“Tanba ba Maromak la iha buat ida neʼebé labele.”—Lucas 1:37, Tradusaun Mundu Foun.

 “Basa, ba Maromak, la iha buat ida nebe la bele.”—Lucas 1:37, Liafuan diak ba imi, segunda edisaun.

 Maromak neʼebé Kbiit Boot Liu Hotu bele halo buat naran deʼit neʼebé ema hanoin imposivel. La iha buat ida mak bele hanetik Maromak atu halo buat neʼebé nia fó sai ka promete ona.

 Tuir lian Gregu orijinál, eskritura neʼe bele mós tradús nuʼudar: “La iha buat ida neʼebé Maromak fó sai neʼebé labele sai loos.” (Lucas 1:37, nota) Buat neʼebé Maromak Jeová a hatete sempre sai loos, tan neʼe eskritura neʼe bele mós tradús nuʼudar: “Maromak nia promesa sira sei nunka falla” ka “Ho Maromak, la iha buat ida mak imposivel”. Fraze sira-neʼe hotu hatudu sai lia-loos neʼebé hanesan, neʼe mak: La iha liafuan ka promesa husi Maromak neʼebé sei la sai loos, tanba ba nia, buat hotu bele deʼit.—Isaias 55:10, 11.

 Iha Bíblia laran, ita bele hetan eskritura barak neʼebé fó sai ideia neʼebé hanesan kona-ba Maromak nia promesa. Porezemplu, Jeová haruka anju atu fó sai katak Abraão nia feen Sara sei sai isin-rua maski Sara idade ona no labele iha oan. Maromak Jeová dehan: “Iha buat ruma neʼebé Jeová labele halo ka?” (Génesis 18:13, 14) Bainhira fiar-naʼin ida naran Job medita kona-ba Jeová nia kriasaun, nia dehan: “La iha buat ida mak bele hanetik Ita atu halo buat neʼebé Ita hakarak.” (Job 42:2) No bainhira Jesus nia dixípulu sira sente duvida kona-ba sira bele hetan salvasaun husi Maromak, Jesus hatete: “Ba Maromak buat hotu bele deʼit.”—Mateus 19:25, 26. b

 Anju ida naran Gabriel mak temi liafuan iha Lucas 1:37 ba feto virjen ida naran Maria. Gabriel foin dehan katak Maria sei tuur-ahi “Maromak neʼebé Aas Liu Hotu nia Oan-Mane” no tenke “hanaran nia Jesus”. Jesus sei sai Liurai ba Maromak nia Ukun, no ninia ukun sei dura ba nafatin.—Lucas 1:26-33; Apokalipse 11:15.

 Maria husu oinsá mak buat neʼe bele akontese tanba nia seidauk kaben no “seidauk hola mane”. (Lucas 1:34, 35) Gabriel hatete katak Maromak sei uza Ninia espíritu santu ka forsa. Iha tempu neʼebá, Jesus sei iha lalehan nuʼudar Maromak nia oan. Jeová uza ninia espíritu santu atu muda ninia Oan nia moris husi lalehan ba Maria nia knotak. (João 1:14; Filipe 2:5-7) Ho milagre neʼe mak Maria sai isin-rua. Atu hametin Maria nia fiar ba Maromak nia kbiit, anju Gabriel fó-hatene ba nia katak ninia família Isabel mós sai isin-rua “maski nia ferik ona”. Isabel ho ninia laʼen Zacarias la iha oan tanba Isabel labele iha oan. (Lucas 1:36) Sira-nia oan mak João Batista, no nia halaʼo serbisu neʼebé Jeová fó sai nanis ona.—Lucas 1:10-16; 3:1-6.

 Tuirmai mak anju Gabriel hatete liafuan iha Lucas 1:37. Iha tempu neʼebá, karik Gabriel hanoin hela kona-ba Maria no Isabel. Ohin loron, liafuan neʼe ajuda Maromak nia atan sira atu fiar metin katak Maromak sei kontinua kumpre ninia promesa sira. Neʼe inklui promesa atu troka ema nia governu hotu ho Maromak nia Ukun iha lalehan neʼebé ninia Oan Jesus Kristu mak sei halaʼo justisa iha mundu tomak.—Daniel 2:44; 7:13, 14.

 Haree vídeo badak neʼe atu komprende kona-ba livru Lucas.