Testemuña ba Jeová hanoin saida kona-ba soe-malu?

LOKE

Ami hakarak halo tuir Bíblia nia matadalan kona-ba kaben no soe-malu. Maromak hakarak mane no feto neʼebé kaben ona atu moris hamutuk ba nafatin. Tuir Bíblia, sala-foʼer, ka halo relasaun seksuál ho ema neʼebé laʼós ninia kaben, mak razaun ida deʼit neʼebé kaben-naʼin sira bele soe malu.—Mateus 19:5, 6, 9.

Testemuña ba Jeová ajuda kaben-naʼin sira neʼebé iha problema moris kaben nian ka lae?

Sin, iha dalan oioin:

Livru sira. Ami-nia livru sira fó sai informasaun barak kona-ba oinsá atu hametin moris kaben nian maski iha problema barak. Porezemplu, ami-nia livru sira fó sai informasaun ho títulu “Oinsá atu hametin juramentu kaben nian” no “Fó perdua ba malu”.
Reuniaun sira. Iha ami-nia reuniaun, ami koʼalia kona-ba matadalan husi Bíblia neʼebé kaben-naʼin sira bele aplika iha sira-nia moris.
Katuas sira. Katuas sira iha kongregasaun fó ajuda ba kaben-naʼin neʼebé hasoru problema hodi hatudu matadalan husi Bíblia, hanesan Éfeso 5:22-25.

Se Testemuña ba Jeová hakarak soe malu, sira presiza husu lisensa husi katuas sira iha kongregasaun ka lae?

Lae. Maski katuas sira ajuda kaben-naʼin sira bainhira sira husu, neʼe la dehan katak katuas sira iha direitu atu halo desizaun ba sira. (Galásia 6:5) Maibé se ema ida deside atu soe malu ho razaun neʼebé la tuir Bíblia, nia labele kaben fali ho ema seluk.—1 Timóteo 3:1, 5, 12.

Oinsá mak Testemuña ba Jeová nia hanoin kona-ba fahe malu?

Bíblia anima kaben-naʼin sira atu hela hamutuk maski hasoru situasaun neʼebé susar. (1 Korinto 7:10-16) Kaben-naʼin sira bele rezolve problema barak hodi halo orasaun, halo tuir Bíblia nia matadalan, no hatudu domin ba malu.—1 Korinto 13:4-8; Galásia 5:22.

Maski nuneʼe, ema kristaun balu halo desizaun atu haketak an husi sira-nia kaben iha situasaun neʼebé susar tebes hanesan tuirmai neʼe:

Ninia kaben lakohi tau matan ba família toʼo la iha osan ka hahán.—1 Timóteo 5:8.
Ninia kaben halo violénsia makaʼas toʼo tau ninia moris iha perigu laran.—Salmo (Mazmur) 11:5.
Ninia kaben fó-terus makaʼas atu labele halo tuir Maromak. Porezemplu, kuandu ema kristaun ida nia kaben koko obriga nia atu kontra Maromak nia ukun-fuan ruma, karik ema kristaun neʼe deside atu haketak an hodi bele “halo tuir Maromak nuʼudar ukun-naʼin duké halo tuir ema”.—Apóstolu 5:29.