Se mea e ono tupu: Pe a vaai Julia i le faata, i lona mafaufau, o ia e lapoʻa. E faapea ane iā te ia lava, “e manaʻomia lava ona ou taumafai malosi ina ia ou paee,” e ui lava o loo fai atu ona mātua ma ana uō o ia ua “matuā ova le paee.”

E leʻi leva atu na mafaufau ai Julia e faia ana taumafaiga uma ina ia lusi ai ni “pauna se lima.” E pau lana mea e fai o le lē ʻai lea mo ni nai aso . . .

Pe ana faapea e tutusa ou faalogona ma faalogona o Julia, o le ā e te faia?

E lē leaga lou popole e faatatau i ou foliga vaaia. O le mea moni, e manaia faamatalaga o loo i le Tusi Paia e faatatau i foliga vaaia o le toʻatele o fafine ma tane, e aofia ai Sara, Rasela, Apikaila, Iosefa ma Tavita. Ua taʻua i le Tusi Paia se fafine e igoa iā Apiseka, o sē “e matuā lalelei lava.”—1 Tupu 1:4.

Peitaʻi, o le toʻatele o talavou ua soona popole i o latou foliga vaaia. O lenā mea e mafai ona iʻu atu ai i ni faafitauli mataʻutia. Seʻi mātau faamatalaga nei:

• I se tasi suʻesuʻega i le Iunaite Setete, e manatu le 58 pasene o tamaʻitaʻi o i latou e maua i le tino puta, ae o le mea moni e na o le 17 pasene o i latou e maua ai.

• I se isi suʻesuʻega na faia i le Iunaite Setete i tamaʻitaʻi e matuā paeee, o le 45 pasene o i latou e manatu o i latou e lapopoʻa.

• I a latou taumafaiga ina ia paeee, ua maua ai nisi talavou i le anorexia. O le anorexia o se ituaiga o maʻi e mafai ona lamatia ai le ola, lea e matuā  musu ai se tasi e ʻai se meaʻai e ui e lagona le mole o le manava. O le faia faapea, e tai pei ua ia lotomalie e matelāina i le fia ʻai.

Pe afai ua amata ona e aafia i āuga o lenei maʻi o le anorexia, po o se isi lava faafitauli i le auala e te vaai ai i meaʻai (eating disorder), ia saʻili mo se fesoasoani. Ia amata i le talanoa atu i lou tinā po o lou tamā, po o se isi tagata matua e te talitonuina. Ua faapea mai le Tusi Paia: “O le uō moni e alofa i taimi uma, ma o ia o se uso ua fanau mo taimi o puapuaga.”—Faataoto 17:17.

O le mea moni, e fua le aulelei moni o se tasi i lona tagata i totonu. Seʻi mafaufau i le atalii o le tupu o Tavita o Apisaloma. Ua faapea mai le Tusi Paia:

ʻSa leai se tasi na tutusa ma ia i lona aulelei. E leai lava se pona iā te ia.’—2 Samuelu 14:25.

Peitaʻi, sa matuā faamaualuga, fia sili ma faaoleole lenei alii talavou. O lea, e lē o taʻuleleia Apisaloma i le Tusi Paia. Nai lo o lea, o loo faamatalaina o ia o se tagata e matuā lē faamaoni, ma o lona ita tele na ia manaʻo ai e faaoo le oti i isi.

O lea, ua talafeagai ai ona fautua mai le Tusi Paia iā i tatou:

“Ia oofu outou i le tagata fou.”—Kolose 3:10.

ʻAua foʻi neʻi faia a outou teuga e tusa ai ma le vaaiga a tagata, ae o le tagata lilo i totonu.’—1 Peteru 3:3, 4.

E leai se leaga o le manaʻo ia manaia ou foliga vaaia. Peitaʻi, e sili atu ona tāua ou uiga faaalia. A o faagasolo taimi, o le a sili atu ona uaʻi atu tagata iā te oe ona o ou uiga taʻuleleia, ae e lē ona o lou malosi po o le aulelei o ou foliga vaaia. Ua faapea mai se tamaʻitaʻi e igoa iā Phylicia: “E vave ona uaʻi atu tagata iā te oe pe afai e te aulelei, ae o le a sili atu ona latou manatua pea lou tagata i totonu ma ou uiga lelei.”

Pe e masani ona e lē fiafia i ou foliga vaaia?

Pe sa e mafaufau e fai se togafitiga faafomaʻi ina ia sui ai ou foliga vaaia, pe matuā tipi foʻi le ʻai ina ia faaleleia ai se vaega o lou fuaitino e te lē o fiafia i ai?

Pe afai e mafai ona fai, o le ā se vaega o ou foliga vaaia e te suia? (Liʻo le vaega o loo e manaʻo e sui.)

• UMĪ

• MAMAFA

• ITUAIGA O LAUULU

• FUAITINO

• FOLIGA

• PAʻU O LE TINO

Pe afai na e tali ioe i fesili muamua e lua, ma liʻo ni vaega se tolu pe sili atu i le fesili lona tolu, mafaufau i le mea lenei: Atonu e lē o iai ni manatu lē lelei o isi e faatatau i ou foliga vaaia, e pei o le auala o loo e manatu ai iā te oe lava. I nisi taimi, e te ono faia ai taumafaiga uma ma soona popole ai i le faaleleia o ou foliga vaaia.—1 Samuelu 16:7.