Ехова машгаланы дөредип, эне-аталара чагалары тербиелемек борҗуны табшырды (Колоселилер 3:20). Сиз эне-ата хөкмүнде чагаларыңыза Ехованы сөймеги ве җогапкәрли адам болмагы өвретмәге борчлы (2 Тимотеос 1:5; 3:15). Мунуң үчин чагаңызың йүрегинде нәме бардыгыны билмәге чалшың. Элбетде, сизиң өз гөрелдәңиз өрән ваҗып. Эгер Ехованың Сөзи илки өз йүрегиңизде болса, оны чагаңыза өкделик билен өвредип билерсиңиз (Зебур 40:8).

МУКАДДЕС ЯЗГЫЛАРДА НӘМЕ ДИЙИЛЙӘР: «Эшитмекде чалт, геплемекде асса болуң» (Якуп 1:19). Сиз чагаларыңыз билен геплешениңизде, оларың өзүни аркайын дуймакларыны ислейәнсиңиз. Чагаларыңыз хем сизе өз пикирини аркайын айдып билҗекдиклерине гөз етирмели. Шонуң үчин олар өзүни аркайын дуяр ялы ягдай дөредиң (Якуп 3:18). Эгер сиз гөдек я-да танкытчыл болсаңыз, олар сизе догрусыны айтмазлар. Чагаларыңыз билен геплешениңизде, сабырлы болуң ве олары сөййәндигиңизи хемише айдып дуруң (Матта 3:17; 1 Коринтослылар 8:1).

МАСЛАХАТ

• Чагаларыңызы диңлемәге хемише тайын болуң

• Чагаларыңыз билен диңе кынчылык дөрәнде дәл-де, ызыгидер геплешиң

МУКАДДЕС ЯЗГЫЛАРДА НӘМЕ ДИЙИЛЙӘР: «Өзүни пайхаслы алып барян ровач тапар» (Сүлейманың тымсаллары 16:20). Кәте сиз чагаларыңызың айдян сөзлеринден оларың дуйгуларына дүшүнип билерсиңиз. Адатча, яшлар бир зады улалдып айдярлар я-да ойланман геплейәрлер. Худайың Сөзүнде: «Диңлемән җогап бермек адама акмаклыкдыр, утанчдыр» дийилйәр (Сүлейманың тымсаллары 18:13). Шонуң үчин олара деррев гахарланмаң (Сүлейманың тымсаллары 19:11).

МАСЛАХАТ

• Чагаңыз бир зады гүррүң беренде, сөзүни бөлмәң ве гахарланмаң

• Онуң яшындакаңыз нәхили дуйгулары башдан гечирендигиңизи ве нәмәни ваҗып хасапландыгыңызы ядыңыза салың

МУКАДДЕС ЯЗГЫЛАРДА НӘМЕ ДИЙИЛЙӘР: «Оглум, атаң тәлимини эшит, энең өвреденлерини ташлама» (Сүлейманың тымсаллары 1:8). Ехова чаганы тербиелемеги эне-атаның икисине-де табшырды. Сиз чагаларыңыза өзүңизе гулак асмагы ве сыламагы өвретмели (Эфеслилер 6:1—3). Эгер эне-ата «бир пикирде ве райда бирлешип» агзыбир болмаса, чагалар муны дуярлар (1 Коринтослылар 1:10). Сиз бир-бириңиз билен ылалашмасаңыз-да, муны чагаларыңыза гөркезмәң, себәби оларың сизе болан хорматы гачып билер.

МАСЛАХАТ

• Чагаңыза нәдип тербие ве темми бермек барада маслахатлашып, бир карара гелиң

• Сиз чагаңыза тербие бермек бабатда дүрли пикирде болсаңыз, янёлдашыңызың гарайшына дүшүнҗек болуң

МУКАДДЕС ЯЗГЫЛАРДА НӘМЕ ДИЙИЛЙӘР: «Чаганы гитмели ёлуна өвренишдириң» (Сүлейманың тымсаллары 22:6). Чагалар өз-өзүнден тербиеленмейәр. Шол себәпли олары өкделик билен тербилемеги, хатда олара герекли теммини бермеги өңүнден планлашдырмалы (Зебур 127:4; Сүлейманың тымсаллары 29:17). Тербиелемек — чага диңе бир темми бермеги дәл-де, оңа нәме себәпден темми берилйәндигине дүшүндирмеги хем аңладяр (Сүлейманың тымсаллары 28:7). Шейле-де сиз олара Ехованың Сөзүни сөймеги ве ондакы принциплере дүшүнмеги өвретмели (Зебур 1:2). Бу олара арасса ынсаплы болмага көмек эдер (Еврейлер 5:14).

МАСЛАХАТ

• Чагаңыза Ехова дири Худай хөкмүнде бил багламагы өвредиң

• Чагаңыза Интернет ве социал улгамларындакы затларың ахлак тайдан ховплудыгына дүшүнмәге ве олардан гача дурмага көмек эдиң. Олара чагалары зорлаян адамлардан сересап болмагы өвредиң