O le Tusi Muamua a Peteru 2:1-25
2 O le mea lea, inā lafoaʻi ese ia mai iā te outou o mea leaga uma,+ ma faiga taufaasesē, ma le faafiaamiotonu, ma le matauʻa, ma le taumuimui uma lava.
2 Ae ia faapei o pepe faatoʻā fananau mai,+ ia outou naunau i le suāsusu e lē suia* o le afioga a le Atua, ina ia mafai ai ona outou tuputupu aʻe ia maua le faaolataga,+
3 ma pe afai foʻi ua outou tofo i le agalelei o le Alii.
4 Ua outou ō mai iā te ia e faapei ua ō mai i se maa ola, e moni sa tuulafoaʻiina e tagata,+ ae ua filifilia e le Atua ma ua tāua iā te ia,+
5 o outou foʻi ua pei o ni maa ola ua fausia aʻe ai le fale faaleagaga,+ o le ʻauositaulaga paia, e ofo atu ai taulaga faaleagaga+ e fiafia i ai le Atua, e ala iā Iesu Keriso.+
6 Auā ua tusia i Tusitusiga Paia: “Faauta! Ua ou tuuina i Siona se maa ua filifilia, o se maa tulimanu faavae e tāua, ma e lē faanoanoa* se tasi e faatuatua i ai.”+
7 O le mea lea, e tāua ai o ia iā te outou, auā ua outou talitonu; a o i latou o ē e lē talitonu, “o le maa lea na tuulafoaʻiina e tufuga,+ ua avea ma maa tulimanu sili,”+
8 ma “o se maa e tausuai ai, ma le papa e tautevateva ai.”+ Ua tausuai i latou nei ona o le lē usiusitaʻi i le upu. O le mea lava lea ua tofia ai i latou.
9 A o outou o “se vaega ua filifilia, o ositaulaga ua avea ma tupu, o le nuu paia,+ o tagata ua faapitoa mo le Atua,+ ina ia outou faalauiloa atu uiga silisili ona lelei”+ o Lē na valaauina outou mai i le pōuliuli i lona malamalama ofoofogia.+
10 Auā e leʻi avea muamua outou ma nuu, ae ua avea nei outou ma nuu o le Atua;+ e tou te leʻi maua le alofa mutimutivale, ae ua outou maua nei le alofa mutimutivale.+
11 Le ʻaupele e, ou te ʻaiʻoi atu iā te outou o tagata ese ma ē e aumau,+ ina ia faamamao pea mai i tuʻinanauga o le tino,+ o mea lava ia e feteenaʻi ma le loto.+
12 Ia outou tausisi i le amiolelei i luma o tagata o le lalolagi,+ auā pe a latou tuuaʻia outou o ni tagata amioleaga, e latou te vāai i a outou amioga lelei,+ ona latou faamamaluina ai lea o le Atua i le aso o lana asiasiga.
13 Ia outou gauaʻi ona o le Alii i foafoaga uma a tagata,*+ e tusa lava po o se tupu+ ona ua sili o ia,
14 po o kovana ua ia aauina atu e faasala i tagata amioleaga, ae viia ē ua faia mea lelei.+
15 Auā o le finagalo lea o le Atua, o le faia o mea lelei, ua outou faafilemu* ai gutu o tagata lē mafaufau mai i le faia o tala valea.+
16 Ia amioaʻi e pei o tagata saʻoloto,+ ma ia faaaogā lo outou saʻolotoga, e lē ina ia ufiufia ai mea leaga,*+ ae ia faapei o ni pologa a le Atua.+
17 Ia āva i ituaiga uma o tagata,+ ia alolofa i le ʻauuso atoa,+ ia matataʻu i le Atua,+ ma ia āva i le tupu.+
18 Ia gauaʻi atu auauna i o latou matai ma le mataʻu tatau,+ e lē na o ē ua amiolelei ma magafagafa, ae faapea foʻi i latou o ē e faamaliegatā.
19 Auā afai e onosaia e se tasi mea faigatā* ma mafatia i faiga lē tonu ona o lona lotofuatiaifo i luma o le Atua,+ o se mea lea e fiafia ai o Ia.
20 Auā o le ā ea le aogā o lo outou tutumau, pe afai ua sasaina outou ona ua outou agasala?+ Ae afai ua outou tutumau i puapuaga ona o le faia o mea lelei, o le mea lea e fiafia ai le Atua.+
21 O le mea moni lenei na valaauina ai outou, auā e oo lava iā Keriso na puapuagatia mo outou,+ ua ia tuuina mai ai le faaaʻoaʻoga mo outou ina ia outou mulimulituʻi ai i ona tulaga aao.+
22 E leʻi faia e ia se agasala,+ e leʻi tautala foʻi lona fofoga i ni upu taufaasesē.+
23 Ina ua upuleagaina o ia,+ e leʻi toe fai atu e ia ni upuleaga.+ Ina ua puapuagatia o ia,+ e leʻi faamataʻu atu, ae na ia tuuina atu pea o ia lava i Lē e faamasinotonu.+
24 Ua tauaveina e ia a tatou agasala+ i lona tino i luga o le laau,+ ina ia lē toe aafia i tatou i agasala, ma ola ai i le amiotonu. O “ona manuʻa foʻi ua faamālōlō ai outou.”+
25 Auā na faapei outou o mamoe ua sē,+ a o lenei ua outou toe foʻi mai i le leoleo mamoe,+ ma le ovasia o o outou ola.
Faamatalaga Pito i Lalo
^ Po o le “mamā.”
^ Ele., “faalumaina.”
^ E faasino atu i se mea ua faavaeina e tagata.
^ Ele., “pupuni.”
^ Po o le “fai ma faamolemolega mo mea leaga.”
^ Po o “mea tigā.”
