Ndikuwiya mumuzi wa Saxony, mucharu cho kali chadanikanga kuti German Democratic Republic (GDR). Panyumba pidu tayanjananga ndipu apapi ŵangu angundisambiza mijalidu yamampha. Pa nyengu iyi, boma lenga la Chikomyunizimu. Mwaviyo, ŵanthu anandi mumuzi wa Saxony ayanjanga cha kupemphera. Ndipu nani ndagomezganga kuti Chiuta kulivi. Kutuliya pa unamana wangu mpaka po ndingufikiya vyaka 18, ndachitanga vinthu vinyaki chifukwa chakugomezga kuti Chiuta kulivi kweniso ndawonanga kuti boma la Chikomyunizimu ndilu lamampha.

Ntchifukwa wuli ndawonanga kuti boma la Chikomyunizimu ndamampha? Venga viyo chifukwa ndagomezganga kuti ŵanthu wosi mbakuyanana. Kweniso ndagomezganga kuti vinthu vitenere kugaŵika mwakuyanana, chifukwa ivi vitovya kuti ŵanthu anyaki aleki kuŵa akukhupuka ukongwa pamwenga akavu ukongwa. Mwaviyo, ndingwamba kutangwanika ukongwa ndi gulu la achinyamata lo lalutisanga panthazi Chikomyunizimu. Ndati ndafika vyaka 14, ndingwamba kugwira ntchitu yakovya kuti chilengedu chileki kunangika. Tapanganga mapepala kutuliya ku mapepala ngo angagwirisiya ntchitu kali. Arara a mutawuni ya Aue anguwonga ukongwa chifukwa cha vo ndachitanga ndipu angundizomereza kuja zika. Chinanga kuti ndenga munamana, ndaziŵananga ndi andali anyaki akutchuka mucharu chidu. Ndawonanga kuti ndachitanga vinthu vamampha kweniso kuti kunthazi vinthu vazakundiyende umampha.

Kweni vinthu vingusintha mwamabuchibuchi. Mu 1989, mpanda wo wagaŵanga charu cha Berlin ndi charu cha German Democratic Republic wungubwangandulika. Ndipu maboma nga Chikomyunizimu Kuvuma kwa Europe ngangwamba kumala. Ivi vinguwovya kuti ndiziŵi kuti mucharu chidu mwachitikanga vinthu vinandi vambula urunji. Mwakuyeruzgiyapu, ŵanthu wo alekanga kukoliyana ndi boma la Chikomyunizimu aŵawonanga kuti mbakusika. Ndingujifumba kuti, ntchifukwa wuli achitanga viyo? Asi wo akoliyananga ndi boma la Chikomyunizimu agomezganga kuti ŵanthu wosi mbakuyanana? Kumbi Chikomyunizimu chenga chakubisamiyaku ŵaka? Ndingwamba kufipa mtima.

Mwaviyo, ndinguleka vo ndachitanga ndipu ndingwamba kumba sumu ndi kujambula vithuzi. Ndakhumbanga kuti ndizije wakumba sumu. Mwaviyo, ndingwamba sukulu yakusambiza kumba sumu ndi chilatu chakuti ndiziluti ku yunivesite. Pa nyengu iyi, ndinguleka mijalidu yamampha yo apapi ŵangu angundisambiza ndeche mwana. Ndawonanga kuti kukondwa ndi umoyu ndiku kwakukhumbika  ukongwa. Ndenga ndi vibwezi vinandi pa nyengu yimoza. Kweni kumba sumu, kujambula vithuzi kweniso kuja ndi vibwezi vinandi vingundiwovyapu cha kuti ndileki kufipa mtima. Vithuzi vo ndajambulanga navu, valongonga kuti ndafipanga mtima. Ndajifumbanga kuti, Kumbi ndi vinthu wuli vo vichitikengi kunthazi? Kumbi Chiuta wakutilengiyanji?

Ndinguzizwa ndati ndamukika mafumbu yanga. Zuŵa linyaki kusukulu, ndakambisananga ndi ŵana a sukulu anyangu vo vichitikengi kunthazi. Ndasambiranga limoza sukulu ndi Kaboni munyaki zina laki Mandy. * Pa zuŵa ili, iyu wangundipasa ulongozgi wamampha. Iyu wanguti: “Andreas, asani ukhumba kumukika mafumbu ngakukwaskana ndi umoyu kweniso vo vichitikengi kunthazi, ukaŵerengi Bayibolu.”

