Ami hanoin kona-ba edukasaun hodi halo tuir Bíblia nia prinsípiu sira. Testemuña ida-idak uza sira-nia konxiénsia neʼebé hetan ona treinu husi Bíblia kuandu deside oinsá atu aplika Maromak nia prinsípiu sira tuirmai. a

•  Edukasaun importante tebes

•  Iha hanoin neʼebé loos kona-ba edukasaun

•  Edukasaun boot bele lori perigu iha dalan morál no espirituál

•  Testemuña ba Jeová halaʼo eskola kada loron-domingu atu hanorin Bíblia ba labarik sira ka lae?

 Bíblia fó sai katak “matenek no kbiit atu hanoin” mak importante tebes, no edukasaun bele ajuda ema atu haburas hahalok sira-neʼe. (Provérbios 2:10, 11; 3:21, 22) Jesus mós hatete ba ninia dixípulu sira atu hanorin mandamentu hotu neʼebé nia fó sai ba sira. (Mateus 28:19, 20) Entaun, ami anima no ajuda ema neʼebé iha ami-nia kongregasaun atu hetan edukasaun diʼak, inklui sai matenek atu lee, hakerek, komunika ba malu, b no mós iha koñesimentu kona-ba relijiaun no kultura seluk.​—1 Korinto 9:20-22; 1 Timóteo 4:13.

 Governu mós haree katak edukasaun mak importante no dala barak sira haruka joven sira tenke tuir eskola primária toʼo sekundária. Ami halo tuir lei sira hanesan neʼe hodi halo tuir mandamentu husi Bíblia neʼebé dehan: “Ema hotu tenke hakruʼuk ba autoridade sira”, ka governu. (Roma 13:1) Liután neʼe, ami anima ami-nia oan sira atu hakaʼas an estuda iha eskola no labele sai baruk. c Maromak nia Liafuan dehan: “Buat naran deʼit neʼebé imi halo, halo ida-neʼe ho laran tomak hanesan imi halo ba Jeová, laʼós ba ema.”​—Koloso 3:23.

 Edukasaun ajuda ita atu tau matan ba família. Bíblia hatete: “Se ema ida la tau matan ba ninia família, no liuliu ba sira neʼebé iha ninia umakain rasik, nia nega ona ninia fiar no aat liu fali ema neʼebé la iha fiar.” (1 Timóteo 5:8) Edukasaun bele ajuda ita kumpre knaar husi Maromak atu tau matan ita-nia família. The World Book Encyclopedia dehan katak objetivu prinsipál husi edukasaun mak atu “ajuda ema bele kontribui buat ruma ba komunidade . . . no sai serbisu-naʼin neʼebé diʼak iha sistema ekonomia”. Ema neʼebé iha matenek atu halo buat ruma no iha edukasaun diʼak bele tau matan ba ninia família ho didiʼak duké ema neʼebé la iha matenek no la hetan edukasaun báziku.​—Provérbios 22:29.

 Inan-aman mós presiza prepara sira-nia oan hodi prontu halaʼo moris nuʼudar ema boot, no dalan ida atu halo nuneʼe mak haruka oan ba eskola. (2 Korinto 12:14) Ami anima inan-aman atu ajuda sira-nia oan hetan edukasaun maski sira presiza selu, susar atu hetan, ka la tuir sira-nia kultura. d Ami mós fó sujestaun diʼak oioin kona-ba oinsá inan-aman bele envolve an iha sira-nia oan nia edukasaun. e

 Ami buka-hatene opsaun oioin kona-ba edukasaun. Bíblia hatete: “Ema neʼebé la iha esperiénsia tau fiar ba liafuan hotu, maibé ema neʼebé matenek hanoin didiʼak kona-ba ninia hakat ida-idak.” (Provérbios 14:15) Ami aplika prinsípiu neʼe hodi buka-hatene didiʼak opsaun oioin kona-ba edukasaun depois ami-nia oan remata eskola sekundária. Ami mós tetu kona-ba gastu no benefísiu husi edukasaun hanesan neʼe. Porezemplu, tuir treinamentu ka kursu ruma ba tempu balu bele ajuda joven sira atu hetan matenek kona-ba serbisu ida.

