Ol man i gat pasin daun i gat pasin rispek. Ol i no gat pasin antap, na ol i no ekspektim ol narapela long tingim olsem ol i spesel. Man i gat pasin daun i save tingim tru ol narapela na em i redi long kisim skul long ol.

Sampela i ting olsem man i gat pasin daun em i no gat strong. Tasol tru tru, em strong we i helpim man long luksave long rong bilong em na tokaut olsem em i no inap mekim olgeta samting.

• Pasin daun i save strongim pasin pren. Buk The Narcissism Epidemic, i tok: “Ol man i gat pasin daun inap kamap pren bilong ol narapela kwiktaim.” Na tu, em i tok ol dispela kain man “i no hatwok long toktok na bung wantaim ol narapela.”

• Pasin daun bai helpim pikinini bilong yu long bihain. Taim pikinini i lain long kisim pasin daun dispela bai helpim em long nau na bihain—olsem, long taim em i laik painim wok mani. Saveman Leonard Sax, i tok: “Yangpela husat i tingim em yet na i no luksave long ol samting em i no inap mekim, em i no inap mekim gut long intaviu bilong em, tasol yangpela husat i laik tru long harim wanem tok man bilong givim wok bai mekim em inap kisim wok.” *

Helpim pikinini long no ken tingim em yet.

STIATOK BILONG BAIBEL: “Sapos man i ting em i gat nem, tasol tru tru em i no gat nem, orait em i giamanim em yet.”—Galesia 6:3.

• Abrusim ol tok i no tru. Ol tok olsem “Olgeta driman bilong yu bai kamap tru” na “Yu inap kamap wanem kain man o meri em yu laikim,” dispela inap strongim em, tasol planti taim dispela samting i no kamap tru. Ol pikinini bilong yu inap kamap gutpela man na meri sapos ol i putim ol mak i stret long ol na ol i wok strong long winim.

• Kolim stret na tok amamas. Taim yu tokim pikinini “gutpela,” tasol yu no kolim stret samting em i mekim, dispela i no helpim em long kisim pasin daun.

• Putim mak bilong pikinini long yusim sosel midia. Planti taim sosel midia i kirapim man long givim biknem long em yet—tokaut long save na ol gutpela samting wanpela i mekim—dispela i no wankain long pasin daun.

• Larim pikinini bilong yu i mekim ol wok long haus. Taim yu no larim pikinini i mekim ol wok long haus em inap kisim tingting olsem, ‘Yu spesel moa long mekim kain wok!’ Ol wok bilong famili i mas stap fes na pilai seken. Kamapim klia hau ol wok long haus i helpim ol narapela na hau ol narapela bai tenkyu na rispektim em.

• Kamapim klia olsem i gutpela long helpim ol narapela. Taim pikinini i mekim olsem dispela em nambawan rot long helpim em long kamap man i bikpela pinis. Olsem na helpim pikinini bilong yu long luksave long ol man i nidim helpim. Stori wantaim em long samting em inap mekim bilong helpim ol. Tok amamas na sapotim em taim em i helpim ol narapela.