Matayo 10:1-42
10 Aboobo wakaita basikwiiya bakwe bali 12 akubapa nguzu zyakuzunda myuuya iisofweede,+ kutegwa bacikonzye kwiitanda akuponya malwazi aamisyobo yoonse.
2 Ngaaya mazina aabaapostolo bali 12 :+ Kuli Simoni, ooyo uutegwa Petro+ a Andreya+ imunyina; Jakobo mwana wa Zebedayo a Johane+ imunyina;
3 Filipo a Bartolomayo;+ Tomasi+ a Matayo+ simutelo; Jakobo mwana wa Alifayo; a Tadayo;
4 Simoni mu Kanana;* a Judasi Isikariote ooyo iwakamwaaba.+
5 Jesu wakabatuma aaba bali 12 akubapa malailile aaya:+ “Mutaunki kubantu bamasi, alimwi mutanjili mumunzi uuli woonse wabana Samariya;+
6 pele kamuya buyo kumbelele zisweekede zyaŋanda ya Israyeli.+
7 Nomuunka, kamuyaabukambauka kuti: ‘Bwami bwakujulu bwaswena afwaafwi.’+
8 Amuponye bantu baciswa,+ amubusye bafwide, amusalazye basicinsenda, amutande madaimona. Mwakapegwa kakunyina kubbadelesyegwa, amupe kakunyina kubbadelesya.
9 Mutabwezi ngolida noiba nsiliva nouba mukuba muzikwama zyanu zyamali,+
10 noiba nkomo yazilyo zyamulweendo, noziba zisani zyobilo,* noziba mpato, noiba nkoli,+ nkaambo similimo uleelede kupegwa zilyo.+
11 “Kufwumbwa mumunzi naa mukanzi momwanjila, amuyandaule muntu weelela akukkala oomo kusikila mukazwe.+
12 Nomunjila muŋanda, amubaanzye bali mumo.
13 Ikuti ŋanda eeyo kayeelela, luumuno lwanu alube alinjiyo;+ pele ikuti kaiteeleli, luumuno lwanu alupilukile kulindinywe.
14 Kufwumbwa ooko nkobatakamutambuli naa kuswiilila majwi aanu, mwaakuzwa muŋanda eeyo naa mumunzi ooyo, amukakunkumune lusuko kumaulu aanu.+
15 Ncobeni ndimwaambila kuti, mu Buzuba bwa Lubeta, cisubulo camunzi ooyo cinooli cipati kwiinda ca Sodoma a Gomora.+
16 “Amubone! Ndamutuma mbuli mbelele akati kabaumpe; aboobo amube bantu bacenjede mbuli nzoka, pele ibatajisi lweeno mbubonya mbuli nziba.+
17 Amukabacenjelele bantu, nkaambo bayoomutola kunkuta+ akumukwibbaula+ muzikombelo zyabo.+
18 Muyootolwa kubeendelezi abami+ akaambo kandime kuti bukabe bumboni kulimbabo akuli bamasi.+
19 Pele ciindi nobamutola, mutalibiliki kuti muyakwaamba buti naa muyakwaamba nzi, nkaambo nzyomweelede kwaamba muyoopegwa aciindi eeco;+
20 nkaambo tamuli ndinywe nomwaambaula, pele muuya wa Uso nguwaambaula kwiinda mulindinywe.+
21 Alimwi munyina uyakwaaba munyina kulufwu, ausyi uyakwaaba mwanaakwe, abana bayoobukila bazyali akubapa kuti bajaigwe.+
22 Alimwi muyoosulwa abantu boonse akaambo kazina lyangu,+ pele ooyo uuliyumya kusikila kumamanino uyoofwutulwa.+
23 Ciindi nobamupenzya mumunzi umwi, amutijile kuli umbi;+ nkaambo ncobeni ndimwaambila kuti, tamukamanizyi kuzinguluka minzi ya Israyeli katanasika Mwanaamuntu.
