Ciindi nomumvwa majwi aakuti, “Mamanino alaafwaafwi!” ino ncinzi ciboola mumizeezo yanu? Sena inga muyeeya mukambausi uuciindizya, uupasauka kwaambaula akutambaika maanza, iwiimvwi kumbele lyabantu kajisi Bbaibbele mumaanza? Naa sena inga muyeeya mudaala uulaacilezu cilamfwu wiimvwi mumbali aanzila kasamide cijansi cilamfwu kaangide alutambo mucibuno, kajisi acikwankwani icijisi mulumbe uuyoosya? Ikuyeeyela bukkale buli boobu kulakonzya kupa bamwi kulibilika, alimwi bamwi balakonzya kudooneka nokuba kucibona mbuli kuti ncintu cisesya buyo.

Bbaibbele lyaamba kuti: “Mamanino ayoosika.” (Matayo 24:14) Mamanino aaya alimwi aambwa kuti “buzuba bupati bwa Leza” alimwi akuti “Amagedoni.” (Ciyubunuzyo 16:14, 16) Bwini mbwakuti, kuli mizeezo minji iindene-indene muzikombelo kujatikizya makani aaya, iigambya alimwi iiyoosya. Pele Bbaibbele kuligama lilaamba cakusalazya kujatikizya mamanino—lilaamba mamanino ncaamba alimwi ancaataambi. Alimwi Jwi lya Leza lilatugwasya kubona naa mamanino alaafwaafwi ncobeni. Ciinda kubota ncakuti, lilatwaambila mbotukonzya kufwutuka! Pele cakusaanguna, atusalazye twaambo tumwi ntobayeeyela bantu alimwi akujana bupanduluzi bwamasimpe. Ino mubwini mamanino aamba nzi kweelana ancolyaamba Bbaibbele?

1. MAMANINO TALILI BBIBI LYAMULILO LIBAMBILIDWE KUNYONYOONA NYIKA PE.

   Bbaibbele lyaamba kuti: “[Leza] wakkazikizya nyika antalisyo zyanjiyo ziyumu; kunyina noiyoogwisyigwa abusena bwanjiyo lyoonse alyoonse, mane kukabe kutamani.” (Intembauzyo 104:5) Lugwalo oolu alimwi amagwalo aambi atusyomezya kuti Leza takainyonyooni nyika naa kuzumizya kuti inyonyoonwe pe!—Mukambausi 1:4; Isaya 45:18.

2. MAMANINO TACILI CINTU CIYOOVWUNDUMUKA BUYO PE.

   Bbaibbele lyaamba kuti mamanino alijisi ciindi naayoosika—Leza wakabikka ciindi camamanino cigaminide. Tubala kuti: “Kujatikizya buzuba oobo naa ciindi, kunyina uuzyi pe, nobaba bangelo kujulu naba Mwana, pele buyo Taata. Amulangile, amupakamane, nkaambo tamuzyi ciindi cibikkidwe nociyoosika.” (Marko 13:32, 33) Cilasalala kuti, Leza (“Taata”) ulijisi ‘ciindi ncabikkide’ nayooleta mamanino.

3. MAMANINO TAAKATALISYIGWI ABANTU PE NAA ZINTU ZILOKA KUZWA MUJULU.

   Ino nguni uuyooleta mamanino? Lugwalo lwa Ciyubunuzyo 19:11 lwaamba kuti: “Ndakabona julu kalijalulwa, eelyo amubone kwakali bbiza lituba. Lino ooyo uutantide alindilyo wiitwa kuti Uusyomeka alimwi Wamasimpe.” Kapango 19 kalazumanana kwaamba kuti: “Lino ndakabona munyama abami bamunyika ampi zyabo zyabasikalumamba kababungene antoomwe kuti balwane yooyo uutantide bbiza alimwi ampi yakwe yabasikalumamba.” (Ciyubunuzyo 19:11-21) Nokuba kuti mwaambo uubelesyedwe aawa mwaambo wacikozyanyo, tulakonzya kuzyiba cini caambwa: Leza uyootuma nkamu yabangelo kuzoonyonyoona basinkondonyina.

