Oinsá haʼu bele proteje haʼu-nia an husi asédiu seksuál?
Bíblia nia resposta
Haree toʼok sujestaun sira tuirmai neʼebé bazeia ba Bíblia nia matadalan:
Hatudu hahalok profisionál. Nafatin hatudu laran-diʼak no respeitu ba Ita-nia kolega serbisu, maibé labele sai besik demais toʼo halo sira hanoin sala katak Ita gosta sira book Ita iha dalan seksuál.—Mateus 10:16; Koloso 4:6.
Hatais ho respeitu. Se Ita hatais roupa neʼebé hatudu isin ka aperta demais, karik neʼe bele halo ema hanoin sala kona-ba Ita. Bíblia rekomenda ita atu hatais “ho respeitu no ho hanoin neʼebé loos”.—1 Timóteo 2:9.
Hili didiʼak Ita-nia belun sira. Se Ita ransu ho ema neʼebé gosta kuandu ema seluk hatudu oin-moris ba sira ka book sira, karik ema sei hanoin Ita mós hanesan ho sira.—Provérbios 13:20.
Keta envolve an iha konversa neʼebé foʼer. Diʼak atu laʼo sees deʼit kuandu kolega sira komesa koʼalia “buat neʼebé beik, ka konta istória neʼebé foʼer”.—Éfeso 5:4.
Hasees an husi situasaun neʼebé bele lori perigu. Porezemplu, kuidadu se ema husu Ita ho razaun neʼebé la loos atu nafatin iha serbisu fatin maski oras liu ona.—Provérbios 22:3.
Koʼalia ho klaru. Se ema halo asédiu seksuál ba Ita, koʼalia ho klaru katak Ita la gosta buat neʼebé nia halo. (1 Korinto 14:9) Porezemplu, Ita bele dehan: “Haʼu la gosta Ita kona haʼu-nia isin. Keta halo tan hanesan neʼe.” Ita mós bele hakerek ba ema neʼe hodi esplika kona-ba buat neʼebé nia halo no Ita sente oinsá kona-ba ida-neʼe no saida mak Ita hakarak. Esplika ho klaru katak Ita sente hanesan neʼe tanba Ita-nia morál no fiar neʼebé bazeia ba Bíblia.—1 Tesalónika 4:3-5.
Husu ajuda. Se ema kontinua halo asédiu seksuál ba Ita, koʼalia nakloke ba ema neʼebé Ita fiar, hanesan belun, família, kolega serbisu ka ema neʼebé iha ona esperiénsia kona-ba ajuda vítima husi asédiu seksuál. (Provérbios 27:9) Vítima barak hetan ona ajuda liuhusi orasaun. Maski Ita seidauk halo orasaun toʼo agora, maibé Ita bele simu ajuda husi Jeová, “Maromak neʼebé fó kmaan ba ema iha situasaun hotu”.—2 Korinto 1:3.
Asédiu seksuál iha serbisu fatin halo ema barak sente la diʼak, maibé Bíblia bele ajuda Ita.
Karik Ita sei gosta
PERGUNTA HUSI JOVEN SIRA
Saida mak haʼu bele halo se ema hatudu hahalok asédiu seksuál mai haʼu?
Aprende saida mak hahalok asédiu seksuál no saida mak Ita bele halo se Ita sai vítima.
PERGUNTA HUSI JOVEN SIRA
Saida mak haʼu presiza hatene kona-ba hahalok asalta seksuál?—Parte 1: Proteje an
Sujestaun tolu neʼebé bele ajuda ita atu la sai vítima ba asalta seksuál.
ITA-NIA KOLEGA HANOIN SAIDA
Saida mak joven sira hatete kona-ba abuza seksuál
Rona toʼok saida mak joven lima hatete kona-ba buat saida deʼit mak bele halo ita sai vítima ba hahalok abuza seksuál no saida mak ita presiza halo bainhira ema abuza ita iha dalan seksuál.
LIVRU HAKLAKEN
Susar neʼebé feto sira hasoru
BÍBLIA NIA HANORIN
Koko ami-nia kursu Bíblia
Hahú kursu Bíblia ho gratuitu hamutuk ho Testemuña ida.