Umkhosi wema-Easter awukasekelwa eBhayibhelini. Nawungabukisisa umlandvo, ungabona kutsi umkhosi wema-Easter usekelwe emasikweni akadzeni laphatselene nekutalana. Cabanga nganaku lokulandzelako.

1.   Ligama: I-Encyclopædia Britannica itsi: “Awatiwa umsuka weligama lesiNgisi lelitsi Easter; umphristi Venerable Bede, longum-Anglo-Saxon, ngelikhulu lesi-8 wasusela leligama lelitsi Easter ku-Eostre longunkulunkulukati wentfwasahlobo wema-Anglo-Saxon.” Labanye batsi lasuselwa ku-Astarte, nkulunkulukati wentalo wema-Phoenician nobe kunkulunkulukati Ishtar waseBhabhulona.

2.   Bologwaja: Loku kumelela kutalana futsi “kusukela emikhosini yasendvulo yase-Europe kanye nase-Middle East, kumelela nemicimbi yemacaba yasentfwasahlobo.”​—I-Encyclopædia Britannica.

3.   Emacandza: Ngekusho kwe-Funk & Wagnalls Standard Dictionary of Folklore, Mythology and Legend, kutingela emacandza laletfwa ngulogwaja ngalomkhosi wema-Easter akusiwo nje umdlalo, kodvwa kuluphawu loluhambisana nelisiko lekutalana.” Kulamanye emasiko bakholelwa kutsi lamacandza lahlotjisiwe angesikhatsi sema-Easter “ngalokusimangaliso angakwenta ujabule, uphumelele, ube nemphilo lenhle futsi uvikeleke.”​—I-Traditional Festivals.

4.   Timphahla letinsha tangesikhatsi sema-Easter: “Bekutsatfwa njengekwedzelela nekutibitela ibhadi kubingelela Eastre, nkulunkulukati wase-Scandinavia ungakagcoki timphahla letinsha.”​—I-The Giant Book of Superstitions.

5.   Tinkonzo tekuphuma kwelilanga: Letinkonzo letihambisana nelisiko lakadzeni lekukhonta lilanga “betentiwa ngesikhatsi busuku nemini kulingana, kuze kwemukelwe lilanga kanye nemandla alo lebekatawenta tintfo letihlumako tiphile.”​—I-Celebrations​—The Complete Book of American Holidays.

 I-The American Book of Days iwuchaza kahle umsuka wema-Easter nayitsi: “Kusebaleni kutsi emaSontfo nakasandza kusungulwa atsatsa lamasiko emacaba awafaka ebuKhristwini.”

 LiBhayibheli liyasecwayisa ngekukhonta Nkulunkulu sibe silandzela emasiko langamjabulisi. (Makho 7:6-8) Ku-2 KubaseKhorinte 6:17 Jehova utsi: Tehlukaniseni “nabo, futsi ningatsintsi lutfo lolungcolile.” Ema-Easter ngemaholide emacaba futsi loyo lofuna kujabulisa Jehova kufanele angawagubhi.