“O nisi taimi e fesili mai teine mo laʻu numera, ona e mananaʻo e matou te faia feusuaʻiga mo na o se pō se tasi. Ae ou te teena lava a latou taumafaiga. A o le taimi e tasi ou te mafaufau, ʻFaapefea pe ana ave i ai laʻu numera?’ O le mea moni, e aulelei nisi o teine, ma e faigofie ona ou mafaufau, ʻManaia foʻi.’”​—Tana, * 16.

Po o pei oe o Tana, o loo feagai ma faaosoosoga? Afai e tutusa o oulua tulaga, e mafai ona e manumalo mai i faaosoosoga.

E aafia tagata uma i faaosoosoga, e aofia ai ma tagata matutua. E tele auala e ala mai ai faaosoosoga. Ina ua matua le aposetolo o Paulo, na tusi o ia: “Ou te matuā naunau i le tulafono a le Atua . . . , ae ua ou iloa i loʻu tino se isi tulafono, o loo feteenaʻi ma le tulafono a loʻu mafaufau, ma ua faapologaina ai aʻu i le tulafono a le agasala.” (Roma 7:22, 23) E ui i omiga, ae na mafai e Paulo ona teena le faanaunauga e lolo atu, ma e mafai foʻi ona e faia faapea. Aiseā e avea ai oe ma pologa i ou tuʻinanauga? (1 Korinito 9:27) Afai e te iloa teena faaosoosoga a o e talavou, o le a e ʻalofia ai popolega i le taimi nei, ma avea ma tomai e matuā aogā iā te oe pe a e matua.

Ua faateteleina faaosoosoga ona o faasalalauga ma ata tifaga. O loo taʻua i le Tusi Paia e malolosi “tuʻinanauga masani o talavou.” (2 Timoteo 2:22) Ae e atili ai na tuʻinanauga ona o ata tifaga, polokalame o le televise, musika ma tusi, ia e avatu ai se feʻau e faapea e lē afāina le lolo atu i faaosoosoga. O se faataʻitaʻiga, pe a ʻulu le alofa’ i se teine ma se tama o se ata tifaga, e mautinoa lava e iai se vaega o le ata o le a la feusuaʻi ai. Peitaʻi, ua faapea mai le Tusi Paia e iai i tagata lototetele le malosi e ʻfaamamao ai pea mai i tuʻinanauga o le tino.’ (1 Peteru 2:11) O lona uiga, e mafai ona e filifili e tetee atu i faaosoosoga. Ae e faapefea?

Ia iloa ou vaivaiga. Po o le ā lava le malosi o se filifili, ae a faalētonu sona sooga e tasi, ua lē aogā. O lea la, po o ā lava au taumafaiga malolosi, ae e mafai ona faalēaogāina ona o ni ou vaivaiga. O ā ni vala e manaʻomia ona e nofouta ai?​—Mataupu silisili o le Tusi Paia: Iakopo 1:14.

Mafaufau i faaosoosoga e ono tulaʻi mai. Mafaufau i tulaga e te ono feagai ai ma ni faaosoosoga. Ia faataʻitaʻi le auala o le a e tetee atu ai i na faaosoosoga.​—Mataupu silisili o le Tusi Paia: Faataoto 22:3.

Ia maumauaʻi i lau faaiʻuga. Ua taʻua i le Tusi Paia, ina ua faaosoosoina Iosefa e faia feusuaʻiga, na ia faapea atu: “Pe faapefea ona ou faia lenei mea leaga tele ma ou agasala ai i le Atua?” (Kenese 39:9) O le faaupuga “pe faapefea ona ou,” e iloa ai na maumauaʻi Iosefa e fai le mea saʻo ae teena mea sesē. Ae faapefea oe?

Saʻili ni uō e lagolagosua iā te oe. E mafai ona e ʻalofia le tele o faaosoosoga i lou olaga, e ala i le filifili o ni uō e tutusa a outou amioga tatau. Ua faapea mai le Tusi Paia: “O lē e savali ma tagata atamamai, e atamai ai o ia.”​—Faataoto 13:20.

ʻAlofia tulaga e faafaigatā ai ona teena faaosoosoga. Faaaʻoaʻoga:

• Aua neʻi iai na o oulua ma se tasi o le isi itupā i se nofoaga e leai ni tagata o iai.

• ʻAlofia le faaaogā o le Initaneti i taimi po o nofoaga e ono faaosoosoina ai oe e matamata i ata matagā.

• ʻAlofia tagata e atagia mai i a latou amioga ma faamatalaga, e foliga mai e lelei mea leaga.

O ā taʻiala e mafai ona e faaaogā e ʻalofia ai tulaga e tutupu mai ai faaosoosoga?​—Mataupu silisili o le Tusi Paia: 2 Timoteo 2:22.

Tatalo mo le fesoasoani. Na faapea atu Iesu i ona soo: ʻIa tatalo e lē aunoa, ina ia aua neʻi outou lolo atu i faaosoosoga.’ (Mataio 26:41) E finagalo Ieova ia e teena faaosoosoga, ma e mafai ona ia fesoasoani mai iā te oe. Ua taʻua i le Tusi Paia: “E na te lē tuua outou i se faaosoosoga e sili atu nai lo o le mea tou te lavātia, ae pe a oo mai le faaosoosoga, e saunia e ia se auala e sao ai outou, ina ia outou tumau ai.”​—1 Korinito 10:13.