Илкинҗи машгаланы дөреден — Ехова * Худай. Мукаддес Язгыларда Худайың илкинҗи аялы ярадып, «оны адамың янына гетирендиги» айдыляр. Адам ата муңа өрән бегенип: «Ине, сүеги өз сүегимден, тени өз тенимдендир» дийди (Гелип чыкыш 2:22, 23). Ехова Худай хәзирем дурмуш гуран адамларың багтлы болмагыны ислейәр.

Сиз дурмуш гураныңызда, хемме зат говы болар дийип пикир эденсиңиз. Хатда әр-аял бири-бирини йүрекден сөйсе-де, олар кәбир кынчылыклара душ гелип билер (1 Коринтослылар 7:28). Шу брошюрада Мукаддес Язгылара эсасланан принциплер берилйәр. Эгер сиз олара эерсеңиз, машгалаңызы багтлы эдип билерсиңиз (Зебур 19:8—11).

МУКАДДЕС ЯЗГЫЛАРДА НӘМЕ ДИЙИЛЙӘР: Әр — машгаланың башы (Эфеслилер 5:23).

Эгер сиз машгалабашы болсаңыз, Ехова аялыңызың мәхир билен аладасыны этмегиңизи ислейәр (1 Петрус 3:7). Худай аялы эркек адама көмекчи эдип яратды, шонуң үчин сиз аялыңыза хормат гоймалы ве оны сөймели (Гелип чыкыш 2:18). Сиз аялыңызы шейле гүйчли сөймели велин, онуң бәхбидини өзүңизиңкиден ёкары тутмалы (Эфеслилер 5:25—29).

Эгер сиз аял болсаңыз, Ехова сизиң янёлдашыңыза чуңңур хормат гоймагыңызы ве оңа машгала борчларыны ерине етирмәге көмек этмегиңизи ислейәр (1 Коринтослылар 11:3; Эфеслилер 5:33). Шейле-де янёлдашыңызың гелйән карарыны голдап, оңа йүрекден көмек эдиң (Колоселилер 3:18). Эгер сиз шейтсеңиз, янёлдашыңыз ве Ехова сизиң гадырыңызы билер (1 Петрус 3:1—6).

МАСЛАХАТ

• Бири-бириңизден хас говы әр я-да аял болмак үчин нәхили хәсиетлери өсдүрмелидигиңизи сораң. Нәмәни дүзетмелидигиңизи билер ялы үнсли диңләң

• Сабырлы болуң, себәби бир-бириңизиң гөвнүнден турмагы өвренмек үчин бираз вагт герек боляр

МУКАДДЕС ЯЗГЫЛАРДА НӘМЕ ДИЙИЛЙӘР: Янёлдашыңызың ислегини гөз өңүнде тутуп, аладасыны эдиң (Филипилилер 2:3, 4). Бири-бириңизи гыммат сайың ве Ехованың гуллукчыларындан «мылакатлы» болмагы талап эдйәндигини унутмаң (2 Тимотеос 2:24). Худайың Сөзүнде шейле дийилйәр: «Бири бардыр, гылыҗың санҗылышы ялы, соңуны сайман геплейәндир; акылдарың дили болса шыпа берйәндир». Шонуң үчин айтҗак сөзлериңизе үнсли болуң (Сүлейманың тымсаллары 12:18). Ехованың мукаддес рухы сизе янёлдашыңызы сөймәге ве онуң билен мәхирли гүрлешмәге көмек эдер (Галатялылар 5:22, 23; Колоселилер 4:6).

МАСЛАХАТ

• Янёлдашыңыз билен ваҗып меселелер барада пикир алшаныңызда, рахатлыгы саклап, ачык гүррүңдешлик эдип билер ялы дога эдиң

• Нәме айтҗакдыгыңыз ве оны нәдип айтҗакдыгыңыз барада говы ойланың

МУКАДДЕС ЯЗГЫЛАРДА НӘМЕ ДИЙИЛЙӘР: Сиз дурмуш гураныңызда, янёлдашыңыз билен «бир тен болярсыңыз» (Матта 19:5). Муңа гарамаздан, сизиң гарайшыңыз тапавутланып билер. Шол себәпли бир пикирде ве бир гарайышда болмагы өврениң (Филипилилер 2:2). Эсасан-да, бир карара гелениңизде, агзыбир болмак ваҗып. Худайың Сөзүнде: «Максатлар маслахат билен беркарар боляндыр» дийилйәр (Сүлейманың тымсаллары 20:18). Гой, Мукаддес Язгыларың принциплери сизе агзыбир карара гелмәге көмек этсин (Сүлейманың тымсаллары 8:32, 33).

МАСЛАХАТ

• Янёлдашыңыза диңе бир пикириңизи дәл-де, дуйгуларыңызы хем ачык айдың

• Бир карара гелмезден өң, янёлдашыңыз билен маслахатлашың