Za Hemen u Eren Msen Wer Aôndo A Lumun We
Aôndo na uumace iyua igen i i lu kposo a uiyua mbagenev cii yô—ka ian i lamen a na, pasen un er i lu ve ken ishima la ken msen. Profeti Davidi yange er msen ér: “We, u U ongo msen, ka hen a We man uuma cii vea va ye.” (Pasalmi 65:2) Kpa se er msen nan ve Aôndo una ungwa shi una na se iverene?
ER MSEN PASE ER I LU U KEN ISHIMA LA A IYOLHIDEN IJIME
Mbamsen ou mba u eren la ka ve na u ian i ‘pasen ishima you sha ishigh ki Aôndo,’ ka u ôron un er i lu u ken ishima jim jim je la. (Pasalmi 62:8) Mbamsen mba or ka nan er nan pase Aôndo sha mimi er i lu nan ken ishima jim jim la doo Aôndo ishima.
ER MSEN YILA AÔNDO SHA ITI NA JIGHILII
Er Aôndo a lu a atiatom kpishi nahan kpa, ngu a iti na kpôô kpôô. A kaa ér: “Mo Aôndo Uhembanagee, . . . iti Yam i TER (ka Yehova je la).” (Ekesodu 6:3) I nger iti i Yehova la ken Icighan Ruamabera kuma kwa 7,000. Uprofeti kpishi yila Aôndo sha iti na ne jighilii. Aberaham yange kaa ér: “[Yehova], . . . shi me ôr kwagh [a we].” (Genese 18:30) Se kpa gba u se yilan Aôndo sha iti na i Yehova la shighe u se lu eren msen yô.
ER MSEN KEN ZWA U U LAMEN LA
Hanma zwa u se eren msen ker cii kpa, Aôndo ka a fa mbamhen asev man er i lu se ken ishima la. Mkaanem nam ôr kwagh u nan se vangertiôr ér: “Aôndo sangen a sange ga, kpa ken hanma ikyurior cii, or u nan cie un shi nan eren kwagh u vough yô, una lumun nan.”—Aerenakaa 10:34, 35.
Nahan kpa, u Aôndo a lumun se yô, a gba u se er kwagh a hemba u eren msen tseegh tsô la. Ken ngeren mba ve dondo ne, se time sha akaa a i gbe u se er la.
Kwagh Ugen u Alaghga Shi Una Doo U Yô
MBAMPIN MBA AGUMAIOR A PIN LA
Gba u Me Er msen sha Ci u Nyi?
Msen ka kwagh u ka a na i lu or ken ishima guda tseegh tsô shinii, kwagh wa hemba nahana?
MBAMPIN MBA BIBILO I NE MLUMUN SHA MI LA
Aluer M Er Msen Nahan Aôndo Una Wasem Je He?
Kwagh gba Aôndo sha mbamzeyol av mimii?
MBAMPIN MBA BIBILO I NE MLUMUN SHA MI LA
Ka Nyi Me Er Msen Me Sônô?
Hen fa er mbamzeyol asev ve gbe Aôndo kwagh yô.
