LiBhayibheli lisitjela kutsi kufanele sikulungele kupha labanye futsi sikwente ngetisusa letinhle. Likhombisa kutsi kupha lokunjalo kuyabazuzisa bobabili, lolophako nalolophiwako. (Taga 11:25; Lukha 6:38) Jesu watsi: “Kunenjabulo lenyenti ekupheni kunasekwemukeleni.”—Imisebenti 20:35.

•  Kunini lapho kupha kujabulisa khona Nkulunkulu?

•  Kunini lapho khona kupha kungamjabulisi Nkulunkulu?

•  Emavesi eliBhayibheli lakhuluma ngekwephana

 Kupha kuyazuzisa nangabe kwentiwa ngekutitsandzela. LiBhayibheli litsi: “Nguloyo naloyo akente njengobe ancumile enhlitiyweni yakhe, hhayi ngekutitila nobe ngekucindzetelwa, ngobe Nkulunkulu utsandza umuntfu lopha ajabulile.”—2 Khorinte 9:7.

 Kupha ngalokusuka enhlitiyweni kuluhlobo ‘lwekukhonta’ lolwemukelwa nguNkulunkulu. (Jakobe 1:27) Umuntfu losita labanye ngemusa wenta lokuhle emehlweni aNkulunkulu, futsi Nkulunkulu utsi usuke aboleka Yena. (Taga 19:17) LiBhayibheli lifundzisa kutsi Nkulunkulu utambuyisela loyo lophilako.—Lukha 14:12-14.

 Nakwentiwe ngetisusa letimbi. Loku kuhlanganisa:

•   Kujabulisa bantfu.—Matewu 6:2.

•   Kulindzela umvuzo tsite.—Lukha 14:12-14.

•   Kutsenga insindziso.—Tihlabelelo 49:6, 7.

 Nangabe lesipho sisetjentiselwa tintfo Nkulunkulu latitondzako. Ngekwesibonelo, kubi kupha umuntfu imali kuze ayogembula, noma asebentise kabi tidzakamiva netjwala. (1 Khorinte 6:9, 10; 2 Khorinte 7:1) Ngendlela lefanako, akusikahle kupha umuntfu longafuni kusebenta imali.—2 Thesalonika 3:10

 Nangabe sipha labanye kakhulu bese asisanakekeli imindeni yetfu. LiBhayibheli lifundzisa kutsi tinhloko temindeni kufanele tinakekele tidzingo temindeni yato. (1 Thimothi 5:8) Kubi kutsi inhloko yemndeni iphe labanye kakhulu kangangekutsi ize ihluphekise umndeni wayo. Ngalokufanako, Jesu wabalahla labo labebangafuni kunakekela batali babo lasebakhulile batsi tintfo labanato ‘titipho letinikelwe kuNkulunkulu.’—Makho 7:9-13.