PĚNGANGĚNDUNGANG 7
Kai Apa Kararatuangu Mawu Ene?
1. Kai Apa Kararatuangu Mawu Ene?
Kawe nụe i Yesus kai Datu kapaelange?—MARKUS 1:40-42.
Kararatuangu Mawu kai pěmamarenta su sorga. Kararatuang ini sarung měngganti kěbị pěmamarentang taumata, kụ sarung mapakasěhụ kapulung Mawu su sorga dingangu su dunia. Ini habarẹ̌ mapia gunang i kitẹ. Harusẹ̌ piạ pěmamarentang mapia gunang mẹ̌parenta taumata. Kararatuangu Mawu sarung měkoạ kěbị taumata masěmbaụ su dunia.—Basa Daniel 2:44; Matius 6:9, 10; 24:14.
Biasane sěmbaụ kararatuang piạ datune. Yehuwa seng němile Ahuse, Yesus Kristus, gunang makoạ Datu su Kararatuang’E.—Basa Wahyu 11:15.
Pẹ̌biala video Apa Kararatuang u Mawu Ene?
2. Kawe nụe Yesus kai Datu kapaelange?
Yesus kai Datu kapaelange, ual᷊ingu i sie masanạ naung dingangu masatia tumatawang katěngadẹ̌. (Matius 11:28-30) Si Yesus lai piạ kawasa gunang mẹ̌tul᷊ung taumata, ual᷊ingu i sie mẹ̌parenta dunia bọu sorga. Su tempong Yesus saụ nipẹ̌biahẹ̌, i sie naawị sarang sorga kụ kimaiang su sěmběka koaneng i Yehuwa. (Ibrani 10:12, 13) Bọu ene, Mawu něgělị si sie kawasa gunang měnětạ mẹ̌parenta.—Basa Daniel 7:13, 14.
3. I sai sarung mẹ̌parenta dingangi Yesus?
Sěmbaụ kelompok taumata isẹ̌sěbạ ”taumata masusi” sarung mẹ̌parenta dingangi Yesus su sorga. (Daniel 7:27) Kahumotongange nipile nakoạ taumata masusi, ene kai manga rasulẹ̌ i Yesus masatia. Sarang orasẹ̌ ini, Yehuwa bědang měmẹ̌mile manga esẹ dingangu wawine masatia gunang makoạ taumata masusi. Kere i Yesus, i sire saụ nipěbiahẹ̌ dingangu badang roh.—Basa Yohanes 14:1-3; 1 Korintus 15:42-44.
Pirang katau sarung maawị sarang sorga? Yesus nẹ̌sěbạ i sire ene kai ”komol᷊ang kadodọ” (Lukas 12:32) Kal᷊awọe 144.000 su kataune. I sire sarung mẹ̌parenta dunia dingangi Yesus.—Basa Wahyu 14:1.
4. Apa nariadi su tempong Yesus něnětạ nẹ̌parenta?
Kararatuangu Mawu něnětạ nẹ̌parenta su taung 1914. * Su tempong Yesus nakoạ Datu su sorga, kahumotongange nikoạe ute, něnděmẹ Setang dingangu manga hantune sarang dunia. Setang sěbạe pědu kụ nakakoạ lawọ kasasusah su patikụ dunia. (Wahyu 12:7-10, 12) Něnětạ tempo ene, kasasigěsạ nikahombangengu taumata kakạl᷊awọe. Sekẹ, karal᷊unusẹ̌, kasasakị, dingangu linuhẹ̌ kai ”tatiala” seng mal᷊ighạ Kararatuangu Mawu mẹ̌parenta dunia.—Basa Lukas 21:7, 10, 11, 31.
5. Apa seng nikoạ u Kararatuangu Mawu?
Bọu hal᷊ẹ̌ měnginjilẹ̌ su patikụ dunia, Kararatuangu Mawu napakasěmbaụ komol᷊angu taumata bọu haghing bangsa. Jutane taumata masanạ naung ini sarung makoạ rakyatẹ̌ i Yesus. I sire sarung diagateng su tempong Kararatuangu Mawu měminasa dunia dal᷊akị ini. Hakị u ene, kěbị apang mapulu makaěbạ al᷊amatẹ̌ bọu Kararatuangu Mawu, harusẹ̌ měngěndung tumuhụ si Yesus.—Basa Wahyu 7:9, 14, 16, 17.
Su ral᷊ungu 1.000 su taunge, Kararatuang sarung mapakasěhụ kapulung Mawu gunang taumata. Patikụ dunia ini sarung makoạ firdaus. Samurine, Yesus měnarakang Kararatuang ene si Amange. (1 Korintus 15:24-26) Si sai i kau mapulu měhabarẹ̌ soal u Kararatuangu Mawu?—Basa Mazmur 37:10, 11, 29.
^ par. 6 Gunang makasingkạ těbal᷊u Alkitapẹ̌ nělahẹ taung 1914, pěmanda halaman 248-249 su bukẹ̌ Alkitapẹ̌ Něněntiro Apa si Kitẹ?