E pei ona e aʻoaʻoina mai i lenei polosiua, o loo iai i le Tusi Paia le tele o taʻiala e mafai ona fesoasoani iā te oe ma lou aiga. E finagalo Ieova ina ia e fiafia, ma ua ia folafola mai o le a Ia ʻfaaopoopoina mai isi mea uma’ iā te oe, pe a e faamuamua le tapuaʻiga iā te ia. (Mataio 6:33) E finagalo moni lava o ia ina ia avea oe ma ana uō. Ia faaaogā avanoa uma ina ia atiaʻe ai lau faauōga ma le Atua. O le meaalofa sili lea e mafai e se tagata ona mauaina.—Mataio 22:37, 38.

LE MANATU O LE TUSI PAIA: “ʻE avea aʻu ma o outou tamā, e fai foʻi outou ma oʻu atalii ma oʻu afafine,’ ua fetalai mai ai Ieova.” (2 Korinito 6:18) E finagalo le Atua ina ia avea oe ma ana uō moni. O se tasi o auala e mafai ona faia ai faapea o le tatalo atu lea iā te ia. Ua ia valaaulia i tatou ina ia “tatalo [atu] e lē aunoa.” (1 Tesalonia 5:17) E naunau o ia e faafofoga mai i o tatou manatunatuga loloto ma mea o loo tatou popole ai. (Filipi 4:6) Pe a e tatalo faatasi ma lou aiga, o le a o latou iloa ai e te talitonu moni lava i le Atua.

E lē gata e te talanoa atu i le Atua, ae e tatau foʻi ona e faalogo atu iā te ia. E mafai ona e faia faapea e ala i le suʻesuʻe i lana Afioga ma faitau i lomiga faale-Tusi Paia. (Salamo 1:1, 2) Ia manatunatu loloto i mea ua e aʻoaʻoina. (Salamo 77:11, 12) O le faalogo atu i le Atua e aofia ai foʻi lou auai e lē aunoa i sauniga faa-Kerisiano.—Salamo 122:1-4.

O le talanoa atu i isi e uiga iā Ieova, o se isi lea auala tāua e faamalosia ai la oulua faiā ma Ieova. O le tele lava e te talanoa atu ai i isi e uiga i le Atua, o le atili foʻi lenā o lou vavalalata atu iā te ia.—Mataio 28:19, 20.

LE MEA E MAFAI ONA E FAIA:

• Ia faaavanoa se taimi i aso taʻitasi e faitau ai le Tusi Paia ma tatalo

• Ia faamuamua e lou aiga mea faaleagaga, nai lo o faafiafiaga ma faigāmālōlōga

LE MANATU O LE TUSI PAIA: “Ia outou mafuta vavalalata atu i le Atua, ona mafuta vavalalata mai lea o ia iā te outou.” (Iakopo 4:8) E tatau ona faia sa outou faasologa mo tapuaʻiga a le aiga ma ia tausisi i ai. (Kenese 18:19) E sili atu i lenā, e ao ona manatua le Atua i le olaga i aso faisoo. Ia faamalosia le faiā a lou aiga ma Ieova, e ala i le talanoa e uiga iā te ia “pe a e nofo i lou fale, pe a e savali i le ala, pe a e taoto pe a e tulaʻi foʻi.” (Teuteronome 6:6, 7) Ia fai ma ou sini le faaaʻoaʻo iā Iosua, o lē na faapea mai: “A o aʻu ma loʻu aiga, e matou te auauna iā Ieova.”—Iosua 24:15.

LE MEA E MAFAI ONA E FAIA:

• Ia iai se toleniga faaleagaga e faifai pea, e fetaui ma manaʻoga o sui taʻitasi o lou aiga