Ko Maikeli, ʻoku lave ki ai ʻa e ngaahi lotu ʻe niʻihi ko “Sangato Mikaele,” ʻoku hā mahino ko ha hingoa naʻe ʻoange kia Sīsū ki muʻa pea mo e hili ʻene moʻui ʻi he māmaní. a Naʻe fakakikihi ʻa Maikeli mo Sētane hili ʻa e mate ʻa Mōsesé pea naʻá ne tokoniʻi ha ʻāngelo ke ʻave ʻa e pōpoaki ʻa e ʻOtuá ki he palōfita ko Tanielá. (Taniela 10:13, 21; Sute 9) Naʻe moʻui ʻa Maikeli ʻo fakatatau ki he ʻuhinga hono hingoá​—“Ko Hai ʻOku Tatau mo e ʻOtuá?”​—ʻaki hono taukapoʻi ʻa e tuʻunga-pule ʻa e ʻOtuá pea faitau mo e ngaahi fili ʻo e ʻOtuá.​—Taniela 12:1; Fakahā 12:7.

 Lāulea ki ha ʻuhinga lelei ke fakamulituku ai ko Sīsū ʻa e ʻāngelo-pule ko Maikelí.

•   Maikeli “ko e ʻāngelo-pulé.” (Sute 9) Ko e hingoa fakalakanga ko e “ʻāngelo-pule,” ʻoku ʻuhingá ko e “taki ʻo e kau ʻāngeló,” ʻa ia ʻoku hā ʻi ha veesi pē ʻe ua ʻi he Tohi Tapú. ʻI he ongo tuʻungá ni, ko e foʻi leá ʻoku singulali, ʻo fakahaaʻi ai ko e ʻāngelo pē ʻe toko taha ʻokú ne maʻu ʻa e hingoa fakalakanga ko iá. Ko e taha ʻo e ongo veesi ko iá ʻoku pehē ko e ʻEiki ko Sīsū naʻe toetuʻú ‘ʻe ʻalu hifo mei hēvani ʻo ne ʻoatu ha tuʻutuʻuni ʻi ha leʻo ʻo ha ʻāngelo-pule.’ (1 Tesalonaika 4:​16) ʻOku maʻu ʻe Sīsū ha “leʻo ʻo ha ʻāngelo-pule” koeʻuhí ko ia ʻa e ʻāngelo-pule ko Maikelí.

•   Fekauʻi ʻe Maikeli ha kau tau ko ha kau ʻāngelo. “Ko Maikeli mo ʻene kau ʻāngeló naʻa nau faitau mo e talākoní,” ʻa Sētane. (Fakahā 12:7) ʻOku maʻu ʻe Maikeli ha mafai lahi ʻi hēvani, he ʻoku ui ia ko e “taha ʻo e ngaahi ʻeiki tuʻu-ki-muʻa tahá” mo e “ʻeiki lahi.” (Taniela 10:13, 21; 12:1) Ko e ngaahi hingoa fakalakanga ko ení ʻokú ne fakanofo ʻa Maikeli ko e “ʻeikitau pule ʻo e kau tau ʻāngeló,” hangē ko ia ʻoku lave ki ai e tokotaha ako ʻo e Fuakava Foʻoú ʻa David E. Aune.

   ʻOku lave ʻa e Tohi Tapú ki ha toe hingoa kehe pē ʻe taha ʻokú ne maʻu ʻa e mafai ki he kau tau ʻāngeló. ʻOku fakamatalaʻi ia “ʻi he fakahā mai ʻa e ʻEiki ko Sīsuú mei hēvani fakataha mo ʻene kau ʻāngelo mālohí ʻi ha uloʻi afi, ʻi heʻene faisāuni.” (2 Tesalonaika 1:​7, 8; Mātiu 16:27) Ko Sīsū naʻe “ʻalu hake ki hēvani, pea naʻe fakamoʻulaloaʻi kiate ia ʻa e kau ʻāngelo mo e kau maʻu mafai mo e ngaahi mālohi.” (1 Pita 3:​21, 22) ʻE ʻikai ke ʻuhinga lelei ki he ʻOtuá ke ne fokotuʻu ʻa Sīsū mo Maikeli ko ha ongo ʻeikitau feʻauʻauhi ʻo e kau ʻāngelo māʻoniʻoní. ʻI hono kehé, ʻoku ʻuhinga lelei ange ke fakamulitukuʻaki ko e ongo hingoá ni, ʻa Sīsū mo Maikeli, ko e ʻuhinga ia ki he tokotaha tatau pē.

•   Ko Maikeli “ʻe tuʻu hake” lolotonga ʻa e “taimi ʻo e faingataʻa.” (Taniela 12:1) ʻI he tohi ʻa Tanielá, ko e kupuʻi lea ko ia “tuʻu hake” ʻoku faʻa ngāueʻaki ia ke lave ki ha tuʻi ʻoku fokotuʻu hake ke ne fakahoko ha ngāue makehe. (Taniela 11:​2-4, 21) Ko Sīsū Kalaisi, ʻoku ʻiloʻi “Ko e Folofola ʻa e ʻOtuá,” te ne fakahoko ha ngāue makehe ko e “Tuʻi ʻo e ngaahi tuʻi” ke ne taaʻi ai ʻa e ngaahi fili kotoa ʻo e ʻOtuá pea maluʻi ʻa e kakai ʻa e ʻOtuá. (Fakahā 19:11-​16) Te ne fakahoko ia lolotonga ʻa e taimi ʻo e “fuʻu mamahi lahi ʻa ia kuo teʻeki hoko talu mei he kamataʻanga ʻo māmaní.”​—Mātiu 24:21, 42.