Bal᷊inẹ kere taumata wal᷊inẹ, Yesus kai makhluk roh kụ měbẹ̌biahẹ̌ su sorga těntal᷊ang bědang tawe nalahirẹ̌ su dunia. (Yohanes 8:23) Bọu kěbị diadikang, Yesus kahumotongange niriading Mawu, kụ i sie nẹ̌sumbala někoạ kěbị haghi. Kětạeng i sie niriadi langsung karạ i Yehuwa. Hakị u ene, nẹ̌tatahino mạeng i sie nisěbạ Ahusu Mawu ”mang sěmbaụ”. (Yohanes 1:14) Mawu měbẹ̌bisara bọu i Yesus, hakị u ene i Yesus nisěbạ ”Hengetang”.​—Basa Amsal 8:22, 23, 30; Kolose 1:15, 16.

Mawu někoạ mukjizat, i Sie něngal᷊ing pěbawiahi Yesus bọu sorga sarang dunia, kụ Yesus nalahirẹ̌ bọu sěngkatau perawan Yahudi arenge Maria. Hakị u ene i Yesus tawẹ apa papạe taumata. (Lukas 1:30-35) Yesus diměnta su dunia (1) gunang měněntiro katěngadẹ̌ soal u Mawu, (2) tadeạu makoạ pẹ̌tatěnoěng soal u měkoạ kapulung Mawu maning tawe gampang, (3) gunang měgělị pěbawiahe nasukụ tadeạu makoạ ”tatěbusẹ̌”.​—Basa Matius 20:28.

Tatěbusẹ̌ mangal᷊ene bawaehẹ̌ tadeạu taumata maliwirẹ̌ bọu papate. (Keluaran 21:29, 30) Mawu tawe něndiadi taumata gunang maghurang lai mate. Apa buktine? Mawu nẹ̌bera su taumata humotong, i Adam, mạeng i sie měkoạ apa nisěbạ u Alkitapẹ̌ ”dosa”, i sie sarung mate. Hakị u ene, manga i Adam tawe nẹ̌dosa, i sie tawe mate.  (Kejadian 2:16, 17; 5:5) Tumuhụ Alkitapẹ̌, papate ”simuẹ̌” su dunia bọu i Adam. Hakị u ene, i Adam něnurusẹ̌ dosa ene su kěbị hitene, kụ bawaehe ute papate. Ual᷊ingu i kitẹ kai hiteng i Adam, i kitẹ membutuhkan tatěbusẹ̌ tadeạu maliwirẹ̌ bọu papate.​—Basa Roma 5:12; 6:23.

I sai botonge makawaehẹ̌ tatěbusẹ̌ ene? Su tempong mate, i kitẹ kětạeng makawaehẹ̌ dosang i kitẹ hala. Tawẹ apa taumata marosa botonge makawaehẹ̌ tatěbusẹ̌ gunang taumata wal᷊ine.​—Basa Mazmur 49:7-9.

Bal᷊inẹ kere i kitẹ, Yesus tawẹ apa dosane. I sie lai tawe měkẹ̌koa dosa hakị u ene i sie tawe harusẹ̌ mate. Katewe i sie nate gunang taumata wal᷊inẹ. Ual᷊ingu sěbạe makěndagẹ̌ su taumata, Mawu něndolohẹ̌ si Yesus sarang dunia. Yesus lai něnodẹ kakěndage si kitẹ su tempong i sie timuhụ parentang i Amange dingangu něgělị pěbawiahe gunang měněbusẹ̌ dosang i kitẹ.​—Basa Yohanes 3:16; Roma 5:18, 19.

Pẹ̌biala video Kawe Nụe i Yesus Nate?

Su tempong su dunia, Yesus napakapia taumata masakị, napakawiahẹ̌ taumata nate, dingangu nẹ̌tul᷊ung taumata masusah. Ene něnodẹ apa sarung koatenge su ěllo mahi gunang kěbị taumata matuhụ. (Matius 15:30, 31; Yohanes 5:28) Su tempong Yesus nate, Mawu saụ napakawiahẹ̌ si sie nakoạ makhluk roh. (1 Petrus 3:18) Yesus kimaiang su sěmběka koanengu Mawu sarang Yehuwa měgělị kawasa si sie gunang makoạ Datu mẹ̌parenta dunia. (Ibrani 10:12, 13) Orasẹ̌ ini, Yesus seng nakọa Datu su sorga, kụ manga murite mělẹ̌habarẹ̌ habarẹ̌ mapia ini su patikụ dunia.​—Basa Daniel 7:13, 14; Matius 24:14.

Seng mal᷊ighạ Yesus mẹ̌pakẹ kawasane gunang mapakailang kasasigěsạ dingangu kěbị apang nakasusah si kitẹ. Kěbị apang mangimang si Yesus dingangu matuhụ si sie sarung měbiahẹ̌ mal᷊uasẹ̌ su firdaus su dunia.​—Basa Mazmur 37:9-11.