1. MAMANINO AAMFWULUMENDE ZYABANTU.

   Bbaibbele lyaamba kuti: “Leza wakujulu uyoobikka bwami [mfwulumende] ibutakanyonyoonwi pe. Bwami oobo tabukapegwi kubantu bambi pe.  Buyoopwayaula akumanizya mami aaya oonse, mpoonya bwalo bulikke buyakwiima nji mane kukabe kutamani.” (Daniele 2:44) Mbubwenya mbokwaambwa kale mukaambo katatu, kuyooba kunyonyoonwa ‘kwabami bamunyika ampi zyabo,’ aabo ibayoojanika “kababungene antoomwe kuti balwane yooyo uutantide bbiza alimwi ampi yakwe yabasikalumamba.”—Ciyubunuzyo 19:19.

2. MAMANINO AANKONDO, BUGWEBENGA, ALIMWI AKUTALULAMA.

   “[Leza] ulamanizya nkondo munyika yoonse mboizulwa.” (Intembauzyo 46:9) “Baluleme balikke mbabayookkala munyika, alimwi aabo banyina kampenda mbabayoosyaala mulinjiyo. Pele babi bayoonyonyoonwa munyika, alimwi bampelenge bayoononkolwa mulinjiyo.” (Tusimpi 2:21, 22) “Amubone! Ndilengulula zintu zyoonse kuti zibe zipya.”—Ciyubunuzyo 21:4, 5.

3. MAMANINO AAZIKOMBELO ZISAMPAULA LEZA AKWEENA BANTU.

   “Basinsimi basinsima zyakubeja, abalo bapaizi badyaaminina bantu anguzu zyabo. . . . Pele ino ncinzi ncomuyoocita nywebo aakusika mamanino?” (Jeremiya 5:31) “Mubuzuba oobo, bantu banji bayoondaambila kuti: ‘Mwami, Mwami, sena tiitwakasinsima muzina lyako, kutanda madaimona muzina lyako akucita milimo mipati minji muzina lyako?’ Pele mebo ndiyoobaambila kuti: ‘Tiindakamuzyi pe! Amuzwe kulindime, nywebo nobasimucita zibi!’”—Mateyo 7:21-23.

4. MAMANINO AABANTU BATALISYA ALIMWI AKUSUMPULA BWEENDE BWAZINTU BWAMAZUBA AANO.

   Jesu Kristo wakaamba kuti: “Lino mpaawa mpoluyeeme lubeta: kuti mumuni wasika munyika, pele bantu bayanda mudima muciindi camumuni, nkaambo milimo yabo mibi.” (Johane 3:19) Ibbaibbele lilaamba kujatikizya lunyonyooko ilwakacitika munyika yoonse mumazuba aamwaalumi uusyomeka Nowa. “Inyika yakuciindi eciya yakanyonyoonwa noyakapaizyigwa maanzi aazambangulwe. Pele kujwi ndimunya eelyo majulu alimwi anyika ziliko lino zyabambilwa mulilo alimwi zyayobolwa kusikila mubuzuba bwalubeta abwalunyonyooko lwabantu basampaula Leza.”—2 Petro 3:5-7.

Amubone kuti kuboola ‘kwabuzuba bwalubeta abwalunyonyooko’ kwakozyanisyigwa akunyonyoonwa ‘kwanyika’ yakumazuba aa Nowa. Ino ninyika iili yakanyonyoonwa? Nyika eeyi mpotukkala tiiyakanyonyoonwa pe; pele “bantu basampaula Leza”—nkokuti basinkondonyina a Leza—‘mbibakanyonyoonwa.’ Mbubwenya buyo, “buzuba bwalubeta,” bwa Leza bwaakuboola, aabo ibasala kuba basinkondonyina a Leza bayoonyonyoonwa. Pele balongwe ba Leza bayoofwutulwa, mbubwenya Nowa mbwaakafwutulwa amukwasyi wakwe.—Mateyo 24:37-42.

Amuyeeyele buyo nyika eeyi mbwiiyooba ciindi Leza aakubagwisya boonse ibapa kuti kube bubi! Casalala kuti, ncolyaamba Bbaibbele kujatikizya mamanino, makani mabotu kutali mabi pe. Pele alimwi, mulakonzya kubuzya kuti: ‘Sena Bbaibbele lilaamba ciindi cini mamanino naayoosika? Sena alaafwaafwi? Ino inga ndafwutuka buti?’