Ol narapela inap trastim man bilong mekim gut wok. Ol i save mekim gut wok ol i kisim na pinisim long taim stret.

Pikinini inap lain long mekim gut wok, maski em i liklik yet. Buk Parenting Without Borders i tok: “Laik bilong pikinini long helpim long mekim samting i kirap long taim em i gat fiftin mun, na em i redi long mekim samting ol i tokim em long taim em i gat eitin mun. Long planti kalsa ol papamama i kirap long skulim pikinini long dispela taim em i redi long helpim, moa yet long taim pikinini i gat faiv i go seven krismas, na ol dispela liklik pikinini i mekim gut ol wok bilong haus.”

Long sampela ples, planti yangpela i lusim haus na i go stap ol yet, tasol ol i bungim hevi na kam bek long Mama na Papa. Sampela taim, dispela i kamap bikos ol yangpela i no lain long lukautim mani, lukautim haus, o mekim ol wok bilong wan wan de.

Olsem na em i bikpela samting long trenim pikinini long ol samting em bai mekim taim em i kamap bikpela. Buk How to Raise an Adult i tok: “Yu no laik mekim olgeta samting bilong ol i go inap long taim ol i eitin na bihain yu lusim ol i go stap ol yet.”

Givim wok.

STIATOK BILONG BAIBEL: “Taim man i wok hat long olgeta kain wok, em bai kisim gutpela samting.”—Provep 14:23.

Ol liklik pikinini i redi long wok wantaim ol papamama bilong ol. Long dispela taim we pikinini yet i redi long wok, yu ken givim sampela wok bilong haus long em.

Sampela papamama i no laik mekim olsem. Ol i ting ol pikinini bilong ol i stap long skul na ol i gat planti homwok long wan wan de, so wai givim wok long ol?

Tasol ol pikinini husat i save wok long haus ating ol i mekim gut long skul, ol wok i skulim ol long kisim ol asainmen na pinisim. Buk Parenting Without Borders i tok: “Taim ol pikinini i redi long helpim, tasol yumi no larim ol i mekim olsem orait taim ol i bikpela liklik, ol bai ting em i no bikpela samting long helpim ol narapela . . . Na tu, ol bai tingim olsem ol narapela i mas mekim wok bilong ol.”

 Olsem tok bilong dispela buk i kamapim, pasin bilong mekim wok bai trenim pikinini long helpim ol narapela na i no tingim ol yet. Pasin bilong mekim wok i helpim pikinini long luksave olsem em i gat wok insait long famili—na em i mas mekim gut.

Helpim pikinini long luksave long ol hevi inap kamap taim em i popaia.

STIATOK BILONG BAIBEL: “Putim yau long gutpela tok kaunsel na kisim tok bilong skulim yu, na long dispela rot, yu bai kamap man i gat savetingting long bihain.”—Provep 19:20.

Taim ol pikinini bilong yu i popaia—olsem, sapos pikinini i no min na bagarapim samting bilong narapela—abrusim pasin bilong haitim samting i kamap. Ol pikinini i mas lain long karim hevi long popaia bilong ol—long dispela eksampel, tok sori na ating bekim samting i bagarap.

Pasin bilong tokaut long ol popaia bai skulim pikinini

• long onest na tokaut long popaia bilong ol

• long i no sutim tok long ol narapela

• long no ken givim eskius

• long tok sori, taim i stret long mekim