinini i kisim gutpela maus bilong bel na em inap save long pasin i stret na i no stret.

• Kamapim klia hau stretpela pasin inap helpim em. Yu ken tok: “Sapos yu onest, ol narapela bai trastim yu” o “Sapos yu mekim gutpela pasin, ol narapela bai laik long stap wantaim yu.”

Strongim pasin bilong bihainim stretpela pasin olsem mak bilong famili.

STIATOK BILONG BAIBEL: “Oltaim yupela i mas skelim yupela yet na bai yupela i ken save olsem yupela i wanem kain man.”—2 Korin 13:5.

• Stretpela pasin bilong yu i mas stap olsem mak bilong famili bilong yu, na bai yu inap tok:

  •  “Famili bilong mipela i no save tok giaman.”

  • “Mipela i no save paitim ol narapela o singaut long ol.”

  • “Mipela i no save mekim tok i bagarapim narapela.”

Pikinini bilong yu bai save olsem ol stretpela pasin i no ol lo tasol ol i mas bihainim, nogat, em stap olsem mak bilong famili.

• Oltaim stori wantaim pikinini long ol samting i bikpela samting long famili. Yusim ol samting i kamap long wan wan de olsem eksampel long skulim pikinini. Yu ken skelim ol samting i bikpela samting long yu wantaim ol samting i kamap long TV na redio samting, o long skul. Givim ol kain askim long pikinini: “Yu bai mekim wanem?” “Famili bilong yumi bai mekim wanem long dispela?”

Strongim ol long bihainim stretpela pasin.

STIATOK BILONG BAIBEL: “Oltaim maus bilong bel bilong yupela i mas i stap stret long ai bilong God.”—1 Pita 3:16.

• Tok amamas long gutpela pasin ol i mekim. Sapos pikinini bilong yu i soim stretpela pasin long samting em i mekim, tok amamas na eksplenim risen bilong yu. Olsem, yu ken tok: “Yu bin onest. Mi amamas long yu.” Sapos pikinini i tokaut olsem em i mekim wanpela pasin i no stret, tok amamas long em i onest paslain long yu stretim em.

• Stretim ol pasin i no stret. Helpim pikinini long luksave olsem em i mas karim hevi long pasin em i mekim. Ol pikinini i mas save long wanem pasin i no stret ol i mekim na hau dispela i narapela kain long samting famili i ting i bikpela samting. Sampela papamama i no laik tokim pikinini long pasin i no stret em i mekim bikos ol i no laik em i bel hevi, tasol taim yu stori wantaim pikinini bilong yu, dispela bai helpim em long kisim maus bilong bel we inap skelim wanem pasin i stret na i no stret.