Ndikukuliya mutawuni ya Puerto Limón, ku Costa Rica. Kwidu tiliku ŵana 8, ndipu ini nde mwana wa nambala 7. Ada akutayika pa nyengu yo ndenga ndi vyaka 8. Mwaviyo, ama akutilera ŵija.

Ndayanjanga ukongwa kutchaya Baseball. * Ndipu ndingwamba kwanja bola ili ndeche mwana. Ndati ndafika vyaka va pakati pa 18 ndi 19, ndingusere mu timu yimana ya achinyamata. Ndipu ndati ndakwanisa vyaka va m’ma 20, munthu munyaki wangundipempha kuti nkhatchayengi baseball mu timu yikulu ku Nicaragua. Chifukwa chakuti ama atamanga ndipuso ini ndini ndaŵaphweriyanga, ndingukhumba cha kuchija ku Nicaragua. Mwaviyo, ndingukana. Pavuli paki, kunguza so munthu munyaki. Iyu wangundipempha kuti nkhatchayengi baseball mu timu yikulu ya Costa Rica. Mu timu iyi mwenga achinyamata anyaki wo angusankhika mu matimu ngamanangamana. Nyengu iyi, ndinguzomera. Ndingutchaya baseball mu timu iyi kutuwa mu 1949 mpaka mu 1952. Talutanga ku Cuba, Mexico ndi ku Nicaragua kuchitchaya magemu. Ndatchayanga umampha ukongwa baseball, ndipu ndafiskanga kutchaya magemu 17 kwambula kunangisa. Ndakondwanga ukongwa kuvwa masapota ngachidaniriza zina langu!

Pa nyengu iyi, ndachitanga so mijalidu yiheni. Chinanga kuti ndenga ndi chibwezi, ndayendanga so ndi anthukazi anyaki. Ndamwanga so ukongwa moŵa. Zuŵa linyaki ndinguloŵe ukongwa mwakuti ndichiyuka mulenji ndinguziŵa cha mo ndingwende kuti ndifiki kunyumba. Ndatchovanga so juga m’malu ngakupambanapambana.

Ama anguja Kaboni waku Yehova. Yiwu anguyesesa kuti andiwovyi kusambira uneneska, kweni angutondeka chifukwa chakuti ndayanjanga ukongwa baseball. Asani ndinozeke baseball, ndavwanga nja cha chinanga yingaja nyengu ya chakurya. M’mutu mwangu mwayendanga ŵaka baseball. Ndayanjanga ukongwa baseball kuphara chechosi!

Kweni ndati ndafika vyaka 29, ndingupwetekeka ukongwa pa gemu po ndakhumbanga kuko bola. Ndati ndachira, ndinguleka kutchaya baseball mu timu yikulu. Kweni ndasambizanga ŵaka  achinyamata kutchaya baseball mu timu yimana yakufupi ko ndajanga.

Mu 1957, Akaboni aku Yehova angundidaniya ku unganu wawu wachigaŵa ndipu ndinguluta. Unganu uwu unguchitikiya mu sitediyamu yo ini ndatchayangamu baseball. Pa zuŵa ili, ndinguwona kupambana pakati pa Akaboni aku Yehova ndi ŵanthu wo awoneriyanga baseball. Akaboni achitanga vinthu mwaulemu penipo ku baseball ŵanthu achitanga viwawa pe. Venivi vinguchitisa kuti ndiyambi kusambira Bayibolu ndi Akaboni aku Yehova kweniso kwamba kuwungana.

Ndingukondwa ukongwa ndi vo ndasambiranga m’Bayibolu. Mwakuyeruzgiyapu, Yesu wangukambiya limu kuti mu mazuŵa ngakumaliya, akusambira ŵaki azamupharazga uthenga wamampha wakukamba za Ufumu waku Chiuta pacharu chosi. (Mateyu 24:14) Ndingusambira so kuti Akhristu auneneska apharazga kuti asaniyengi ndalama cha. Yesu wangukamba kuti: “Mukupasika kwawezi, pasani kwawezi.”—Mateyu 10:8.