 Edukasaun espirituál iha folin-boot liu fali edukasaun ema nian. La hanesan ho ema nia edukasaun, edukasaun espirituál neʼebé bazeia ba Bíblia fó ita koñesimentu kona-ba Maromak neʼebé bele salva ita-nia moris. (João 17:3) Edukasaun espirituál mós hanorin ita morál neʼebé diʼak, neʼe mak “buat neʼebé loos, justisa no la todan ba sorin”, no ajuda ita “komprende kona-ba buat diʼak hotu”. (Provérbios 2:9) Apóstolu Paulo simu edukasaun neʼebé ohin loron ita bele kompara ho universidade, maibé nia rekoñese katak koñesimentu kona-ba Kristu Jesus mak folin-boot liu. (Filipe 3:8; Apóstolu 22:3) Nuneʼe mós ohin loron, Testemuña ba Jeová barak hetan ona edukasaun boot, maibé sira fiar katak edukasaun espirituál mak folin-boot liu. f

 Lia-dadolin ida iha Bíblia hatete: “Ema neʼebé matenek haree perigu no subar nia an.” (Provérbios 22:3) Testemuña ba Jeová sente katak situasaun iha universidade balu ka fatin atu hetan edukasaun boot ruma bele lori perigu iha dalan morál no espirituál. Tan neʼe, Testemuña barak hili atu la bá ka hatama sira-nia oan iha situasaun hanesan neʼe. Sira sente katak iha fatin sira hanesan neʼe, ema hanorin ideia neʼebé sala, porezemplu:

•   Hanoin neʼebé sala: Osan halo moris kontente no seguru

   Ema barak dehan katak edukasaun boot mak dalan ida atu hetan serbisu diʼak ho osan boot, tan neʼe ema neʼebé tama universidade ho objetivu atu hetan osan barak kontinua aumenta liután. Ema balu fiar katak osan sei halo sira kontente no seguru, maibé Bíblia dehan katak hanoin hanesan neʼe mak sala. (Eclesiastes 5:10) Bíblia mós hanorin katak “domin ba osan mak hun ba buat aat oioin” no dala barak halo ema nia fiar sai fraku. (1 Timóteo 6:10) Testemuña ba Jeová hakaʼas an atu la monu ba “lasu” husi rikusoin.​—Mateus 13:22.

•   Hanoin neʼebé sala: Ema neʼebé iha edukasaun boot sei hetan pozisaun aas no naran-boot

   Porezemplu, Nika Gilauri, eis primeiru ministru ba rai-Jeórjia, hakerek kona-ba ema barak nia hanoin iha ninia rai, hodi dehan: “Se ita hakarak iha naran-boot iha Jeórjia, ita tenke iha diploma husi universidade. . . . [Iha tempu uluk,] joven sira neʼebé la hetan diploma hamoe sira-nia família.” g Maibé, Bíblia fó avizu atu la buka naran-boot iha mundu neʼe. Jesus hatete ba ulun-naʼin relijiaun iha ninia tempu neʼebé buka deʼit naran-boot, hodi dehan: “Oinsá mak imi bele fiar haʼu se imi gosta gaba malu?” (João 5:44) Situasaun iha universidade bele halo ema haburas foti an, hahalok neʼebé Maromak odi.​—Provérbios 6:16, 17; 1 Pedro 5:5.

•   Hanoin neʼebé sala: Ema ida-idak iha direitu atu deside rasik saida mak loos no sala

   Testemuña ba Jeová simu Maromak nia matadalan kona-ba buat neʼebé loos no sala. (Isaias 5:20) Maibé, tuir artigu neʼebé fó sai iha jornál ida (Journal of Alcohol and Drug Education), estudante barak “foti desizaun neʼebé kontra buat neʼebé sira hatene mak loos” h tanba influénsia neʼebé sira hetan husi estudante seluk iha universidade. Bíblia mós hatete: “Ransu hamutuk ho ema aat sei estraga toman diʼak.” (1 Korinto 15:33) Estudante barak mak halo hahalok sira neʼebé Maromak bandu, hanesan lanu, uza droga, relasaun seksuál maski la kaben. No sira mós anima sira-nia kolega atu halo buat sira-neʼe.​—1 Korinto 6:9, 10; 2 Korinto 7:1.

•   Hanoin neʼebé sala: Edukasaun boot mak dalan diʼak liu atu hadiʼa mundu

   Ami rekoñese katak ema barak buka edukasaun boot laʼós atu sai riku, hetan naran-boot ka kontente ho hahalok sala, maibé atu hadiʼa sira-nia moris no mundu. Neʼe mak planu neʼebé diʼak, maibé Testemuña ba Jeová hili dalan seluk. Hanesan Jesus, ami fiar katak só Maromak nia Ukun deʼit mak bele halo mundu neʼe sai fatin neʼebé diʼak liu. (Mateus 6:9, 10) Maibé, ami la hein deʼit ba Maromak nia Ukun atu rezolve problema sira iha mundu. Hanesan Jesus, ami “haklaken liafuan diʼak kona-ba Maromak nia Ukun” iha mundu tomak. Tinan-tinan, ami ajuda ema rihun ba rihun atu troka sira-nia moris hodi sai diʼak liu. i​—Mateus 24:14.