Habarẹ̌ mapia asal᷊e bọu Yehuwa, Mawu mal᷊uasẹ̌. I Sie mapulu keluarga maral᷊uasẹ̌. (1 Timotius 1:11) I Sie někoạ pẹ̌kakawing kahumotongange. Pẹ̌kakawing sah ene penting tadeạu keluarga mal᷊uasẹ̌ ual᷊ingu manga rariọ botonge maguwạ su ral᷊ungu keluarga piạ mamạ lai papạ. Tau Kristen harusẹ̌ tumuhụ hukungu pěměrenta soal u měndaftarẹ̌ pẹ̌kakawing i sire su kantorẹ̌ catatan sipil.​—Basa Lukas 2:1, 4, 5.

Kerea Yehuwa měmanda pẹ̌kakawing? I Sie mapulu sěngkawingang, esẹ dingangu wawine, masěmbaụ sarang karěngụe. Yehuwa mapulu tadeạu sěngkawingang masatia sěmbaụ su wal᷊inẹ. (Ibrani 13:4) I sie mawěnsing taumata mẹ̌cere. (Maleakhi 2:16) Katewe, tau Kristen botonge mẹ̌cere kụ saụ mẹ̌kawing, kětạeng mạeng kawinge někoạ barang amoral dingangu taumata wal᷊inẹ.​—Basa Matius 19:3-6, 9.

Yehuwa něndiadi esẹ dingangu wawine tadeạu mẹ̌tatul᷊ung sěmbaụ su wal᷊inẹ. (Kejadian 2:18) Ual᷊ingu esẹ kai těmbonangu keluarga, i sie harusẹ̌ měnadia kebutuhan kěluargane, dingangu měněntiro soal u Mawu si sire. I sie lai harusẹ̌ kuměndagẹ̌ kawinge limembong bọu watangenge hala. Sěngkawingang harusẹ̌ makěndagẹ̌ dingangu maadatẹ̌ sěmbaụ su wal᷊inẹ. Ual᷊ingu sěngkawingang tawe nasukụ, i rẹ̌dua harusẹ̌ měngěndung mẹ̌gaghělị ampung. Ene kakungsị tadeạu pẹ̌kakawing mal᷊uasẹ̌.​—Basa Efesus 4:31, 32; 5:22-25, 33; 1 Petrus 3:7.

Mạeng piạ sigěsa nariadi su ral᷊ungu pẹ̌kakawing i rẹ̌dua harusẹ̌ tatapẹ̌ mẹ̌kakěndagẹ̌ sěmbaụ su wal᷊inẹ. (1 Korintus 13:4, 5) Hengetangu Mawu tawe něngoro sěngkawingang mẹ̌tatěntang mạeng piạ masalah su ral᷊ungu pẹ̌kakawing.​—Basa 1 Korintus 7:10-13.

Yehuwa mapulu i kamene měbiahẹ̌ mal᷊uasẹ̌. I Sie něgělị sasasa kapaelange tadeạu i kamene mal᷊uasẹ̌ su tempong mangudạ. I Sie mapulu i kamene matuhụ su matimadẹ̌, ual᷊ingu i sire kai matahuěna dingangu piạ lawọ pengalaman. (Kolose 3:20) Yehuwa lai mapulu i kamene mal᷊uasẹ̌ měkoa barang makal᷊uasẹ̌ naung’E.​—Basa Pengkhotbah 11:9–12:1; Matius 19:13-15; 21:15, 16.

I kamene harusẹ̌ měhal᷊ẹ̌ masěghadẹ̌, gunang měnadia kaěng, pakeang, dingangu pẹ̌tatanakeng. (1 Timotius 5:8) Tadeạu manga rariọ mal᷊uasẹ̌, i kamene harusẹ̌ měněntiro si sire tadeạu kuměndagẹ̌ su Mawu dingangu měngěndung bọu i Sie. (Efesus 6:4) Su tempong i kamene měnodẹ kakěndagẹ̌ su Mawu, ene sarung piạ pěngarune gěguwạ su naungu manga rariọ. Mạeng i kamene měněntiro si sire tuhụ Hengetangu Mawu, hal᷊ẹ̌ ene sarung piạ pěngarune mapaelẹ̌ si sire.​—Basa Ulangan 6:4-7; Amsal 22:6.

Matimadẹ̌ harusẹ̌ mědalo su tempong anạe měkoạ barang mapiạ. Katewe, matimadẹ̌ lai harusẹ̌ měgělị disiplin su tempong i sire někoạ barang nẹ̌sal᷊a. Těntiro kerene makariagạ si sire tadeạu tawe měkoạ barang makakoạ si sire tawe mal᷊uasẹ̌. (Amsal 22:15) Su tempong měgělị disiplin si sire, abe kasarẹ̌ arau měmahang.​—Basa Kolose 3:21.

Sahiding Yehuwa seng někoạ piram baụ bukẹ̌ gunang mẹ̌tul᷊ung matimadẹ̌ dingangu manga rariọ. Manga bukẹ̌ ene dasare bọu Alkitapẹ̌.​—Basa Mazmur 19:7, 11.