YOMARA nabomnakabo, lokunguMarcelo naHiver, bahlala eGuatemala. Yomara wacala kudadisha liBhayibheli naboFakazi, futsi ngekuhamba kwesikhatsi nabomnakabo bacala kudadisha liBhayibheli. Kepha bekunenkinga. Bobatsatfu ababoni emehlweni futsi bebangakwati kufundza i-braille. Ngako loyo bekadadisha nabo bekabafundzela tigaba kanye nemavesi aleso sifundvo.

Bekuphindze kube matima kuya emihlanganweni yelibandla. Bebangakhoni kuya bodvwa eHholweni leMbuso lebelikhashane ngemizuzu lengu-40. Kodvwa bazalwane ebandleni bebabasita kuze bakhone kufika eHholweni. Ngesikhatsi sebacala kubeka tinkhulumo tebafundzi emhlanganweni losekhatsi neliviki, bazalwane bebabasita kutsi bakubambe ngengcondvo loko bebatakusho.

NgaMay 2019, imihlangano yelibandla yacala kubanjelwa endzaweni yangakubo. Ngaleso sikhatsi, besekunalabashadene labangemahlahlandlela lebebatfutsele kuleyo ndzawo. Batibekela umgomo wekufundzisa letelamani letintsatfu kufundza i-braille nekuyibhala, ngisho nobe nabo bebangakwati kukwenta. Baya emtatjeni wetincwadzi futsi batfola tincwadzi letikhuluma nge-braille kuze batfole kutsi bangabafundzisa njani labanye kusebentisa i-braille.

Ngemuva kwetinyanga letimbalwa, letelamani letintsatfu bese tikwati kufundza i-braille, futsi loko kwatisita kutsi titfutfuke ebuhlotjeni bato naJehova. a Nyalo boYomara, naMarcelo kanye naHiver bangemahlahlandlela lavamile. Marcelo uyinceku lesebentako. Bahlala bamatasa emsebentini waJehova liviki lonkhe. Loku kwenta nalabanye bafune kulingisa sibonelo sabo.

Letelamani tiyajabula ngelutsandvo lolukhonjiswe libandla. Yomara utsi: “Kusukela sicala nje kuhlangana naboFakazi, basikhombisa lutsandvo mbamba.” Marcelo wengeta utsi: “Sinebangani labakahle kakhulu ebandleni, futsi siyincenye yemndeni lonelutsandvo emhlabeni wonkhe.” Yomara nabomnakabo bayakulangatelela kubona umhlaba ushintjwa uba lipharadisi.—Hla. 37:10, 11; Isa. 35:5.