Ba United Nations Secretary-General ba António Guterres bakaamba boobu kujatikizya cakacitika mu Mujibelo, April 13, 2024, Iran noyakalwana Israel: “Ecino nciindi cakucesya-cesya bukali. Ecino nciindi cakulilesya cakumaninina.

 Nkondo iili ku Middle East ncikozyanyo buyo comwe cankondo zinji zili mukucitika munyika yoonse.

 “Calino kuli nkondo zinji zili mukucitika munyika kwiinda zyaliko kuzwa lya Nkondo Yabili ya Nyika Yoonse, alimwi zilajatikizya bantu basika ku 2 bbiliyoni, nkokuti muntu omwe akati kabantu bone.”​—United Nations Security Council, January 26, 2023.

 Masena aajatikizyidwe ankondo abikkilizya cisi ca Israel, Gaza, Syria, Azerbaijan, Ukraine, Sudan, Ethiopia, Niger, Myanmar, alimwi a Haiti. a

 Ino ndilili nkondo noiyoomana? Sena baleli bamunyika balakonzya kuleta luumuno? Ino Bbaibbele lyaamba nzi?

 Mazwanga aali mukucitika nyika yoonse atondezya kuti lino-lino nkondo zyoonse zilamana. Nkondo eezyi zizuzikizya businsimi bwamu Bbaibbele bujatikizya ciindi ncotupona. Bbaibbele lyaamba ciindi eeci kuti “mamanino aabweende bwazintu.”​—Matayo 24:3.

•   “Muyoomvwa nkondo mumasena aalaafwaafwi alimwi amasena aali kule. . . . Cisi ciyoobukila cisinyina abwami buyoobukila bwaminyina.”​—Matayo 24:6, 7.

 Amubale cibalo cakuti “Ino Citondezyo ‘Camazuba Aamamanino,’ naa ‘Ciindi Camamanino’ Ninzi?” kutegwa mubone nkondo izili mukucitika lino mbozizuzikizya businsimi bwamu Bbaibbele.

 Bbaibbele lilasinsima kujatikizya kumana kwankondo akati kabantu. Ino eeci ciyoocitika buti? Tacikacitiki kwiinda munguzu zyabantu, pele kwiinda munkondo ya Amagedoni, nkokuti “nkondo yabuzuba bupati bwa Leza Singuzuzyoonse.” (Ciyubunuzyo 16:14, 16) Yaakumana nkondo eeyi, Leza uyoozuzikizya cisyomezyo cakwe cakubaletela luumuno lutakamani bantu.​—Intembauzyo 37:10, 11, 29.

 Kutegwa mwiiye zinji kujatikizya nkondo ya Leza iiyoomana nkondo zyoonse, amubale cibalo cakuti “Ino Nkondo ya Amagedoni Ninzi?”