TAN NA AI!
O ten sma no o feti moro?—San Bijbel e taki?
„Disi na a ten fu no meki den fet’sani wroko moro èn fu no meki sani kon moro ogri. Now na a ten fu dwengi gi wisrefi.” Disi na san António Guterres, na edeman fu den Verenigde Naties taki di Iran go feti nanga Israel tapu satra 13 april 2024.
A feti na a Midden-Oosten na wan fu den so furu feti di wi e si na heri grontapu.
„Sensi a Di fu Tu Grontapufeti wi e si taki nownowde wi abi moro feti leki fosi. Sowan 2 milyard sma e firi den bakapisi fu den feti disi. Dati na 25 procent fu ala sma di e libi na grontapu.”—VN-raiman di abi a frantwortu fu luku efu ala sani na grontapu de veilig (VN-veiligheidsraad), 26 yanuari 2023.
Wan tu presi pe feti de: Israel, Gasa, Siria, Aserbadyan, Ukraini, Sudan, Etiopia, Niger, Mianmar nanga Haiti. a
O ten sma no o feti moro? Den tiriman fu grontapu man meki taki freide de? San Bijbel e taki?
Feti de na heri grontapu
Den feti di wi e si na heri grontapu e sori taki heri esi wan kba o kon na ala feti. Bijbel ben taki dati den feti disi ben o de na ini a ten fu wi. Bijbel e kari a ten disi „a kaba fu a grontapu disi”.—Mateyus 24:3.
„Unu o yere taki feti e feti èn unu o yere nyunsu taki feti de. . . . A wan pipel o go feti nanga a tra pipel, èn a wan kownukondre o go feti nanga a tra kownukondre.”—Mateyus 24:6, 7.
Fu si fa den feti fu a ten disi e sori taki Bijbel profeititori e kon tru, dan leisi na artikel di nen „Wat is het teken van ’de laatste dagen’ of ’de eindtijd’?”’”.
Wan feti di o tyari wan kba kon na ala tra feti
Bijbel e taki dati wan kba o kon na ala feti fu libisma. Fa dati o psa? A no libisma o du dati, ma na Gado. A o du dati nanga yepi fu Armagedon di de „a bigi dei fu Gado na Almaktiwan” (Openbaring 16:14, 16). Baka a feti disi Gado o du san a pramisi èn a o meki libisma abi freide fu ala ten.—Psalm 37:10, 11, 29.
Fu sabi moro fu a feti di Gado o feti fu tyari wan kba kon na ala tra feti, dan leisi na artikel di nen „San na a feti fu Armagedon?”
a ACLED Conflict Index, „Ranking violent conflict levels across the world,” yanuari 2024