“Pe a faasaʻo oe e se isi, o loo taʻu atu e lenā tagata se mea sesē o loo e faia. Ou te leʻi faalogo lava i se isi ua faapea mai: ʻE ese loʻu fiafia pe a fai mai se tasi o loo oʻu faia se mea sesē.’”​—Emi, 17. *

Pe e faigatā ona e talia ni faasaʻoga mai i ou mātua, faiaʻoga, ma isi e matutua atu iā te oe? Pe afai o le tulaga lenā, o le a fesoasoani la lenei mataupu iā te oe.

E manaʻomia e tagata uma faasaʻoga.

“E sesē i tatou uma i mea e tele.”​—Iakopo 3:2.

“E lē tatau ona e matamuli fua pe a faasaʻo oe i le faia o se mea sesē.”​—Jessica.

O lou mauaina o se faasaʻoga e lē faapea ai ua e lē taulau.

“E aʻoaʻia e Ieova * o lē e alofa i ai, e pei foʻi ona faia e le tamā i lona atalii o lē ua ia alofa i ai.”​—Faataoto 3:12.

“Pe a faasaʻo aʻu e nisi, ou te taumafai e iloa e lē faigofie ona latou faia faapea, ae o le alofa ua latou fautuaina ai aʻu.”​—Tamara.

E fesoasoani faasaʻoga iā te oe e toe timata ai le upega.

“Ia faalogo i mea e aʻoaʻo atu ona atamai ai lea.”​—Faataoto 8:33.

“E tāua tele faasaʻoga mo le olaga i le lumanaʻi. E te iloa ai manatu o isi e faatatau iā te oe, ma fesoasoani ai iā te oe e aveesea ni uiga lē sao e te lē o iloa ua e aafia ai.”​—Deanne.

Ia iloa le agaga o le faasaʻoga. Atonu e vave ona tigā lou loto pe a avatu e se isi se faasaʻoga iā te oe. Peitaʻi, taumafai e aveese na faalogona. Ina ia faia faapea, seʻi mafaufau o oe lea e te avatuina le faasaʻoga i se isi atonu o sou tei laʻitiiti. Po ua e iloa le aogā o le faasaʻoga? Toe mafaufau la o oe lea e te mauaina le faasaʻoga, ma vaai i le faasaʻoga i le auala lava lenā e tasi.​—Mataupu silisili o le Tusi Paia: Failauga 7:9.

“O nisi taimi e te matuā tigā ai i le faasaʻoga ma galo ai iā te oe o loo taumafai lenā tagata e fesoasoani mai mo lou lelei, ae e lē o taumafai e faatigā iā te oe.”​—Theresa.

Ia lotomaulalo. Aua neʻi faatagaina le faamaualuga e teena ai le faasaʻoga. I le isi itu, aua neʻi lofitūina oe i le lotovaivai ona o se mea e te galue e faaleleia. E fesoasoani le lotomaulalo iā te oe e ʻalofia ai manatu faapena. Ia manatua: O le faasaʻoga e te matuā tigā ai lava, o le faasaʻoga lenā e sili ona e manaʻomia. Ae afai e te teena se faasaʻoga po o le ā lava le māfuaaga, ua e lē maua la aogā mai i lenā faasaʻoga e fesoasoani i lou ola tuputupu aʻe.​—Mataupu silisili o le Tusi Paia: Faataoto 16:18.

“O le taliaina o faasaʻoga o se tasi lea o vala tāua tele i le avea ma tagata matua. Peitaʻi, pe a fai ma a tatou masani le teena o faasaʻoga, o le a aafia ai o tatou olaga i le lumanaʻi.”​—Lena.

Ia faaalia le lotofaafetai. E tusa pe faigatā ona e talia le faasaʻoga, aiseā e lē faaalia ai lou loto faafetai i lē na aumai ai? E mautinoa, e manaʻo moni lava lenā tagata ina ia e taulau manuia.​—Mataupu silisili o le Tusi Paia: Salamo 141:5.

“E leai se mea e leaga ai le faapea atu ʻFaafetai,’ aemaise lava pe a e manaʻomia se faasaʻoga. E tusa lava pe e te lē o manaʻomia lenā faasaʻoga, e mafai lava ona e faaalia le faaaloalo ma le lotofaafetai i ana taumafaiga e fesoasoani mai iā te oe.”​—Carla.