SICIKULUKULU waku Australia uutegwa thorny devil (Moloch horridus) ulabweza mudumu kuzwa kuli sikunku alimwi amusenga mutete. Mpoonya ulatola maanzi kumulomo wakwe kutegwa anywe. Ino eeci cicitika buti? Nkwiinda mulukanda lwakwe lugambya.

Amulange-lange cicitika: Lukanda lwa sicikulukulu ooyu lulijisi makwa. Basayaansi bamwi bayeeya kuti mudumu uuteekela amakwa ulakunka akunjila mutuzila naa mutusena itutasinkide ituli akati kamakwa mpaaswaanganina. Ituzila ootu tutola maanzi mumabali aamulomo wasicikulukulu.

Pele mbuti sicikulukulu mbwakwela maanzi kuzwa kumaulu akweenda mumubili wakwe kusika kumulomo kakunyina kunyonganizyigwa anguzu zikwelela ansi zitegwa gravity? Alimwi mbuti sicikulukulu mbwabweza mudumu kuzintu zitete kwiinda mukucumba bula bwakwe kuzintu eezyo?

Basikuvwuntauzya bakayubununa cini ncacita sicikulukulu. Ituzila ituli alukanda tuliswaangene atupaipi alimwi atuzila tumwi ituli kunsi mulukanda lwasicikulukulu. Mbotubambidwe ituzila ootu tupa kuti maanzi kaakkwela mutuzila ituniini kakunyina kunyonganizyigwa anguzu zikwelela ansi zitegwa gravity. Aboobo, lukanda lwa sicikulukulu luli mbuli nsinsa.

Mupati-pati wacikolo ca Biomimicry Institute, Janine Benyus waamba kuti ikupanga mincini iibweza mudumu kulakonzya kugwasya basyaabupampu kupanga mincini iigusya mudumu mumuwo kutegwa mukati kamayake kakutontola alimwi akujana maanzi aakunywa.

Ino muyeeya buti? Sena lukanda ilubweza mudumu lwasicikulukulu lwakabako akaambo kakusanduka naa lwakalengwa buya?