• Bekatawukhetfwa nguNkulunkulu. “Mine ngibeke inkhosi yami . . . ngitakunika tive tibe lifa lakho, futsi ngikunike umhlaba wonkhe kutsi ube wakho.”​—Tihlabelelo 2:6, 8.

• Bekatawuba yindlalifa yeNkhosi Davide. “Sitalelwe umntfwana, siphiwe indvodzana . . . Kwandza kwekubusa kwakhe nekuthula angeke kuphele, esihlalweni sebukhosi saDavide nasembusweni wakhe kuze usimamiswe.”​—Isaya 9:6, 7.

• Bekatawutalelwa eBetlehema. “Awu Bhetlehema . . . , kuwe kutawuvela umbusi . . . Kubusa kwakhe kutawufika ngisho nasemikhawulweni yemhlaba.”​—Mikha 5:2, 4.

• Bekatawaliwa bantfu baphindze bambulale. “Wedzelelwa futsi sambukela phansi . . . wahlatjwa ngenca yetono tetfu; wafihlitwa ngenca yemacala etfu.”​—Isaya 53:3, 5.

• Bekatawuvuswa ekufeni futsi akhatinyuliswe. “Angeke uze ungishiye eThuneni. Futsi angeke uvumele kutsi lowetsembekile wakho abole ethuneni . . . Esandleni sakho sangesekudla kunenjabulo phakadze naphakadze.”​—Tihlabelelo 16:10, 11.

Kuwo wonkhe umlandvo webantfu, munye kuphela umuntfu lofanelwa nguloku lokushiwo ngenhla njengembusi lofanele. Loyo muntfu nguJesu Khristu. Ecinisweni, ingilosi yatjela Mariya make waJesu kutsi ‘Nkulunkulu utayinika [Jesu] sihlalo sebukhosi sababe wayo Davide, . . . neMbuso wayo ngeke uphele.’​—Lukha 1:31-33.

Jesu akazange abuse asesemhlabeni. Nanobe kunjalo, utawubusa bantfu asezulwini njengeNkhosi yeMbuso waNkulunkulu. Yini lementa abe nguMbusi lofanele? Cabanga ngaloko lakwenta ngesikhatsi alamhlabeni.

•   Jesu bekabanakekela bantfu. Jesu wasita emadvodza nebafati, bantfu labasha nalabadzala, bekangenandzaba kutsi bavelaphi noma bakuliphi lizinga ekuphileni. (Matewu 9:36; Makho 10:16) Ngesikhatsi umuntfu lobekanebulephelo eta kuye amncenga atsi: “Nawutsandza ungangenta ngihlanteke,” Jesu wamvela futsi wamelapha.​—Makho 1:40-42.

• Jesu wasifundzisa indlela yekujabulisa Nkulunkulu. Watsi: “Ngeke nikhonte Nkulunkulu kanye nemcebo.” Waphindze watsi kufanele siphatse labanye ngendlela natsi lesifuna basiphatse ngayo​—umyalo lowatiwa ngekutsi nguMtsetfo weliGolide. Ngetulu kwaloko, wakhombisa kutsi Nkulunkulu akanendzaba naloko lesikwentako kuphela, kodvwa unendzaba nangaloko lesikucabangako nangendlela lesitiva ngayo. Ngako, nasifuna kujabulisa Nkulunkulu, kufanele silawule indlela lesitiva ngayo. (Matewu 5:28; 6:24; 7:12 Jesu wagcizelela nekutsi nasifuna kujabula mbamba, kufanele sifundze loko Nkulunkulu lafuna sikwente bese siyakwenta.​—Lukha 11:28.

• Jesu wafundzisa kutsi yini leshiwo kutsandza labanye. Emavi kanye netento taJesu bekunemandla kakhulu futsi kwatsintsa tinhlitiyo talabebamlalele. “Lesicumbi sebantfu sabamba wangentansi ngendlela labefundzisa ngayo, ngobe abefundzisa njengemuntfu loneligunya.” (Matewu 7:28, 29) Wabafundzisa watsi: Nitsandze titsa tenu.’ Wathantazela ngisho nalabo lababa nesandla ekubulaweni kwakhe, watsi: “Babe, batsetselele ngobe abakwati labakwentako.”​—Matewu 5:44; Lukha 23:34.

Kumfanela ngalokugcwele Jesu kuba nguMbusi wemhlaba ngobe uyasitana futsi ulungile. Kodvwa utawucala nini lokubusa?