Matayo 20:1-34
20 “Nkaambo Bwami bwakujulu buli mbuli mwiniŋanda iwakaunka mafwumofwumo kuyoonjizya bantu mulimo wakubeleka mumuunda wakwe wamisaansa.+
2 Naakazuminana ababelesi kuti abavwozye aumwi dinari* lyomwe abuzuba, wakabatuma mumuunda wakwe wamisaansa.
3 Naakaunka alimwi aciindi cawoola lyatatu,* wakabona bamwi baliimvwi kumusika kabatakwe zyakucita;
4 eelyo kuli baabo wakati, ‘Anywebo kamuya mumuunda wamisaansa, ndilamuvwozya kufwumbwa ceelede.’
5 Aboobo bakaunka. Alimwi wakaunka aciindi cawoola lyacisambomwe,* alimwi aawoola lyafwuka* akucita mbubonya oobo.
6 Mpoonya kumamanino, wakaunka aciindi cawoola lya 11 * akujana bamwi baile kwiimvwi, eelyo wakabaambila kuti, ‘Nkaambo nzi ncomwiimvwi aano buzuba boonse kamutabeleki?’
7 Bakavwiila kuti, ‘Nkaambo kunyina watunjizya mulimo.’ Wakabaambila kuti, ‘Anywebo kamuya mumuunda wamisaansa mukabeleke.’
8 “Nokwakaba kumangolezya, mwinimuunda wamisaansa wakaambila mubanzi wakwe kuti, ‘Kobaita babelesi ubavwozye mali aabo,+ utalikile kuli bamamanino, umanizye abakusaanguna.’
9 Nobakasika baalumi ibakatalika aciindi cawoola lya 11, umwi aumwi wabo wakavwola dinari* lyomwe.
10 Aboobo bakusaanguna nobakasika, bakayeeya kuti balapegwa mali manji, pele abalo bakavwozyegwa aumwi dinari* lyomwe.
11 Nobakalitambula, bakatalika kumutongooka simalelo mukamwini ŋanda
12 akwaamba kuti, ‘Baalumi aaba bamamanino babeleka buyo woola lyomwe; pele wabavwozya kweelana andiswe notwabeleka canguzu buzuba boonse akubalwa zuba!’
13 Pele wakaingula umwi wabo kuti, ‘Taaku ncindakulubizyila musa. Tee kayi twapangene kuti ulavwola dinari* lyomwe?+
14 Bweza dinari lyako weende. Ndiyanda kumupa awalo ooyu wamamanino mbubonya mbondapa nduwe.
15 Sena tandijisi nguzu zyakucita kufwumbwa ncendiyanda azintu zyangu? Sena wafwa munyono* akaambo kakuti ndili mubotu?’*+
16 Munzila eeyi, bakumamanino bayooba bakusaanguna, bakusaanguna bayooba bakumamanino.”+
17 Lino naakali kuya ku Jerusalemu, Jesu wakatola basikwiiya bakwe bali 12 kumbali eelyo kabali munzila wakabaambila kuti:+
18 “Amubone! Tuunka ku Jerusalemu, eelyo Mwanaamuntu uyakwaabwa kuli basilutwe babapaizi abalembi. Bayoomupa mulandu wakuti ajaigwe+
19 akumwaaba kubantu bamasi kuti bakamusampaule akumukwibbaula akumujaya aacisamu;+ mpoonya mubuzuba bwatatu uyoobusyigwa.”+
20 Mpoonya banyina babana ba Zebedayo+ bakaboola kulinguwe antoomwe abana babo, bakamufwugamina* akumulomba cimwi cintu.+
21 Wakababuzya kuti: “Ino muyanda nzi?” Bakamuvwiila kuti: “Kolailila kuti bana bangu aaba bobilo bakakkale umwi kujanza lyako lyalulyo uumbi kujanza lyako lyalumwensyi mu Bwami bwako.”+
22 Jesu wakavwiila kuti: “Tamucizyi ncomulomba. Sena mulakonzya kunywa nkapu njendiyanda kunywa?”+ Bakati kulinguwe: “Tulakonzya.”
23 Wakabaambila kuti: “Masimpe muyoonywa nkapu yangu,+ pele kujatikizya makani aakukkala kujanza lyangu lyalulyo alyalumwensyi tandili ndime ndisala pe, pele masena aaya ngabaabo mbaakabambila Taata.”+
24 Lino aaba bambi bali kkumi nobakaamvwa makani aaya, bakabanyemena ibabunyina bobilo aaba.+
25 Pele Jesu wakabaita akubaambila kuti: “Mulizyi kuti baleli bamasi balabadyaaminina bantu, alimwi abapati akati kabo balabeendelezya calunya.+
26 Oobu tabusyi mboceelede kuba akati kanu pe;+ pele kufwumbwa uuyanda kuba mupati akati kanu weelede kuba mubelesi wanu,+
27 alimwi kufwumbwa uuyanda kuba wakusaanguna akati kanu weelede kuba muzike wanu.+
28 Mbubonya Mwanaamuntu mbwaakaboola, ikutali kuzoobelekelwa, pele kuzoobeleka+ akupa buumi bwakwe kuti bube cinunuzyo cakununuzya banji.”+
29 Lino nobakali kuzwa mu Jeriko, nkamu mpati yabantu yakamutobela.
30 Eelyo baalumi boofwu bobilo ibakakkede mumbali aanzila bakamvwa kuti Jesu wakali kwiinda, mpoonya bakoongolola kuti: “Mwami, tufwide luse, O Mwana wa Davida!”+
31 Pele nkamu yabantu yakabakalalila akubaambila kuti baumune; pele balo bakoongololesya kabaamba kuti: “Akaka Mwami, kotufwida luse, O Mwana wa Davida!”
32 Aboobo Jesu wakaima, wabaita akwaamba kuti: “Ncinzi ncomuyanda kuti ndimucitile?”
33 Bakati kulinguwe: “Mwami, tuyanda kuti meso eesu ajaluke.”
34 Lino akaambo kakweetezyegwa, Jesu wakajata meso aabo,+ eelyo mpoonya aawo bakatalika kubona alimwi bakamutobela.
Bupanduluzi buyungizyidwe
^ Amubone Makani Aayungizyidwe B14.
^ Nkokuti, kuma 9 koloko yamafwumofwumo.
^ Nkokuti, kuma 12 koloko.
^ Nkokuti, kuma 3 koloko yakumazuba.
^ Nkokuti, kuma 5 koloko yakumazuba.
^ Amubone Makani Aayungizyidwe B14.
^ Amubone Makani Aayungizyidwe B14.
^ Amubone Makani Aayungizyidwe B14.
^ Mu Chigiriki, “liso lyako lilaamunyono; liso lyako ndibi.”
^ Naa “ndili mwaabi.”
^ Naa “bakamukotamina.”
