AJUDA BA FAMÍLIA
Oinsá atu ajuda oan hetan valór neʼebé diʼak
Ita-nia oan sente baruk kona-ba eskola, nia lakohi estuda ka halo TPC. Rezultadu mak ninia valór tun no ninia hahalok mós sai la diʼak. Oinsá mak Ita bele ajuda Ita-nia oan hetan valór neʼebé diʼak?
Buat neʼebé Ita presiza hatene
Obriga demais nia bele aumenta problema. Kuandu Ita obriga demais Ita-nia oan, ida-neʼe bele aumenta ninia estrese iha eskola no iha uma! Hodi hamenus ninia estrese, karik nia sei bosok, subar informasaun kona-ba ninia valór neʼebé la diʼak, finje halo Ita-nia asinatura falsu iha ninia kaderneta, ka falta atu tuir eskola. Ikusmai problema bele sai boot liután.
Dala ruma fó prezente bainhira nia hetan valór diʼak bele haburas problema. Aman ida naran Andrew dehan: “Hodi hakaʼas ami-nia oan-feto atu hetan rezultadu neʼebé diʼak, ami fó prezente ba nia, maibé ikusmai nia hanoin deʼit kona-ba prezente. Nuneʼe kuandu nia hetan valór la diʼak, nia sai laran-kraik liu laʼós tanba valór maibé tanba nia labele hetan prezente husi ami.”
Fó sala ba mestre labele ajuda Ita-nia oan. Ita-nia oan bele hanoin sala katak nia la presiza hatudu badinas atu hetan valór diʼak. Nia mós bele komesa duun ema seluk kona-ba ninia valór ka hein ema seluk atu rezolve ninia problema sira. Neʼe katak ikusmai Ita-nia oan sei la aprende hahalok ida neʼebé importante ba ninia moris nuʼudar ema boot, neʼe mak oinsá atu simu responsabilidade kona-ba ninia hahalok.
Buat neʼebé Ita bele halo
Kontrola Ita-nia sentimentu. Se Ita sente hirus, diʼak liu atu hein uitoan antes koʼalia kona-ba valór ho Ita-nia oan. Aman ida naran Brett dehan: “Haʼu-nia feen no haʼu hetan rezultadu diʼak liu se ami kalma no hanoin nia situasaun.”
Bíblia nia matadalan: “Lalais atu rona, la ansi atu koʼalia, neineik atu hirus.”—Tiago 1:19.
Buka problema nia hun. Baibain labarik sira hetan valór la diʼak tanba razaun oioin, porezemplu, labarik seluk goza sira, sira foin muda eskola, estrese boot kona-ba ezame, problema família nian, toba la dukur, oráriu neʼebé runguranga, ka ladún tau fokus. Keta hanoin katak Ita-nia oan mak baruk deʼit.
Bíblia nia matadalan: “Ema neʼebé komprende didiʼak situasaun ruma sei hetan susesu.”—Provérbios 16:20.
Halo fatin neʼebé Ita-nia oan bele estuda ho hakmatek. Halo oráriu neʼebé metin atu estuda no halo TPC. Halo fatin ida neʼebé Ita-nia oan bele estuda hakmatek hodi televizaun ka telefone la atrapalla. Ajuda oan atu tau fokus didiʼak liután hodi estuda uitoan-uitoan. Aman ida husi rai-Alemaña naran Hector dehan: “Kuandu tenke halo ezame ida, loroloron ami lee informasaun uitoan duké hein toʼo ezame besik ona no lee hotu dala ida.”
Bíblia nia matadalan: “Iha tempu neʼebé loos ba buat hotu.”—Eclesiastes 3:1.
Haburas hakarak atu aprende. Se Ita-nia oan haree oinsá nia bele hetan benefísiu husi eskola agora, ida-neʼe sei haburas ninia hakarak atu aprende liután. Porezemplu, kuandu nia bele sura ho diʼak, ida-neʼe bele ajuda nia atu hatene ho didiʼak oinsá nia bele rai osan.
Bíblia nia matadalan: “Hetan matenek bá, hetan kbiit atu komprende. . . . Hafolin tebes matenek bá.”—Provérbios 4:5, 8.
Sujestaun: Fó ajuda kuandu Ita-nia oan halo TPC, maibé labele Ita deʼit mak halo. Andrew hatete: “Ami-nia oan-feto hein ami atu buka resposta duké hakaʼas an atu estuda rasik.” Hanorin Ita-nia oan atu halo TPC mesak.