A feti fu Armagedon na a lasti feti di o de na mindri libisma regering nanga Gado. Den regering disi nanga den sma di e horibaka gi den e gens Gado nownow kaba fu di den no wani taki Gado tiri den (Psalm 2:2). A feti fu Armagedon o tyari wan kaba kon na den regering di de now.​—Danièl 2:44.

 A wortu „Armagedon” skrifi wán leisi nomo na ini Bijbel, na Openbaring 16:16. A profeititori na ini Openbaring e sori taki „den kownu na heri grontapu” o kon na wán „na a presi di sma e kari Armagedon na ini Hebrewtongo” „fu feti a feti na a bigi dei fu Gado na Almaktiwan”.​—Openbaring 16:14.

 Suma o feti na ini Armagedon? Yesus Krestes o teki fesi na ini wan legre fu hemel èn den o wini den feanti fu Gado (Openbaring 19:11-16, 19-21). Den feanti disi na den sma di no wani saka densrefi ondro a tiri fu Gado èn di e pori Gado nen.​—Esekièl 39:7.

 Armagedon o pasa na wan spesrutu presi na ini a kontren pe Israel de? Nôno. Armagedon no o pasa na wan spesrutu presi, ma a o pasa na heri grontapu.​—Yeremia 25:32-34; Esekièl 39:17-20.

 A wortu Armagedon noso „Har–Magedon” (Hebrewtongo Har Megidon), wani taki „Bergi fu Megido”. Fosi, Megido ben de wan foto na ini a kontren fu Israel fu owruten. Prenspari feti ben feti krosibei fu a foto disi. Bijbel e taki fu wan tu fu den feti disi (Krutuman 5:19, 20; 2 Kownu 9:27; 23:29). Ma Armagedon no kan de wan trutru presi krosibei fu Megido fu owruten, fu di nowan bigi bergi no de drape èn srefi a heri Lagipresi fu Yisreyel no man teki ala den sma di o kon feti nanga Gado. Sobun, Armagedon na wan situwâsi pe den pipel fu heri grontapu e kon na wán fu opo densrefi wan lasti leisi teige a tiri fu Gado.

 Fa a feti fu Armagedon o de? Wi no sabi fa Gado o gebroiki en makti na ini a feti disi, ma wi sabi taki na ini owruten a ben gebroiki sani soleki pisipisi ijs di fadon komoto na hemel, gronseki, bigi alen di e sungu wan presi, faya nanga faya ston di e fadon komoto na hemel, nanga siki (Yob 38:22, 23; Esekièl 38:19, 22; Habakuk 3:10, 11; Sakaria 14:12). Sonwan fu den feanti fu Gado o bruya so te, taki den o bigin kiri makandra. Ma te fu kaba den o kon si taki na Gado e feti nanga den.​—Esekièl 38:21, 23; Sakaria 14:13.

 Armagedon o de a kaba fu grontapu? A no o de a kaba fu a planeiti fu wi, fu di grontapu na a tanpe fu libisma fu ala ten (Psalm 37:29; 96:10; Preikiman 1:4). A no de so tu taki ala libisma o dede na ini Armagedon. Na presi fu dati Armagedon o tyari frulusu kon gi furu sma fu di „wan bigi grupu” sma di e anbegi Gado o tan na libi baka a feti disi.​—Openbaring 7:9, 14; Psalm 37:34.

 Na ini Bijbel, son leisi a wortu „grontapu” e sori go na den ogri sma di no wani arki Gado (1 Yohanes 2:15-17). Sobun, te wi e leisi taki Armagedon o de „a kaba fu grontapu”, dan na fu den ogri sma a e taki.​—Mateyus 24:3.

 O ten Armagedon o pasa? Di Yesus ben taki fu a „bigi banawtu” di ben o kon fosi a feti fu Armagedon, a ben taki: „Nowan sma sabi a dei nanga a yuru dati. Iya, srefi den engel fu hemel nanga a Manpikin no sabi, ma soso a Tata sabi (Mateyus 24:21, 36). Toku Bijbel e sori taki Armagedon o pasa na ini a pisi ten te Yesus kon baka èn wi sabi taki sensi 1914 Yesus kon baka aladi wi no man si en.​—Mateyus 24:37-39.