Ka Se Hen Kwagh u Aôndo ken Akaa a Uprofeti Nav Nger La
Sha ayange a tsuaa la, Aôndo a tindi uprofeti nav ér ve ôr uumace ilyoho i hange hange. Ilyoho shon ia fatyô u tesen se er se zua a iveren i Aôndo yôô? Een, ia fatyô. De se nenge kwagh u se fatyô u henen ken uprofeti mba yange ve civir Aôndo sha mimi la.
ABERAHAM
Aôndo sangen a sange ga, shi a soo u nan uumace cii iveren.
Aôndo yange tôndo zwa a profeti Aberaham ér “ka ken a we je akuraior a sha won cii aa zua a iveren ye.”—Genese 12:3.
Ka nyi se hene? Se doo Aôndo ishima kpishi je yô, a soo u nan hanma tsombor cii iveren, ka nomso man kasev kua mbayev mba ve ungwan imo na je la.
MOSE
Aôndo zungwen mhôônom shi veren mba ve keren u fan un la doo doo.
Aôndo u Hemban Agee la yange na profeti Mose tahav mbu eren uivande mba vesen. Nahan cii kpa, Mose er msen ér: “Ma U shi tesem igbenda You sha er me fa U yô; sha er i̱ doo U a mo yô.” (Ekesodu 33:13) Msen u Mose er la lu sha ishima i Aôndo, nahan a wase Mose seer zuan a mfe man mkav sha kwagh u igbenda Na kua aeren a Na. U tesen ikyav yô, Mose yange fa er Aôndo u a gbe se la a lu “Aôndo u mgboughon a mhôônom ma zungwen kua mrumun u sha mhôôn” yô.—Ekesodu 34:6, 7.
Ka nyi se hene? Aôndo soo u nan se cii iveren, sea lu nomso shin kasev shin mbayev kpaa, aluer se mba keren u seer fan un yô. A tese ken Icighan Ruamabera er se civir un la, shi a tese ér sar un tsung u wasen se shi nan se iveren.
YESU
Yange mhôônom ma kôr Yesu, nahan a bee ior hanma inja uange cii
Se fatyô u zuan a averen a Aôndo a tsôron la, aluer se hen kwagh u Yesu kua akaa a yange er shi tese la yô.
Mkaanem ma Aôndo ôr akaa kpishi sha kwagh u Yesu kua atesen a na vighe vighe. Aôndo yange na Yesu tahav er uivande mba vesen kpishi; yange bugh mbaapirashe ashe, shi bugh mbaakondoato ato, shi bee mbaawanev awan. Shi yange nder mbakpenev je kpaa. Akaa a Yesu er ne lu ikyav i tesen akaa a dedoo a Aôndo una va er sha ci u uumace ken hemen yô. A pase kwagh u hanma wase nana er ve nana zua a averen la yô, ér: “Man u̱ ve̱ zua a uma u tsôron yô, saa vea lu keren u fan we, we Aôndo u mimi tswen, man un u u tindi la, ka Yesu Kristu je la.”—Yohane 17:3.
Yesu yange zungwen ior mhôônom, lu ishima legh legh shi eren a ior kundu kundu. Nomso man kasev, kua mbayev man mbaganden cii zaan hen a na, sha ci u yange kaa a ve ér: “Hen nen kwagh hen a mo. Sha ci u m ngu ishima legh legh, shi m kenden a iyol sha ga, nahan ne zua a mmem.” (Mateu 11:29) Er ior mba sha ayange a Yesu la nzughul a kasev nahan kpa, Yesu yô, eren kwagh a kasev kundu kundu man sha icivir.
Ka nyi se hene? Yesu yange tese ér ior doo un ishima kpishi, nahan a ver se ikyav i hemban cii er se eren kwagh a mbagenev yô.
YESU KA AÔNDO GA
Icighan Ruamabera tese ér “Aôndo u mimi ngu môm tseegh,” shi ér Yesu Kristu lu ortyom u Aôndo u hiden a iyol ijime. (1 Mbakorinte 8:6) Yesu yange ôr wang ér Aôndo hemba un, shi ér Aôndo tindi un shin tar.—Yohane 11:41, 42; 14:28. *
^ par. 17 Wea soo u seer fan kwagh u Yesu yô, nenge antakeda u Jighjigh u Nan u Mimi—Ka Kwagh u Vesen u Nan We Msaanyol, vegher u sha 8 man 9 la, sha www.pr418.com/tiv.
Kwagh Ugen u Alaghga Shi Una Doo U Yô
JIGHJIGH U NAN U MIMI—KA KWAGH U VESEN U NAN WE MSAANYOL
Ityendezwa i Aôndo Er sha Ikyev i Uprofeti La
Akuraior a sha tar cii aa zua a iveren!
MBAMPIN MBA BIBILO I NE MLUMUN SHA MI LA
Yesu Ka Aôndo Uhembanagee Ciili?
Yesu yange ôr ér nyi sha ian i un lu sha mi hen Aôndo?
