Balongwe balakonzya kutugwasya kupona buumi bukkomanisya. Balongwe bali kabotu balagwasyanya kucita zibotu alimwi akugwasya beenzinyina kuba bantu bali kabotu.—Tusimpi 27:17.

 Nokuba boobo, Bbaibbele lilakankaizya mbociyandika kusala kabotu balongwe. Alimwi lilatucenjezya kujatikizya zintu zibi zikonzya kucitika ikuti twasala balongwe batali kabotu. (Tusimpi 13:20; 1 Bakorinto 15:33) Balongwe bali boobo balakonzya kupa kuti katutasali kabotu zintu naa kunyonganya bukkale bubotu mbotujisi.

Mucibalo eeci tulalanga-langa makani aatobela

•  Ncinzi cipa kuti muntu abe mulongwe uuli kabotu?

•  Ino nzikozyanyo nzi izili mu Bbaibbele zyabalongwe bali kabotu?

•  Sena muntu ulakonzya kuba mulongwe wa Leza?

•  Tupango twamu Bbaibbele tujatikizya balongwe

 Bbaibbele liyiisya kuti zilongwe zili kabotu taziyeeme buyo akukkomanina zintu zikozyenye. Mucikozyanyo, Intembauzyo 119:63 yaamba kuti: “Ndimweenzinyina wabaabo boonse ibakuyoowa awabaabo a batobela milazyo yako.” Amubone kuti mulembi wanyimbo eeyi wakaamba kuti wakasala balongwe ibamuyoowa Leza alimwi ibapona kweelana azyeelelo zyakwe.

 Alimwi Bbaibbele lilatwaambila bube mbwayelede kuba ambubo mulongwe uuli kabotu. Mucikozyanyo:

•   “Mulongwe mwini-mwini ulatondezya luyando ciindi coonse, alimwi ngomunyoko wakazyalilwa kuti akugwasye muziindi zyamapenzi.”—Tusimpi 17:17.

•   “Kuli balongwe bageme kuzazaulana, pele kuli mulongwe uukakatila kwiinda mwanookwanu.”—Tusimpi 18:24.

 Tupango ootu tuyiisya kuti mulongwe uuli kabotu ulasyomeka, ngusiluyando, ngusiluzyalo, alimwi mwaabi. Mulongwe mwini-mwini muntu ngotukonzya kusyoma kuti ulatugwasya ciindi notujisi mapenzi. Kunze lyaboobo, mulongwe mwini-mwini tayoowi kutwaambila kuti twatalika kucita zintu zitali kabotu naa tuyanda kusala cintu citali kabotu.—Tusimpi 27:6, 9.

 Bbaibbele lilijisi zikozyanyo zyabalongwe ibakali kumvwana pele bakaindene ziimo, nkobazwa, zilengwa alimwi anguzu zyabweendelezi. Amubone zikozyanyo zyotatwe.

•   Rute a Naomi. Rute wakali mukamwana wa Naomi, alimwi kweelede kuti Naomi wakali amyaka minji kapati kwiinda Rute. Kuyungizya waawo, zilengwa zyakubusena nkwaakakomenena Rute zyakaliindene kapati azyakubusena nkwaakazwa Naomi. Nokuba kuti kwakali kwiindana ooku, bakapanga cilongwe ciyumu alimwi cakayeeme aluyando.—Rute 1:16.

•   Davida a Jonatani. Nokuba kuti kulibonya kuti Jonatani wakali mupati kwiinda Davida amyaka iinda ku 30, Bbaibbele lyaamba kuti “bakamvwana kapati.”—1 Samuele 18:1.

•   Jesu abaapostolo bakwe. Jesu wakali kubeendelezya baapostolo bakwe nkaambo wakali mwiiyi asimalelaabo. (Johane 13:13) Pele taakali kubabona kuti tabakonzyi kuba balongwe bakwe. Muciindi caboobo, wakali kubayanda kapati aabo ibakali kutobela nzyaakali kuyiisya. Wakaamba kuti: “Ndimwaamba kuti muli beenzuma, nkaambo ndamuzyibya zintu zyoonse nzindakamvwa kuli Taata.”—Johane 15:14, 15.

 Inzya, cilakonzyeka kubantu kuba balongwe ba Leza. Bbaibbele lyaamba kuti: “Balulami mbabajisi cilongwe ciyumu anguwe.” (Tusimpi 3:32) Eeci caamba kuti bantu Leza mbasala kuba balongwe bakwe mbaabo ibasolekesya kuba abulemu, kusyomeka, alimwi akupona kweelana azyeelelo zyakwe kujatikizya ciluzi acitaluzi. Mucikozyanyo, mwaalumi uusyomeka Abrahamu ulaambwa cacigaminina mu Magwalo kuti mulongwe wa Leza.—2 Makani 20:7; Isaya 41:8; Jakobo 2:23.