O le Tusi Lona Lua iā Timoteo 2:1-26
2 O le mea lea, o oe loʻu atalii e,+ ia e maua pea le malosi e ala i le agalelei faifua o loo iā Keriso Iesu;
2 o mea foʻi na e faalogo ai mai iā te aʻu, ma na molimauina e le toʻatele,+ ia e tuuina atu na mea i tane faamaoni, ona agavaa ai lea o i latou e aʻoaʻo atu i isi.
3 Ia e onosaʻi i puapuaga+ i le avea ai o se fitafita lelei+ a Keriso Iesu.
4 E leai se tagata e auauna o se fitafita e auai* i faiga faapisinisi* o lenei olaga, ina ia fiafia mai ai iā te ia lē na filifilia o ia e avea ma fitafita.
5 Afai foʻi e tauvā se tagata i ni taaloga, e lē faapaleina o ia seʻi vaganā ua tauvā e tusa ai ma tulafono.+
6 E tatau i le faifaatoʻaga galue mamafa ona ʻai muamua i fua o le faatoʻaga.
7 Ia e mafaufau pea i mea ua ou fai atu ai; e foaʻi atu e le Alii iā te oe le malamalama* i mea uma lava.
8 Ia manatua na faatūina Iesu Keriso mai i le oti,+ ma o ia foʻi o le fanau a Tavita+ e tusa ai ma le tala lelei ua ou talaʻia,+
9 lea ua ou tigāina ai ma noanoatia e pei o se tagata solitulafono.+ Peitaʻi, e lē noatia le afioga a le Atua.+
10 O le mea lea, ou te tumau ai pea i mea uma lava ona o ē ua filifilia,+ ina ia maua foʻi e i latou le faaolataga e ala iā Keriso Iesu, faatasi ma le mamalu e faavavau.
11 E maufaatuatuaina lenei faamatalaga: Afai ua tatou oti faatasi, e tatou te ola faatasi foʻi;+
12 afai e tatou te tumau pea, e tatou te pule faatasi o ni tupu;+ afai e tatou te faafiti, e na te faafitia foʻi i tatou;+
13 afai e tatou te lē faamaoni, e faamaoni pea o ia, auā e lē mafai ona faafitia e ia o ia lava.
14 Ia faamanatu atu pea nei mea iā i latou, ia faatonu* iā i latou i luma o le Atua e aua le finau i upu, o se mea e lē aogā lea auā e afāina* ai ē o faalogologo.
15 Ia e taumafai malosi e avea oe ma lē ua finagalo malie i ai le Atua, o se tagata faigaluega e leai se mea e mā ai, e na te taulimaina ma le saʻo le upu moni.+
16 Ae ia teena lauga lē aogā e faaleaga ai mea paia,+ auā e iʻu atu ai i le faateleina pea lava pea o amioga faalēmataʻu,
17 ma e aati foʻi a latou upu e pei o se maʻi papala. E aofia ai Umenaio ma Fileto iā i latou na.+
18 Ua liliuese nei tamāloloa mai i le upu moni, ua la faapea mai ua mavae le toetū,+ ma ua la faaliliuese nisi tagata mai i le faatuatua.
19 E ui i lea, ua faataatia e le Atua le faavae e tumau ma ua iai lenei faamaufaailoga, “Ua silafia e Ieova* ona lava tagata,”+ ma, “O i latou uma ua taʻua ai le suafa o Ieova,*+ ia lafoaʻi le amiolētonu.”
20 Ua iai ni ipu auro ma ipu siliva i se fale tele, e iai foʻi ma ipu laau ma ipu omea, o nisi mo fuafuaga mamalu a o isi mo fuafuaga e lē mamalu.
21 O lea, afai e faamamao ese se tasi mai i na ipu mo fuafuaga lē mamalu, e fai o ia ma ipu mo fuafuaga mamalu, e faapaiaina, e aogā i lona matai, ma e saunia mo galuega lelei uma.
22 O lea, ia sola ese mai i tuʻinanauga o talavou, ae ia tausisi i le amiotonu, le faatuatua, le alofa, le filemu, faatasi ma i latou o ē e valaau i le Alii mai i se lotomamā.
23 Ia teena foʻi finauga valea e leai se uiga,+ auā ua e iloa e tupu ai le femisaaʻi.
24 Auā e lē manaʻomia ona faamisa se pologa a le Alii, ae e tatau ona agamalu* i tagata uma,+ ia agavaa e aʻoaʻo atu, ia pulea lelei o ia lava pe a agaleagaina,+
25 ia faatonu atu ma le agamalu iā i latou o ē e tetee.+ Atonu e tuu atu e le Atua le avanoa ina ia salamō ai i latou,* ma iʻu ai ina maua le poto saʻo i le upu moni,+
26 ina ia toe sagatonu o latou mafaufau ma sosola ese mai i le mailei a le Tiapolo, talu ai na ia puʻe ola i latou ina ia faia le mea ua ia loto i ai.+
Faamatalaga Pito i Lalo
^ Ele., “faalavelavea.”
^ Pe atonu “i mea fai i aso faisoo.”
^ Po o le “faautaga loloto.”
^ Ele., “ia molimau māeʻaeʻa.”
^ Po o le “faaumatia; faaliliuese.”
^ Po o le “faautauta.”
^ Po o le “ina ia suia ai o latou manatu.”