E faigofie ona tatou lagona le lē mautonu po o le ā le mea e fai, pe afai o loo tauivi sa tatou uō ma faafitauli o le mafaufau. Ae e mafai ona tatou faaalia le manatu mamafa iā i latou, e ala i le fesoasoani i ai e onosaia mafatiaga ona o faafitauli o le mafaufau. E faapefea?

“Ia faalogologo lelei.”​—IAKOPO 1:19.

O se tasi o auala sili e fesoasoani ai i lau uō, o le faalogologo lelei atu pe a fia talanoa mai. Aua e te manatu e tatau lava ona e tali atu i mea uma o loo fai mai ai. Ia faailoa atu lou manatu mamafa iā te ia, ma o loo e faalogologo lelei atu i ona manatu. Ia taumafai e malamalama lelei i ona faalogona, ma aua e te vave faia se faaiʻuga pe faitioina o ia. Ia manatua, e na te ono faia se faamatalaga e na te leʻi mafaufauina, lea e toe salamō mulimuli ane ai.​—Iopu 6:2, 3.

ʻIa Faamāfanafana Atu.’​—1 TESALONIA 5:14.

E ono lagona e lau uō le popole, po o tauivi foʻi ma faalogona o le lē aogā. Pe a e faamautinoa atu e te manatu mamafa iā te ia, o le a avea lea ma faamāfanafanaga ma faalaeiauga, e tusa lava pe e te lē iloa le tala saʻo e fai atu.

“O le uō moni e alofa i taimi uma.”​—FAATAOTO 17:17.

Ia ofo atu le fesoasoani aogā. Nai lo o le taumatemate po o le ā le fesoasoani e avatu, ia fesili atu po o le ā e mafai ona e faia mo ia. Pe  a faigatā ona faamatala mai e lau uō se mea e manaʻo i ai, ia faailoa atu i ai se mea aogā e mafai ona lua faia faatasi, e pei o le ō e savalivali. E te ono faailoa atu foʻi e mafai ona e fesoasoani iā te ia i le faia o faatauga, faamamā le fale, pe faia isi galuega.​—Kalatia 6:2.

“Ia onosaʻi.”​—1 TESALONIA 5:14.

Atonu e lē o taimi uma e fia talanoa ai lau uō. Ia faamautinoa atu iā te ia, e te fiafia e faalogologo atu pe a fia talanoa. Ona o le tulaga o lona maʻi, e na te ono faia ai se faamatalaga po o gaoioiga e faatigā ai iā te oe. E na te ono lē faataunuuina sa oulua fuafuaga na fai, pe aafiagofie foʻi ona faalogona. Ia onosaʻi ma taumafai e malamalama i lona tulaga, a o e avatu le fesoasoani o loo ia manaʻomia.​—Faataoto 18:24.

“Ou te faamautinoa atu i ai, o aʻu o se uō e mafai ona ia talanoa mai i ai i so o se taimi. E tusa pe e lē mafai ona ou foʻia ona faafitauli, ae ou te taumafai pea e faalogologo lelei atu. O nisi taimi e pau lava le mea e na te manaʻomia, o se isi e faalogologo atu iā te ia, ona lelei ai lea o ona faalogona.”​—Farrah, a o sē o loo feagai lana uō ma faafitauli i le taumafa, o le matuā popole, ma le lotomafatia.

“E iai saʻu uō e agalelei ma e faalaeiau mai lava iā te aʻu. Na ia valaaulia aʻu i se taumafataga manaia i lona fale. Na faigofie ona faamatala atu i ai oʻu faalogona, ona o le māfana ma le alofa na ia faaalia. Na matuā faalaeiauina ai lava aʻu.”​—Ha-eun, o sē o loo tauivi ma le lotomafatia.

“E tāua tele le onosaʻi. Pe a fai e laʻu avā se mea ou te lē fiafia ai, ou te taumafai e manatua ua ia faia lenā mea ona o lona maʻi, ae e lē o le ituaiga tagata lenā e iai o ia. E fesoasoani lenā ou te ʻalofia ai le ita, ma faaalia pea le manatu mamafa iā te ia.”​—Iakopo, o se tane o loo tauivi lana avā ma le lotomafatia.

“E avea laʻu avā o sē e lagolagosua ma o se faamāfanafanaga mo aʻu. Pe a lofitūina aʻu i le popole, e lē taitai ona ia faamalosia aʻu e fai se mea ou te lē o manaʻo e fai. O nisi taimi e filifili ai o ia e na te lē faia se mea, e ui o se mea e fiafia e fai. O lenā agaga faataulaga ma le agalelei, ua matuā pele ai o ia iā te aʻu.”​—Eneliko, o sē o loo tauivi ma le matuā popole.