24 “Sikwiiya tali mupati kwiinda mwiiyi wakwe, amuzike tali mupati kwiinda simalelaakwe.+
25 Cileelede kuti sikwiiya abe mbuli mwiiyi wakwe, amuzike abe mbuli simalelaakwe.+ Ikuti bantu baita mwiniŋanda kuti Belezebule,*+ ino basiŋanda bakwe bayoobaita buti?
26 Aboobo mutabayoowi pe, nkaambo kunyina civwumbidwe citakavwumbulwi, acisisidwe citakazyibwi.+
27 Nzyondimwaambila mumudima, mukazyaambe mumumuni, anzyomwaambilwa cakupetekezya, mukazikambaukile aziluli zyamaanda.+
28 Alimwi mutabayoowi aabo bajaya mubili pele batakonzyi kujaya buumi;*+ pele kamuyoowa yooyo uukonzya kujaya buumi amubili mu Gehena.*+
29 Sena tutiiti tobilo tatusambalwi kakkobili* komwe kajisi mpindu nsyoonto? Nokuba boobo, kunyina nokaba komwe kayoowida ansi Uso katakonzyi kuzyiba.+
30 Pele naaba masusu aakumutwe wanu alibalidwe oonse.
31 Aboobo, mutayoowi pe; nywebo mulayandika kwiinda tutiiti tunji.+
32 “Lino kufwumbwa uundizumina kumbele lyabantu,+ andime ndiyoomuzumina kumbele lya Taata uuli kujulu.+
33 Pele kufwumbwa uundikaka kumbele lyabantu, andime ndiyoomukaka kumbele lya Taata uuli kujulu.+
34 Mutayeeyi kuti ndakaboola kuleta luumuno anyika; ndakaboola kuleta panga ikutali luumuno.+
35 Nkaambo ndakaboola kuleta lwaandaano akati kamwana musankwa abausyi, mwana musimbi abanyina, amukamwana abanyinazyala.+
36 Masimpe, basinkondo bamuntu bayooba bantu bamuŋanda yakwe mwini.
37 Kufwumbwa muntu uuyandisya bausyi naa banyina kwiinda ndime teelede kuba wangu; alimwi kufwumbwa muntu uuyandisya mwanaakwe musankwa naa musimbi kwiinda ndime teelede kuba wangu.+
38 Alimwi kufwumbwa muntu uutazumini kunyamuna cisamu cakwe cakupenzyezya* akunditobela, teelede kuba wangu.+
39 Kufwumbwa muntu uusola kufwutula buumi bwakwe uyoobusweekelwa, alimwi kufwumbwa muntu uusweekelwa buumi bwakwe akaambo kandime uyoobujana.+
40 “Kufwumbwa muntu uumutambula nywebo wanditambula andime, alimwi kufwumbwa muntu uunditambula mebo wamutambula ayooyo wakandituma.+
41 Kufwumbwa muntu uutambula musinsimi akaambo kakuti musinsimi, uyoopegwa bulumbu bwamusinsimi,+ alimwi kufwumbwa muntu uutambula muntu mululami akaambo kakuti mululami, uyoopegwa bulumbu bwamuntu mululami.
42 Alimwi kufwumbwa uupa nkapu yamaanzi aakunywa kuli umwi wabaniini aaba akaambo kakuti ngusikwiiya, ndimwaambila masimpe kuti, kunyina nayoosweekelwa bulumbu bwakwe pe.”+
Bupanduluzi buyungizyidwe
^ Naa “musungu.”
^ Naa “zisani zyakucinca.”
^ Izina libelesyegwa kwaamba Saatani, silutwe naa mweendelezi wamadaimona.
^ Nkokuti, bulangizi bwakupona alimwi.
^ Amubone Bupanduluzi Bwamabala.
^ Mu Chigiriki, “kaasariyoni.” Amubone Makani Aayungizyidwe B14.
^ Amubone Bupanduluzi Bwamabala.
