“Livru moris nian”, neʼebé mós bolu nuʼudar “livru ida hodi hanoin-hetan”, mak livru neʼebé iha naran husi ema neʼebé sei simu prezente moris rohan-laek. (Apokalipse 3:5; 20:12; Malaquias 3:16) Maromak hili sira neʼebé hakerek iha livru neʼe tanba sira halo tuir nia ho laran-metin.​—João 3:16; 1 João 5:3.

 Husi “tempu neʼebé mundu hahú”, katak husi tempu neʼebé ema hahú eziste, Maromak hanoin-hetan ninia atan ida-idak neʼebé serbí nia ho laran-metin, hanesan nia hakerek sira-nia naran iha livru ida.(Apokalipse 17:8) Naran primeiru iha livru moris nian mak Abel, mane neʼebé laran-metin. (Ebreu 11:4) Neʼe laʼós deʼit lista naran nian, tanba livru moris nian hatudu mai ita katak Jeová mak Maromak neʼebé hatudu domin no “hatene sira neʼebé ninian”.​—2 Timóteo 2:19; 1 João 4:8.

Maromak bele hamoos naran sira husi “livru moris nian” ka lae?

 Sin. Kona-ba ema neʼebé la halo tuir nia iha nasaun Izraél iha tempu antigu, Maromak hatete: “Ema neʼebé halo sala hasoru haʼu, haʼu sei hamoos ninia naran husi haʼu-nia livru.” (Éxodo 32:33) Maibé se ita kontinua laran-metin, ita-nia naran sei iha “livru moris nian” ba nafatin.​—Apokalipse 20:12.