Ndichisambira Bayibolu, ndawonanga vo Bayibolu likamba ndi vo Akaboni aku Yehova achita. Ndinguwona kuti yiwu apharazganga mwaphamphu uthenga wa Ufumu waku Chiuta pacharu chosi. Ndinguwona so kuti alondo ulongozgi wo Yesu wakupereka wakuti Akhristu atenere kuja ndi mtima wakupasa. Mwaviyo, ndati ndaŵerenga lemba la Marko 10:21 po Yesu wangukamba kuti, ‘Zanga, uje wakusambira wangu,’ ndingukhumbisisa kuja Kaboni waku Yehova.

Chinanga kuti venga viyo, panguto nyengu kuti ndiyambi kusankha vinthu mwazeru. Mwakuyeruzgiyapu, kwa vyaka vinandi ndatchovanga juga ndipu ndachitanga venivi sabata yeyosi. Ndenga ndi nambala ya “mwaŵi” yo ndagwirisiyanga ntchitu. Kweni m’Bayibolu ndingusambira kuti Chiuta watinkha ŵanthu wo asopa “chiuta wa Mwaŵi” ndipuso watinkha ŵanthu a mbunu. (Yesaya 65:11; Ŵakolose 3:5) Mwaviyo, ndinguleka juga. Sabata yakwamba yo ndinguleke kutchova juga, nambala yangu yinguwina. Anyangu angundiseka chifukwa ndengavi kutchova juga sabata yeniyo. Ndipu angundichichiza kuti ndiyambi so, kweni ndingukana. Ndinguleke limu kutchova juga.

Zuŵa lo ndingubatizikiya pa unganu wachigaŵa wa Akaboni aku Yehova, ndingukumana ndi chiyesu chinyaki. (Ŵaefeso 4:24) Mazulu nga zuŵa ili, ndinguluta ku hotelu yo ndingufikiya. Ndati ndafika, ndingusaniya munthukazi yo ndenga nayu kali pa chibwezi we pakhomu la chipinda cho ndagonanga. Iyu wangundikambiya kuti: “Azani ŵaka namwi a Sam, tiyeni tinjoyepu.” Kweni kwambula kuzeleza ndingumumuka kuti, “Awa!” Ndingumukonkhose kuti sonu nditende fundu za m’Bayibolu. (1 Akorinto 6:18) Mwakuzizwa wangundifumba kuti “Utitinji?” Iyu wawonanga kuti vo Bayibolu likamba pa nkhani ya ureŵi vambula fundu ndipu wakhumbanga kuti tije so pa chibwezi. Wati wakamba viyo, ndingusere ŵaka muchipinda changu ndi kujala chisasa. Ndikondwa ukongwa kuti kutuliya pa nyengu yo ndinguja Kaboni waku Yehova mu 1958, ndiyesesa kulondo fundu za m’Bayibolu pa umoyu wangu.

Ndiwona nge kuti ndingalemba ŵaka buku lakukonkhosa vitumbiku vo ndasaniya chifukwa chakugwirisiya ntchitu ulongozgi wa m’Bayibolu. Vinyaki mwavitumbiku ivi vakuti sonu nde ndi mabwezi ngamampha ukongwa, umoyu wamampha kweniso likondwa chayilu.

Mazuŵa nganu, ndechekutchaya baseball, kweni ndiwona kuti ntchinthu chakukhumbika ukongwa cha pa umoyu wangu. Kali ndichitchaya baseball, ndenga wakutchuka ndipuso ndenga ndi ndalama zinandi kweni vinthu venivi venga vakanyengu kamanavi. Kweni sonu, ubwezi wangu ndi Chiuta kweniso abali ndi azichi pacharu chosi uŵengepu mpaka muyaya. Bayibolu likamba kuti: “Charu chiluta ndi chilakulaku chaki, kweni yo wachita khumbu laku Chiuta wazamuja kwamuyaya.” (1 Yohane 2:17) Sonu, nditanja ukongwa Yehova Chiuta kweniso abali ndi azichi kuphara chechosi!