Ndingukayikiya vo Mandy wangundikambiya kweni ndinguŵanaŵana kuti ndiŵerengi Bayibolu kuti ndiwoni asani mafumbu ngangu ngangamukika. Mandy wangundikambiya kuti nkhaŵerengi Danyele chaputala 2 ndipu ndinguzizwa ndi vo ndinguŵerenga. Uchimi uwu ukamba za maufumu ngakulungakulu pamwenga kuti maboma nganthazi ukongwa ngo ngalamuliyanga charu kuvuli ndipuso ngo ngalamuliya sonu. Mandy wangundilongo so mauchimi nganyaki ngo ngakamba vo vazamuchitika kunthazi. Mafumbu ngangu ngangwamba kumukika. Chinanga kuti venga viyo, ndingwamba kujifumba kuti, kumbi ndiyani wakulemba mauchimi yanga ndi kukonkhosa vo vichitikengi kunthazi? Kumbi panyaki aneneska kuti Chiuta waliku?

Mandy wangundiwoya kuti nkhakumani ndi Horst ndipuso muwolu waki Angelika, wo ŵenga Akaboni. Banja ili lingundiwovya kuti ndiyambi kungavwisa Mazu Ngaku Chiuta. Ndinguswera cha kuziŵa kuti Mbakaboni aku Yehova pe wo agwirisiya ntchitu ukongwa zina laku Chiuta lakuti Yehova. (Sumu 83:18; Mateyu 6:9) Ndingusambira kuti Yehova Chiuta wakhumba kuti ŵanthu azije mu paradayisu pacharu chapasi kwamuyaya. Lemba la Sumu 37:9 likamba kuti: “Wo agomezga Yehova azamuhara charu chapasi.” Ndingukondwa ukongwa kuziŵa kuti weyosi yo watesesa kuvwiya marangu ngaku Chiuta ngo ngasanirika m’Bayibolu wangazija mucharu chenichi.

Vingundisuzga ukongwa kusintha vo ndachitanga kuti ndiyambi kuchita vo Bayibolu likamba. Kumba sumu kwandichitisanga kuti ndije wakunyada. Mwaviyo, ndakhumbikanga kusintha kuti ndije wakujiyuyuwa. Kweniso chenga chipusu cha kuti ndileki kwanja anthukazi. Ndiwonga ukongwa kuti Yehova wazizipizga, wachitiya lisungu kweniso watiŵavwisa wosi wo ayesesa kuchita vo Bayibolu lisambiza.

Pakwamba ndagomezganga kuti Chiuta kulivi kweniso kuti boma la Chikomyunizimu ndilu lamampha mpaka po ndingufika vyaka 18. Kweni kutuwa pa nyengu iyi mpaka sonu, Bayibolu lasintha umoyu wangu. Vo ndingusambira vingundiwovya kuti ndileki kufipa mtima kweniso kuti ndiziŵi chilatu cha umoyu. Ndingubatizika kuja Kaboni waku Yehova mu 1993, ndipu mu 2000 ndingutorana ndi Tabitha, mzichi waphamphu. Tiyesesa kuchita vo tingafiska kuwovya ŵanthu kuziŵa Bayibolu. Anandi wo tikumana nawu agomezga kuti Chiuta kulivi kweniso awona kuti boma la Chikomyunizimu ndilu lamampha. Ndikondwa ukongwa asani nditiŵawovya kuti amuziŵi Yehova.

Ndati ndayamba kusambira ndi Akaboni aku Yehova, apapi ŵangu akondwanga cha. Kweni kutuliya pa nyengu iyi, yiwu awona mo ndasinthiya chifukwa cha kusambira Bayibolu ndi Akaboni.Ndikondwa ukongwa chifukwa sonu apapi ŵangu aŵerenga Bayibolu kweniso aluta ku maunganu nga Akaboni aku Yehova.

Tabitha ndi ini te ndi banja lamampha chifukwa tilondo ulongozgi wa m’Bayibolu wakukwaskana ndi nthengwa. Mwakuyeruzgiyapu, kuvwiya ulongozgi wakugomezgeka mu nthengwa, kwawovya kuti nthengwa yidu yije yakukho.—Ŵahebere 13:4.

Sonu ndikuleka kufipa mtima chifukwa ndiziŵa vo vichitikengi kunthazi. Ndipu nde mubanja la pacharu chosi la akaboni aku Yehova, lo lichita vinthu mwakukoliyana. Mubanja ili tiwona kuti tosi te akuyanana. Venivi ndivu ndagomezganga kweniso ndakhumbanga pa umoyu wangu.