Mibili yesu yakalengwa a Leza munzila yakuti kaicikonzya kuliponya. Ciindi mubili uuli kabotu nowatendwa acintu cimwi, ikukwambwa naa kuyaswa, “mubili ulacita zintu zimwi zigambya kutegwa zipone zilonda zisyoonto alimwi azipati.” (Johns Hopkins Medicine) Cakufwambaana mubili ulacita cintu cimwi kutegwa bulowa buleke kuzwa alimwi akupa kuti cilonda cipone.

AMULANGE-LANGE KAAMBO AAKA: Ikuti naa Mulengi wesu wakalenga mibili yesu kuti kaicikonzya kuponya zilonda, nkokuti tulakonzya kucisyoma cisyomezyo cakwe cakuti uyootugwasya kuziponya azyalo zintu zitupenzya mumizeezo yesu. Sintembauzyo wakalemba kuti: “Ulabaponya aabo batyompedwe mumoyo; alimwi ulaanga zilonda zyabo.” (Intembauzyo 147:3) Pele ikuti kamupenga mumizeezo akaambo kacintu cimwi cakacitika musyule naa icakacitika ino-ino, ino inga mwasinizya buti kuti Jehova ulakonzya kuziponya zilonda zyanu lino alimwi akumbele?

Leza usyomezya kuti: “Utayoowi pe, nkaambo ndilaanduwe. Utalibiliki pe, nkaambo ndime Leza wako. Ndilakuyumya, inzya ndilakugwasya.” (Isaya 41:10) Muntu uuzyi kuti Jehova ulamubikkila maano ulijisi luumuno lwamumizeezo alimwi anguzu zyakuliyumya mumasunko aaindene-indene. Mwaapostolo Paulo wakaamba kuliiba kwamumizeezo ooku kuti, ‘nduumuno lwa Leza oolo lwiinda maano oonse.’ Wakayungizya kuti: “Muzintu zyoonse ndilijisi nguzu kwiinda muli yooyo uundipa nguzu.”—Bafilipi 4:4-7, 9, 13.

Magwalo alatugwasya kuyumya lusyomo muzisyomezyo zya Jehova kujatikizya bantu. Mucikozyanyo, lugwalo lwa Ciyubunuzyo 21:4, 5 (ilwazubululwa apeeji iitobela) lutwaambila ncayoocita alimwi akaambo ncotukonzya kusyoma kuti uyoocicita:

• “Uyoosindula misozi yoonse” kumeso aabantu. Jehova uyakwaamana mapenzi oonse alimwi akulibilika, naaba mapenzi bamwi ngobakonzya kubona kuti masyoonto.

• ‘Kakkede acuuno cabwami’ mubulemu bwakujulu, Mwami Singuzuzyoonse iwakalenga zintu zyoonse uyoobelesya nguzu zyakwe kugwisya mapenzi alimwi akutupa lugwasyo ndotuyandika.

• Jehova usyomezya kuti zisyomezyo zyakwe ‘zilasyomeka alimwi nzyamasimpe.’ Eeci caamba kuti, akaambo kazina lyakwe alimwi ampuwo yakwe, Jehova uyoozizuzikizya zintu nzyaakasyomezya.

“‘Eelyo uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe. Zintu zyakaindi zyamana.’ Mpoonya ooyo uukkede acuuno cabwami wakati: “Amubone! Ndilengulula zintu zyoonse kuti zibe zipya.” Alimwi, waamba kuti: “Kolemba, nkaambo majwi aaya alasyomeka alimwi ngamasimpe.’”—Ciyubunuzyo 21:4, 5.

Zilenge alimwi a Bbaibbele zyoonse zilayubununa bube bwa Taateesu wakujulu. Nokuba kuti zilenge zilakonzya kutukulwaizya kuba balongwe ba Leza, Bbaibbele lilatutamba cacigaminina kuti tube balongwe bakwe ciindi nolyaamba kuti: “Amuswene kuli Leza, eelyo awalo ulaswena kulindinywe.” (Jakobo 4:8) Lugwalo lwa Milimo 17:27 lwaamba kuti: “Tali kulamfwu kuli umwi aumwi wesu.”

Mbomuyaabumuzyiba kabotu Leza, muyoosinizya ncobeni kuti “ulamubikkila maano.” (1 Petro 5:7) Ino mbubotu nzi mbotukonzya kujana akaambo kakusyoma Jehova munzila eeyi?

Amulange-lange makani aajatikizya ba Toru ibakkala ku Japan. Bakakomezyegwa abanyina Banakristo, pele balo bakazikunjila mukabunga kazigwebenga kategwa Japanese Mafia. Bakaamba kuti: “Ndakali kusyoma kuti Leza tanaakali kundiyanda, alimwi ndakali kulimvwa kuti kufwa kwabaabo bakali balongwe bangu, kwaambisya aabo mbondakali kuyandisya kapati, cakali cisubulo kulindime.” Ba Toru bakaamba kuti akaambo kakuba mubukkale buli boobu alimwi akuba amizeezo iili boobu, bakaba “muntu silunya alimwi uunyina luse.” Kujatikizya makanze ngobakajisi, bakaamba kuti: “Ndakali kuyanda kujaya muntu iwakajisi mpuwo kapati kwiinda ndime mpoonya akufwa kandicili mwana kutegwa ndilipangile zina.”

Nokuba boobo, ciindi ba Toru abakaintu babo ba Hannah nobakaiya Bbaibbele, ba Toru bakacinca  kapati mubuumi bwabo alimwi ambobakali kuyeeya. Ba Hannah bakaamba kuti: “Ndakalibonena balumi bangu kabayaabucinca.” Lino, ba Toru balaamba kakunyina kudooneka kuti: “Nkwali Leza uutubikkila maano toonse umwi aumwi kumugama. Tayandi kuti muntu uuli woonse afwe, alimwi ulilibambilide kulekelela baabo beempwa kuzwa aansi amoyo. Ulaswiilila zintu nzyotumwaambila zyalo nzyotutakonzyi kwaambila muntu uumbi alimwi nzyatakonzyi kumvwisya muntu uuli woonse. Ino-ino, Jehova uyakwaamana mapenzi alimwi amacise oonse. Noliba lino ulatugwasya munzila nzyotutayeeyeli. Ulatuyanda alimwi ulatugwasya ciindi notuli mumapenzi.”—Intembauzyo 136:23.

Kweelana acakuluula caba Toru mbocitondezya, ikuzyiba kuti Leza ulakonzya alimwi akuti ino-ino uyakwaamana mapenzi oonse akusindula misozi yoonse kumeso takutupi buyo bulangizi bwakumbele pele alimwi kulatugwasya kupona buumi bubotu noliba lino. Inzya, nomuba munyika iizwide kupenga, mulakonzya kugwasyigwa aluyando lwa Leza.