Waizviziva Here?
Zvidhinha zvakawanikwa mumatongo eBhabhironi uye nzira dzaishandiswa pakugadzira zvidhinha zvacho zvinoratidza sei kuti zvinotaurwa neBhaibheri ndezvechokwadi?
VANOCHERA matongo vakawana zvidhinha zvakawanda muBhabhironi zvainge zvakashandiswa pakuvaka guta racho. Maererano nenyanzvi yekuchera matongo Robert Koldewey, zvidhinha zvakadaro zvaigadzirirwa mumaovheni aiva “kunze kweguta uko kwaiva neivhu rakanaka uye huni dzakawanda.”
Zvinyorwa zvekare zvinoratidza kuti vakuru vehurumende yeBhabhironi vaishandisawo maovheni avo kuita zvinhu zvakaipa chaizvo. Paul-Alain Beaulieu, nyanzvi yekuongorora nhoroondo nemutauro wevaAsiriya paUniversity of Toronto anotaura kuti ‘zvimwe zvinyorwa zvekuBhabhironi zvinoratidza kuti mambo airayira kuti vaya vaisamuteerera kana kuti vaisaremekedza zvinhu zvitsvene vaifanira kukandwa muchoto votsvira imomo.’ Semuenzaniso, chimwe chinyorwa chemumazuva aMambo Nebhukadhinezari chine mashoko anoti: “Vaparadzei, vapisei, vagochei pachoto chemubiki . . . itai kuti utsi hwavo hukwire, vaparadzei nerimi rinotyisa.”
Izvi zvinoyeuchidza vaverengi veBhaibheri nezvezviitiko zviri muna Dhanieri chitsauko 3. Muchitsauko ichocho, tinoverenga kuti Mambo Nebhukadhinezari akamisa chifananidzo chikuru chegoridhe mubani reDhura, kunze kweguta reBhabhironi. Varume vechidiki vatatu vechiHebheru vanoti Shadreki, Misheki, naAbhedhinego pavakaramba kukotamira chifananidzo chacho, Nebhukadhinezari akatsamwa chaizvo akarayira kuti moto ukuchidzirwe kuti upise “zvakapetwa kanomwe kupfuura zvawaisiita” uye akaita kuti varume ivavo vatatu ‘vakandwe muchoto chemoto unopisa kwazvo.’ Ngirozi ine simba yakaponesa varume ava.—Dhan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Chidhinha chakanyorwa zita raNebhukadhinezari
Zvidhinha zvakawanikwa muBhabhironi zvinoratidzawo kuti Bhaibheri rinotaura chokwadi. Pazvidhinha izvi pane zvakawanda zvine mashoko ekurumbidza mambo. Mamwe mashoko acho anoti: “Nebhukadhinezari, Mambo weBhabhironi . . Muzinda wandakavaka, ini Mambo Mukuru . . . Vana vangu ngavatonge mauri nekusingaperi.” Mashoko aya akada kufanana neakanyorwa pana Dhanieri 4:30, apo Nebhukadhinezari aizvikudza achiti: “Iri harisi Bhabhironi Guru randakavaka nesimba rangu neukuru hwangu kuti rive muzinda weumambo uye kuti ndiratidze ukuru hwangu nesimba rangu here?”
Zvimwe Zvaunogona Kufarira
MIBVUNZO YEBHAIBHERI INOPINDURWA
Bhaibheri Rinotii nezvaDhanieri?
Mwari akamuratidza zvinhu zvatiri kuona zvichiitika mazuva ano.
